नेपालया हे संगीत ख्यलय् म्येहालामि भाजु भीम तुलाधरया म्हसिका स्वइतं यिबा च्वने माली मखु । नेपालय् हे दक्कले न्हापां ब्यान्डया नामं एल्बम पिथनाद्यूम्ह वय्कः तुलाधर भाजुं छगू इलय् नेपालया संगीत ख्यलय् एक छत्र राज यात धाःसा छुं पाइमखु जुय । न्हापा न्हापा नेपाल टेलिभिजनया धकिमय् वय्कःया खस नेपाली म्ये ‘माया देउ माया गर’ छपु स्वयेत पियाच्वनीपिं ग्वाःग्वाः हे दुगु खः । व धुंकाः ‘अंगालौं अंगालोमा’, ‘मेरो त घरकि आमालाई एउटि बुहारीको खाँचो छ’, ‘दुइ दिनको यो जिन्दगीमा’, ’मुसुमुसु हाँसि मोहनि लगाउने’ आदि म्येत तसकं तसकं लोकं व्हात ।
वय्कःया नेपालभाषाया दक्कले न्हापांगु याकः म्येचाः ‘जः’पाखें नं तःपु हे म्ये लोकं व्हात । व धुंकाः वय्कलं आइजिन व बुद्ध दर्शन नामं नं नेपालभाषाया याकः म्येचाः पिथनादीगु दु सा खस नेपाली भाषं झिंन्यादँ न्ह्यः पिदंगु म्येचाः ‘सम्झना’ खः । ताः ईया दिपाः लिपा म्येहालामि तुलाधरया खस नेपाली भाय्या याकः म्येचाः अन्तराल पिदंगु दु् । झिंन्यादँ न्ह्यः सम्झना म्येचाः पिदने धुंकाः आः वय्कलं म्येचाः अन्तराल पिथनादीगु खः । ताः ईया दिपाः लिपा पिदंगु जूगुलिं हे थुगु म्येचाःया नां अन्तराल धकाः छुनागु भाजु तुलाधरं धयादी ।
म्येचालय् मुक्कं न्हय्पु म्ये दुथ्याकातःगु दु । उकिया नापं भाजु तुलाधरया म्ह्याय् मय्जु सुभेच्छा तुलाधरं सितार थानातःगु मालश्री फ्यूजन नं म्येचालय् दुथ्याकातःगु दु । उकिया लिसें म्यूजिक ट्राय्कय् म्येया अभ्यास याये यःपिनिगु नितिं प्यपु म्येया म्यूजिक ट्राय्क नं दुथ्याकातःगु दु ।
म्येचालय् दुथ्याःगु न्हय्पुं हे म्ये भाजु तुलाधरं हे हालादीगु दु । नापं न्यापु म्येय् वय्कः तुलाधर भाजुं हे लय् तयादीगु दु सा छपु म्येय् लोकं व्हाःम्ह म्येहालामि जेम्स प्रधानं लय् तयादीगु दु । मेगु छपु म्येय् अजयक्रान्ति शाक्यया लय् दु । म्ये च्वयेगुपाखे धाःसा हिराकाजी थापा, कविन्द्र शाक्य, काकाभाइ मानन्धर व अजयक्रान्ति शाक्यं थःगु च्वसा न्ह्याकादीगु दु । संगीत संयोजनया ज्या भुपेन्द्र बज्राचार्यं यानादीगु दु ।
म्येचालय् दक्कले न्हापांगु म्ये ‘मैले खेल्ने पखेरीमा’ न्यनेबलय् यइपुसे च्वं । म्येचाःया लय् व संगीत संयोजन तसकं ज्वंगु खनेदु । म्येग्वः नं बांलाः हे धायेमाः । म्येचालय् भाजु तुलाधरया पुलांगु लोकं व्हाःगु म्ये माया देउ माया गरया रीमिक्स भर्सन नं दुथ्याकातःगु दु । म्ये ला आपाःसिनं न्यनातःगु हे जुल । रीमिक्स यानातःगु नं बांलाः जू । दंदँ पुलांगु म्ये थुगु म्येचालय् न्यनेबलय् पुलांगु म्ये न्यनाच्वना थें भ्याः भचा हे मताः । तर संगीत संयोजनपाखे अझ अप्वः ज्या याःसा म्ये अझ हे बांलाइगु खःला धैथें ताः । हालातःगु ल्याखं नं म्येचालय् दक्कले बांलाक हालातःगु म्ये नं थ्व हे धायेफइ ।
भाजु तुलाधरया पुलांगु लोकं व्हाःगु म्ये ‘मेरो त घरकि आमालाई’ लुमंकीगु कथंया म्ये ‘आमाले सोधेनि’ जुयाब्यूगु दु । सेलो पहःया थुगु म्येया लय् पुलांगु नेवाः म्ये ‘सिन्तलि मैंचा जि नाप वःसा’यागु थें हे तायेदु । मेमेगु म्येयालिसें भीम तुलाधरया लोकं व्हाःगु नेवाः म्ये छं नं मतिना याना लाया रीमिक्स भर्सन नं दु । थुगु म्ये न्हापाया सिबें अझ न्ह्यइपुसे तायेदु । टेक्नो टाइपं संगीत संयोजन यानातःगु न्ह्यइपुसेच्वं ।
लय्या ल्याखं म्येचाःया आपाः धैथे म्येया लय् बांलाः । संगीत संयोजनया खँय् छपु निपु म्येय् छुं मगाःमचाः तायेदु । तर अप्वःथे म्येय् संगीत संयोजन बांलाः हे जू धायेमाः । गायन पक्षय् भाजु तुलाधरयाके न्हापाया सः तायेमदु । अथे धकाः हालातःगु बांमलाः धायेगु खँ मदु । तर अंगालौं अंगालोमा, माया, छं नं मतिना यानाला म्येय् तायेदुगु सः धाःसा थुगु म्येचालय् तायेमन्त । वय्कलं थःगु रीयाजयात निरन्तरता बियाच्वंसां वय्कःया फाय्नतय्सं वय्कःया म्यें अझ न्ह्यइपुके फइगु खः ।
म्येचाःया द्यवःया खँ ल्हायेबलय् द्यवलय् खास छुं हे यक्व खँत क्यनेत स्वयातःगु मदु । मिब्वाला थुज्वःगु खनेदु, अनं भाजु तुलाधरया प्यपाः किपा दु । द्यवः साधारण जू, तर बांलाः धाःसा खनेदु ।
अन्नपूर्ण क्यासेट सेन्टरं बजारय् हःगु थुगु म्येचाः बांलाः हे धायेफइ । ताः ईलिपा पिदंगु भीम तुलाधरया थुगु म्येचाः संगीतह्यमितय्सं लसकुस यायेबहःजू ।
भकुंग्वारा ख्याः
