- राजेन्द्रमान शाक्यया मां तेजलक्ष्मी शाक्य व अबु गणेशमान शाक्य खः । राजेन्द्रमान ७म्ह दाजु किजा मध्ये दकलय् कान्छाम्ह खःसा क्येँहें छम्ह नं दु ।
- राजेन्द्रमान शाक्यया छेँय् येँया किलागलय् खः । अय्नं यक्वसां राजेन्द्रमान शाक्य ख्वपयाम्ह धकाः स्यु । तर पुख्र्यौलि छेँय् स्वया वन धाःसा राजेन्द्रमान शाक्यया आजुपिं यलया नागबहालय् दु धैगु दावी वय्कःया दु । न्हापा ख्वप दरवारया लुँ ध्वाका–स्वर्ण ध्वाका दयेकेगु निंतिं कालिगढया माग जुगु कारण आजुपिं ख्वपय् वना बसोवास याःवंगु जुयाच्वन । राजेन्द्रमानया बाज्याया पालय् तिनि थन येँय् वयाः च्वंवःगु खः ।
- राजेन्द्रमान शाक्यया स्वापू ख्वपया गुईँ सिं आजु व तुयुसिं आजुलिसे दु । थौं नं ख्वपया जेतवर्ण महाविहारय् गुईंसिं (गुण सिंह)या मूर्र्ति तयातःगु दनि धैगु न्यने दु ।
- राजेन्द्रमान शाक्यया तःधिम्ह दाजु मास्टर । राजेन्द्रमानया छेँय् हे त्वाःयापिं दक्वं मस्तय्त आखः ब्वंकीगु । थथे जुगुलिं राजेन्द्रमानं प्रारम्भिक शिक्षा छेँय् तुं काल । अले परोपकार स्कूलय् छक्वलं २ क्लासय् ब्वन । तर म्ह तःधिकः जुगुलिं नकतिनि २ क्लास धकाः दक्वस्यां हायेकेगु याःगुलिं राजेन्द्रमानयात प्रभात माध्यामिक विद्यालय छक्वलं ४ कक्षाय् भर्ना याना बिल । ४ निसें ८ तक्क थ्व हे स्कूलय् ब्वनाः ९ व १० क्लास शान्ती निकुञ्जय् ब्वं वन ।
- स्कूलय् थः हे दाजु मास्तर जुगु हुनिं राजेन्द्र मान तसकं हे ज्ञानी जुयाः स्कूल शिक्षा पुवंकल । स्कूल जीवन जःछि गुब्लें मास्टरया कथि मनःगु, बेन्चय् मदंगु व होमवर्क न्ह्याब्लें याइम्ह जुयाच्वन ।
- मचांनिसें हे राजन्द्रमान शाक्ययात बांलाक्क वसः पुने यः। थः हे मांनं वसः सुयाःबिइगु व मां नं सुचिका ज्या याइगुलिं राजेन्द्रमान शाक्यं बि.कम थ्यने धुंकाः तिनिं न्हापांखुशी पाइन्ट न्याना न्ह्यागु खः ।
- ६–७ क्लासय् बिद्यार्थी कनसेसन कार्डया ब्यवस्था जुइवं हलय् वनां प्याखँ स्वः वनेगु पाखे राजेन्द्रमानया मन वन । तर प्याखँ स्वः वनेत छेँय् नं ध्यबा बीगु खँ मजुल । स्कूल वनेत छेँनं ५गः ध्यबा जक बीगु । थुगु हे ध्यबा मुंकाः प्याखँया टिकट न्याइगु । मेमेगु हलय् थर्ड क्लासया २९ ध्यबा काइगु तर विश्वज्योति हलय् फोर्थ क्लासया १६ ध्यबा काइगु । थथे जुयाः पासा लिसे मिलेजुयाः ८÷८ ध्यबा तयाः फिल्म स्वः वनीगु जुल । फिल्म स्वइबलय् नं इन्टरभल न्ह्यः छम्हेस्यां स्वइगु व इन्टरभल लिपा मेम्हेस्यां स्वयाः न्हापा व लिपाया बाखँ पालंपा कना प्याखँया मज्जा कायेगु हँ । इन्र्टभलय् पिहांवयाः नं थःके दुगु टिकट हाकनं ब्लाय्कं मियाः यःयःगु न्याना नयेगु नं याना हँ ।
- राजेन्द्रमान शाक्यं एस एल सि थर्ड डिभिजनय् पास यागु जुल । छेँय् पढाइलय् दकलय् कमजोरम्ह नं राजेन्द्रमान शाक्य हे लानाच्वन । थथे जुगुया कारण खः राजेन्द्रमान दकलय् कान्छाम्ह जुगुलिं । सकस्यां माया याइगुलिं फुक्कं चिज थःम्ह धैथे दु ।
- राजेन्द्रमान शाक्यया न्ह्य्म्ह दाजुकिजा फुक्कं हे बिस्कं बिस्कं क्षत्रय् दु । छसि कथं दाजुपिं जोग्राफर, ज्यासः ज्याः, अडिटर, फुड टेक्नोलोजिस्ट, मेकानिकल इन्जीनियर, सिभिल इन्जीनियर दु । थ्व हे कारणं राजेन्द्रमान शाक्ययात डाक्टर यायेगु तःधंगु इच्छा दुगु खनिं ।
- डाक्टर ब्वंके धकाः आनन्दकुटि साइन्स कलेजय् ब्वंकेत स्वःगु जुया च्वन तर उगु कलेजय् ब्वनेगु मन मवनेवं वय्कःया तःधिम्ह दाजुं थःम्हं ब्वंकाच्वंगु नेपाल युथ कलेज पकनांज्वलय् भर्ना यात ।
- प्रभात माध्यामिक विद्यालय्स ब्वनाच्वंगु इलय् राजेन्द्रमान शाक्यया प्याखँ हुले यः । स्कुलं ससुपुजा धकाः स्वंयभुइ गुँभ्वय् यंकिगु जुयाच्वन । उगु हे इलय् राजेन्द्रमान शाक्यं न्हापांखुशी ईश्वरानन्दं च्वयातःगु सफुलिइ च्वंगु ख्यालः खःसां च्यः मखुसां च्यः धाःगु म्हितुगु खः ।
- भाषिक संगठन मांभाय् पुचःया संस्थापक छ्यान्जे राजन्द्रमान शाक्यं थुगु हे संस्था पाखें थाय्मदु ल्याम्ह पुचःलं ख्यालः धेंधेंबल्ला कासाय् पद्मरत्न तुलाधरया व्हाइट मार्केट ख्यालः क्यंगु खः । थुगु ख्यालः न्हाप लाःगु खः ।
- थुगु ख्यालः न्हापलाय्वं किलाघःत्वाया दाजुकिजापिंसं राजेन्द्रमान शाक्ययात ब्वलय् तयाः बाजं थानां पुरा येँय् देय् चाहिइकुगु खः ।
- किलाघःया स्टार क्लबया संस्थापक छ्यान्जे नं राजेन्द्रमान शाक्य खः ।
- व्हाइट मार्केटय् मू भुमिकाय् राजेन्द्रमान शाक्यं म्हितेमाःगु नं बिस्कं हे बाखं दु । राजेन्द्रमान शाक्यया हे दाजु (माइला बाया काय्) साप हे न्हिके मांम्ह लानाच्वन । दाजुयात हे मू भुमिका म्हितके धकाः फुक्कं हे रिहलर्सल जुल । तर तन्हु मछि रिहलर्सल याना नं डायलग कण्ठ मजुल अले अभिनय नं याये मफुत । दाजुयात ग्वाहलि यानाच्वंम्ह राजेन्द्रमानं दाजुयात स्यं स्यं थःम्हं हे फुक्कं कण्ठ जुगु खनां थःम्हं म्हितेगु निणर्य यात ।
- किपूलिइ मास्टर्स ब्वनाच्वंगु इलय् अखवारय् नेपाल बैंकय् कार्य सहायकया निंतिं बिज्ञापन पिहांवःगु जुयाच्वन । कार्य सहायक धैगु छु धकाः मसिइकं हे बिज्ञापनया निंतिं आवेदन बिल । अले छन्हु नेपाल बैंकं ज्याया नितिं पौ वल । नेपाल बैंकया भद्रपुर शाखाय् पोष्टिंग जुइवं निन्हु बिइक येँ नं भद्रपुर वन । अन थ्यंका हेड एसिस्टेंटया ज्या धकाः तिनि सिइकल । दच्छि तक भद्रपुरय् च्वना ज्या यात ।
- २०३४ सालय् नेपाल बैंकय् उगु जागिर नःगु बापत ३३० तका राजेन्द्रमानया तलब खः । थ्व सिबें न्ह्यः नं ख्वपया बालबोध शान्ति निम्न मा वि स्कुलय् मस्तयत हिसाब व अंग्रजि छुं ई तक्क ब्वंकुगु खः । अबलय् लच्छिया १५० तकाया तलब खः ।
- भद्रपुरय् नेपाल बैंक व नेपाल बाणिज्य बैंक दथुइ फुटबल कासा जुगु इलय् राजेन्द्रमान शाक्यं हाफ टाइमय् म्हुतु वाना कासा हे त्वताः वःगु खः । छाय्की हाफ टाइम तक नं राजेन्द्र मान शाक्यं बल हे थिइ मखं हं। बैंकया स्टाफतय् दथुइ जुगु थुगु कासय् दक्वस्यां लाक्वपाक्व व ला ला थाय् बल थ्वायेगु यायेवं राजेन्द्र मानं कासा हे त्वता वःगु खः ।
- मोटर साइकल दुर्घटनाय् लाना राजेन्द्रमान शाक्यया ख्वालय् मोटरसाइकलया तारं केरे जुयाः न्यतलय् घाः जुगु खः । वीर हस्पितलय् वना वासः याक वंम्ह राजेन्द्र मान शाक्यं लिपा टाँका चायेधुंका तिनि अन ७पू टाँका तःगु धकाः सिइकुगु खः ।
- नेशनल फाइनान्सय् १५ बर्षं मल्याक्क ज्या यायेधुंका थःगु हे छुं न्हुगु ज्या याये धकाः च्वनाच्वंम्ह राजेन्द्रमान शाक्यं समस्याग्रस्त सि एम बि फाइनासयात हाकनं न्हूगु उँचाइलय् थ्यंका आ सिनर्जि फाइनान्सया नामं संचालन यानावंगु दु ।
- राजेन्द्रमान शाक्यं यक्व हे नेवाः प्याखँ म्हिता दिइ धुंकुगु दुसां वय्कलं म्हितादीगु खसभाय्या प्याखँ सुनगाभायात वंगु बर्षय् नेपाः पाखें अस्कर सिरपाया निंतिं धेंधेंबल्लाया निंतिं छ्वःगु खः ।
