संकिपा धैगु मनोरंजनया निंतिं खः । बछलागा सप्तमीया भुखाय् लिपा पिदंगु न्हापांगु संकिपाया रूपय् पिदंगु नेवाः संकिपा खः जि यःम्ह पासा । प्याखंया नां कथं जक नं बिचाः याये अपुकी थुगु प्याखं धैगु हे सुं थः यःम्ह पासाया बारे जुइ मा । जुइ हे माः । नां हे जि यःम्ह पासा । तर प्याखं स्वया वन धाःसा थुकी हरेक कलाकारया म्हुतुइ जि यःम्ह पासा धैगु थेगो कथं हे वइ । न्ह्याम्हेस्यां नं न्ह्याम्हेसित नं जि यःम्ह पासा धकाः सःति । प्याखंया टाइटल हे जि यःम्ह पासा जुसेंनिं डाइलग पतिकं हे जि यःम्ह पासा धकाः पात्रया म्हुतिइ घाकेगु पाय्छि जुइफु । तर थुगु लेख च्वत्तले हे जि यःम्ह पासा धकाः थ्वःकः मछि च्वयेधुनकी साय्द ब्वंपिंत हे दिक्क चाल जुइ मा । तर प्याखनय् धाःसा दक्वसिया म्हुतुइ हे जि यःम्ह पासा ।
यदि थ्व छगू मतिनाया बाखँ जुगु खःसा थ्व थेगोयात सहयायेफइगु शक्ति दइगु जुइ । तर थ्व प्याखँया बाखँया सारंशजक न्यन धाःसा नं सुया यःम्ह पासा धकाः न्ह्यसः ब्वलनिं जुइ ।
प्याखंया शुरुवात हे रुना महर्जनयात वया दाजुं कलेजया अन्तिम दिन जुगुलिं ल्हाः ज्वना सात्तु साला यंकीं । प्याखंया अनुसार मचां निसें (२० बर्ष) निसें रुनायात शहरय् तयाः ब्वंका तःगु जुइ । तर रुपिन डंगोलं धाःसा वैत गन यंकल वा वया गां गन धकाः सिइमखु । वया जि यःम्ह पासाया थाःगा मालेगु निंतिं पालेयात घुस नकाः रेजिस्टर कापि स्वयाः वयाः यःम्ह पासायात पासाया गांमय् मांवनी । तर व गांमय् व वं थी थी घटनाक्रम त न्ह्याना वनी । रुपिनयात खनेवं हे छम्ह मिसां जंगलय् हे ययेकी । प्याखंया छम्ह प्रड्युसर ललिता महर्जनया रुपिन जि यःम्ह पासा जुइ । रुपिनयात छु खना ययेकल धकाः छुं हे थुइके मफू । अन गामय् धाःसा हाकनं जमिन्दारं डाँकात लिसे मिले जुयाः तस्करी याइगु जुयाच्वन । व डाँकात तसकं खँुखार । रियल लाइफया फोटोग्राफर ओम लाल अकेला रील लाइफय् नं ओमलाल अकेला हे जुयाच्वनि । छम्ह पत्रकार कथं चित्रित याना तःगु ओमलालया समाचार जंगलय्या बिचय् ब्रोडशीटया नेपालभासाया पत्रिकाय् पिदनी । संयोग वश अवलय् हे ओमलाल अकेलां इपिं खुखार डाँकातय्गु किपाः कयाच्वंगु खंकी । लेखकं ब्यूगु निगु लाइन हे न्वाके बिइवं ओमलाल यात जंगलय् गोलिं कयेका स्याना बी ।
रुपिन डंगोलयात खनेवं हे गांयापिं मनूत ग्याइ । सकस्यां वैत भूत धकाः ताय्की छाय्की २० बर्ष न्ह्यः रुपिनया ख्वाः ज्वलाःम्ह मनू अन गामय् सीगु जुयाच्वन । रुनाया ख्वाः ज्वलाःम्ह नं सिगु जुयाच्वन । निम्हेसिया पुनर जन्म खःकी इपिं भूत खः धकाः गामय् च्वंपिं सुला सुला ग्याना ग्याना बिस्यु जुइ । तर हितिइ फयातःगु लः घः ज्वना वनेवं इमिगु ल्यू ल्यू वना रुपिन व रुनाया मां व दाजुया न्ह्योने इपिं मनू खः धकाः सिइकी । छगू सस्पेन्सया अन्त जुइ । थ्व हे झ्वलय् रुनाया भिंचा नापलाइ । वैत नं रुपिनं जियःम्ह पासा धकाः धाइ । हरेक पात्रया निक नेम हे जि यःम्ह पासा खःला थे ताइ ।
रुपिन गामय् वया रुनाथाय् च्वनिं । रुनाया दाजुं रुपिनयात गांया ज्या याकी । रुपिनया मतिनाया परिक्षा काइ ।करुवां जाय्क गिलासय् लः फयेकी अले लः मवाकुसे रुनाथाय् तक थ्यंके फुसा वया मतिना सच्चागु मतिना खः धकाः धाइ । मतिना लनेगु तरिका थज्योगु नं जुइ धकाः जि यःम्ह पासाय् तिनि सिइदत ।
जंगलय् जक चाःचाःहिलाच्वंनिम्ह ललितायात देव महर्जनं खंका इज्जत लुटेयायेत. स्वइ । रुपिनयात खनेसातकं ययेकुम्हेस्यां देवयात धाःसा खनेसातकं ययेकी मखु । रुपिनं इज्जत बचेयाइ तर ल्वाल्वां हे हाकनं डाइलग बाजी जुइ । निम्ह थःथःगु लँय् वनी ।
गांया सांस्कृतिक कार्यक्रम जुयाच्वनीगु इलय् गांया मनू सिबें प्याखं हुलाच्वंपि यक्व खनेदु । तर प्याखनय् धाःसा गांया मनूत हे खंके थाकू । तर प्याखंया न्ह्यइपुगु पक्ष धाःसा अझं ल्यंदनी । रुपिनं अन्तय् थःगु रहश्य प्वली की व छम्ह सिआइडि हँ…..
जि यःम्ह पासा दुने थुलि जक अतःमतः मखु अझ रुपिनयात गांया जमिन्दारं ज्वना शोलेया दृष्य थे सिमाय् चिनां चिकेन रोष्टयाना बाजं थाना म्ये हाली । थुलि मछि भद्रगोल बाखं दुने जि यःम्ह पासा गन दु धकाः माला जुइ मा ।
