थौंकन्हय्या जमाना सिक्वेलया खः । हरेक सुपरहिट संकिपाया सिक्वेल पिदनाच्वंगु दु । न्हापा छगू इलय् हिट संकिपाया सिक्वले फ्लप जुया वनाच्वंगुलिइ आः पिदनाच्वंगु सिक्वेलं नं बांलाःगु हे बजाः कयाच्वंगु खनेदु । अथेजुयाः ला खइ, थौंकन्हय् सिक्वलेया रूपय् पार्ट टु जक मखु, पार्ट थ्री तक्क नं पिदनाच्वंगु दु । थ्व हे झ्वलय् छुं ई न्ह्यः धुम थ्री व क्रीस थ्रीया खुब चर्चा जुल ।
आः जःलाखःला देय्या खँ त्वःते । थःगु हे देय्, थःगु हे मांभाय्या खँ ल्हाये । जःलाखःला देशय् सिक्वेलया रूपय् पार्ट थ्री पिदनाच्वंगु इलय् झीगु हे मांभासं छगू पार्ट थ्री पिथना बजारय् खनेदत । तर व संकिपा धाःसा मखु । भाजु रमेश ताम्राकारया लोकंव्हाःगु म्येचाः ककटेल नेवाः म्येया पंचक्वाःया स्वंगूगु ब्वः अर्थात पार्ट थ्री नं पिदंगु दु ।
रमेश ताम्राकारया म्हसिका ला स्वइत बियाच्वने माली धकाः ? वय्कः नांजाःम्ह व बांलाःम्ह म्येहालामि खः । नापं वय्कःया रिमिक्स म्येया म्येचाः ककटेल नेवाः म्येया पंचक्वाः नं उलि हे लोकं व्हाःगु म्येचाः खः । तर ककटेल २ धाःसा न्हापांगु ब्वः थें लोकं मव्हात धाःसां जी । आः धाःसा भाजु ताम्राकारं ककटेल १ व २ सिबें पाःगु, बिस्कं कथंया म्यूजिक अरेंजमेन्टलिसेंया ककटेल ३ पिथनादीगु दु ।
म्येचालय् मुक्कं न्हय्पु म्ये दु । अले म्यूजिक ट्राय्कय् म्ये हालेगु प्राय्क्टिस यायेयःपिनि नितिं थुगु म्येचालय् उगु न्हय्पुं हे म्येया लय्बाजं नं दु । नापं म्येचाःया द्यवलय् म्येग्वःत नं बियातःगुलिं म्येया प्राय्क्टीस यायेत झन अःपुका ब्यूगु दु । म्येचालय् दुगु म्येत मध्ये न्हापा न्हापा दबू दबुलिइ लोकं व्हानाच्वंगु म्येत नं दुथ्यानाच्वंगु दु । म्येचालय् दुथ्यानाच्वंगु म्येया दुने गुगुं मौलिक लय्या हे म्येत दु सा गुलिं म्ये हिन्दि म्येया लसय् हालातःगु म्येत खः ।
म्येचालय् हिन्दि संकिपाया लोकं व्हाःगु अले सदाबहार धयातःगु म्ये मेरा जुता हे जापानी लसय् नं म्ये हालातःगु दु । सुवर्ण शाक्यं च्वयादीगु न्हूगु पार्टि म्येय् देय्या बिसंगति व राजनैतीक दलया बांमलाःगु ज्यायात ध्याचू नकातःगु दु । अथे हे लोकं व्हाःगु नेवाः लोक म्ये असं त्वाःया दबू कुनय् नं दुथ्याकातःगु दु । थुगु म्येया अरेन्जमेन्टय् पाश्चात्य पहः ला बियातःगु दुगु हे जुल । नापनापं पाश्चात्य पहःया संगीत संयोजनय् नेवाः पहः नं बीगु कुतः यानातःगु दु ।
अथे हे न्हापा न्हापा भृगुराम थुज्वःपिं कलाकारपिन्सं नं दबुलिइ हालाः लोकं व्हानाच्वंगु म्ये छ न्हूगु हे छेँय् छन्हु वनीतिनि नं थुगु म्येचालय् दुथ्यानाच्वंगु दु । जनकवि दुर्गालालं च्वयादीगु गम्भीर पहःया थुगु म्ये बांलाः जू । बियाछ्वयेत्यंम्हेसित बियाच्वंगु सुवाः व उकी सुलाच्वंगु थःगु दुःख नं पिब्वयाः च्वयातःगु थुगु म्यें नुगःयात थ्यू । थुगु म्येत नापनापं म्येचालय् ‘भत्तिइ वने जि, थौंकन्हय् पथ्था, फेशनया चाल व यः लमि तता’ म्येत दुथ्यानाच्वंगु दु ।
म्येचाःया मेमेगु म्येत ओमकाजी ताम्राकार व अन्जना ताम्राकारं मुंकादीगु दु । यः लमि तता म्ये मदुम्ह लोकं व्हाःम्ह संगीतकःमि भाजु द्वारीकालाल जोशीं च्वयाः लसय् हनादीगु खः ।
म्येचाः दुनेया म्येया संगीत संयोजनय् न्हूगु पहः बीत स्वयातःगु खनेदु । थौंकन्हय् न्यनेदुगु नेवाः म्येत सिबें बिस्कं व न्ह्यइपु तायेदु । न्ह्याब्लें न्ह्याब्लें छ्यलाच्वनीगु बाजंत सिबें बिस्कं, पाक्क न्हून्हूगु बाजंया सः न्यंकेगु कुतः जूगु खनेदु । नापं नेवाः म्ये धालकि छगू हे कथंया संगीत संयोजन आपाः ताये दयाच्वनी । उज्वःगु संगीत संयोजनसिबें पाक्क म्ह्वः हे जक म्येत पिदनाच्वनीगु मध्ये थुगु म्येचाःया म्येत नं जूगु दु । म्येचाःया म्येत न्ह्यइपुसे च्वं, बांलाः जू ।
अथेखःसां म्येचाः दुनेया म्येय् छुं छुं खँय् भचा भिंकेमाःगु खनेदु । संगीत संयोजनया झ्वलय् आकस्टिक बाजं छ्यलातःगु खनेमदु । दक्वं सिन्थेसाइजरं हे अरेंज यानातःगुलिं उकिं संगीत संयोजनया ग्यसुयात भचा म्ह्वः धाःसा यानाब्यूगु दु । नापं म्येया मिस्किङ भचा बांलाक यानातःगु नं खनेमन्त । गनं गनं म्येहालामिया सः स्वयां म्यूजिक च्वय् लाःबलय् म्येग्वः थुइके थाकु थें जू । म्येचाःया द्यवः आकर्षक खनेदु । तर थुगु डिजाइन न्हापा हाकनं छक्वः २ म्येचालय् पिहांवये धुंकूगु जूगुलिं बांलाःसा म्येचाःया द्यवःया डिजाइन मेकथं हे जुइमाः धायेछिं ।
छुं छुं खँयात त्वःताः म्येचाःयात बांलाःगु म्येचाः कथं कायेफइ । ककटेल २ या चर्चा ककटेल १ ति मजूसां थुगु ककटेल ३ म्येचाः धाःसा न्हापाया स्वयां बिस्कं व न्ह्यइपुगु म्येया संकलन यानाः पिदंगु दु । थुगु म्येचाःयात नेवाः म्येचाःया धुकुतिइ बांलाःगु म्येचाः कथं नां कायेफइ । संगीतह्यमितय्त थुगु म्येचालं न्हूगु सवाः बीगुलिसें नुगः त्याके फइगु खनेदु ।
