बासु शाहीया निर्देशनय् पागलपन संकिपा तयार जुगु दु । थ्व सिबें न्ह्यः नं बासु शाहीया न्ह्यइपुसे च्वंगु संकिपा व्याहा याये म्हां पिहांवःगु खः । व्याहा याये म्हां स्वये धुंकाः बासु शाही पाखें छुं नं न्हूगु प्याखं वये धुंकाः व्याहा याये म्हा सिबें बांलाइ वा उगु प्याखं सरह हे न्ह्यइपुइगु अपेक्षा जुयाच्वनिं । पागलपन गुगु धारं न्ह्यानाच्वंगु प्याखं खः उकिइ बासु शाहीं कुतः बांलाना वनाच्वंगु हे खने दु ।
निम्ह सद्य तताक्येँ कथं रजनी शाही व रेना महर्जन दु । तर इपिं निम्हं तता क्येँहे सिबें पासापिं कथंया चरित्रण जुयाच्वंगु जक खने दु । तता क्येँहे जुइत गुगुकथं चरित्र निर्माण जुइ माः धकाः ध्यान बियातःगु खनेमदु । प्याखंया बाखं कथं रजनी व रैना क्याम्पस वैगु इलय् रुपेन थक्वायात मोटर साइकलं नकी । निम्हेसिया ल्वापू जुइ । तर रजनी व रुपेन हाकनं पासा जुइ । रजनीं रुपेनयात ययेका हइ । तर छन्हु रुपेन आकाझाकां हे बेपत्ता जुइ । रुपेनयात रजनीं मांवनी । रुपेन लुइ मखु । रुपेन लिहां वइ तर वं मेम्ह हे मिसा लिसे व्याहा याना हइ । थुकीं याना रजनी तसकं हे निरास जुइ । रजनीं थःम्हं रुपेनयात ययेकाच्वनागु खँ कनी । तर रुपेनं थःम्हं अथे छुं हे बिचा मयानागु धायेवं रजनी पागलपन (उर्इँसु) वयेका रुपेनया कलाःयात स्याये धकाः वनी । तर उबलय् रुपेनं रजनी पाखें थः कलायात बचे याइ । रजनीं आत्महत्या याइ । प्याखं क्वचाइ ।
तर नं प्याखंया न्हापांगु दृष्य लिपा भचा अतःमतः कं । नन्लिनियर स्टोरीलाइन कथं प्याखंया न्हापांगु दृष्य लिपा प्याखं फ्लाय्श ब्याकय् वंगु खने दु । तर प्याखं फ्लाय्श ब्याकं गुब्लें मूल बाखनय् लिहांवल धकाः लुइकेत धाःसा अलमल जूइ । प्याखंया न्हापांगु ब्व प्याखंया गुगु ब्वय् स्वाके धैगु मक्यं । प्याखंया बाखं नेपालभषाया संकिपा ख्यलय् बिस्कं कथंया खने दुसां हिन्दी संकिपा पाखें यक्व हे प्रभावित जुगु खंके फइ । प्याखंया स्क्रीप्तय् कलाकारया चरित्र निर्माणय् ध्यान बी मफूगु याउँक हे वाःचाइ ।रुपेन थाक्व छम्ह तसकं हे होनहारम्ह ब्वनामि कथं क्यनातःगु दु । तर वैगु हयेर स्टाइल स्वेगु इलय् छम्ह गुण्डा कथं खनेदु । चरित्र कथं कलाकरं थः दुबिने मफुगु धैगु निर्देशक लिसें कलाकार निम्हेसिया हे कमजोरी जुइ ।लिसें प्याखनय् अतःमतः क्यनिगुु छगू दृष्य नं दु । रुपेन व रजनी निम्हं पार्कय् च्वना आइसक्रिम नइगु दृष्य नं निम्हं दथुइ मतिना ब्वलंगु खने दु । तर प्याखनय् धाःसा रुपेनं थःम्हं अथे बिचाःमयानागु खँ लिपा तइ ।
प्याखनय् रजनीयात वया मांअबुं क्वथाय् कुनातल धकाः धाइ तर रुपेनया कलाःयात स्यायेत धाःसा डे«स चेन्ज याना याउँक छेँय् नं पिहांवनी । नांगा खुकुरी जँय् सुचुकाः रुपेनया छेँय् थ्यनी । स्यायेत ल्यूल्यू ब्वाँय् वनी । अझ रुपेनया कलायात ज्वने मफेयवं रजनीं गुण्डा तयेत फोन नं याना सःती । रजनीं सते तुं सुं गुण्डा ब्वाँय् वयेफुसा वैगु चरित्रयात अझ गुगु ढंगं न्ह्यब्वये माःगु खः व खँ प्याखंनय् खने मदु । उकिं प्याखंया बाखं बांला वा बामला लिसे स्वापू सिबें प्याखं धैगु स्क्रीनप्ले बांलातकी तिनि हे बांलाइ धैगु नं वाःचायेके माः ।
तर थ्व बाहेक पागलपनया तारिफ यायेबहगु खँत नं दु । प्याखंया रुप बिइत थुकी निपु म्ये नं दुथ्याकातःगु दु । निपुं हे लोकंह्वाःगु म्ये रामकृष्ण खड्गीं च्वयातःगु मतिना जाःगु मिखां व निर्मल रत्न शाक्यया जिगु मिखाया न्ह्योने नं दु । जिगु मिखाया न्ह्योने म्येया आतक्कया थ्व स्वंगूगु औपचारिक भिडियो खः । संभवत थ्व नेपालभासाया संगीत ख्यलय् छपू हे म्येया स्वपू भिडियो दयेकुगु न्हापांखुशी जुइमाः ।
समग्रय् बिस्कं धारया प्याखं धायेकेत थुगु प्याखंया कुतः ताः लाः । संवाद सशक्त मयासे वा सामान्य संवाद जक हे तयाः ब्याकग्राउण्ड स्कोर पाखें यक्व हे धायेकेत स्वयाच्वंगु नं थुगु प्याखंया एक्सपेरिमेन्टल जुगु खंने दु । डायलग सिबें ध्वनी पाखें प्याखं न्ह्याकेगु कुतः थुकी जुयाच्वंगु खने दु ।
पागलपन नां न्यनिबलय् हे थ्व हिन्दी प्याखं खः वा नेपाली प्याखंया नां थें च्वं । अथेनं थ्व छगू नेवाः संकिपा । बिस्कं धारया नेवाः प्याखं दयेकेगु कुतः याःगु हे जुइमाः उकिं थुगु प्याखंया नां हे पागलपन धकाः छुनातल । पागलपनयात नेवाः भासं वेँय्सु वा उईँसू धकाः धायेज्यु । प्याखंया बाखँया कथं थुगु प्याखंया नां छुत धाःसा थुकीयात उईँसू धकाः धाये छिं ।
भकुंग्वारा ख्याः
