जीवनलाल मास्के धइगु नां सुइतं म्हसीका च्वनेमाःगु नां मखयेधुंकल । वय्कलं संगीत ख्यलय् यक्व हे श्रृजना बियादीध्ुंकल । अझ नेवाः संगीत ख्यलय् ला यक्व हे झन हे तःधंगु योगदान दु । नेवाः संगीत ख्यलय् वय्कःया याकः लसय् तःगु हे म्येचाः लिसें म्यूजिक भिडियो चाःतक्कं पिदनेधुंकल । वंगु छुं ईया दथुइ विदेश च्वनेगु झ्वलय् नेपाःया संगीत ख्यलय् वय्कःया न्हूगु संगीत तायेमदुगु खः । तर वय्कः थौंकन्हय् नेपालय् हे दी । नेपालय् च्वनेगु झ्वलय् वय्कलं छगू मेगु न्हूगु म्येचाः संगीत ख्यःयात बियादीगु दु । वय्कलं थःगु याकः लसय् ‘जीवनको यात्रा’ नांया न्हूगु नेपाली म्येचाः छचाः पिथनादीगु दु ।
लय्चिनामि भाजु मास्केया झिगूगु याकः म्येचाः कथं पिदंगु थुगु म्येचालय् मुक्कं झिपु म्ये दुथ्यानाच्वंगु दु । दक्वं हे म्येय् लय् लय्चिनामि भाजु जीवनलाल मास्कें हे बियादीगु दुसा निपु म्ये वय्कलं च्वया नं दीगु दु । म्येचाःया मेगु च्यापु म्ये मय्जु संगीता श्रेष्ठं च्वयादीगु दु । म्येय् संगीत संयोजनया ज्या जीवित जल्मी, हरिशरण साय्मि, दिपेश सिं व बालकृष्ण बंशीं यानादीगु दु ।
म्येचाःया झिपु म्येया दुने दक्कले न्हापांगु म्ये ‘तिम्रो प्रेम’ नांंजाःपिं म्येहालामिपिं उदय सोताङ व मनिला सोताङया ज्वःम्ये खः । गायनया ल्याखं वय्कःपिनिगु बारे छु धयाच्वने माल धकाः । वय्कःपिनिगु यइपुगु सलं म्ये न्यनेबलय् आनन्द ब्यू । थुकिया लिसें म्येचालय् मेगु छपु नं ज्वःम्ये दु । दिपक स्वप्निल व निशा देशारं हालादीगु ‘यसरी नै सधैं सधैं साथ जीउन पाउँ’या म्येग्वः, लय्, संयोजन व गायनया रोमान्टिक मूडया तालमेल ज्वं । थुगु म्येया न्हापांगु अन्तरा धु्ंकाः बिट हिलातःगु इन्टरल्यूड पिसं धाःसा म्येया रोमान्टिक फ्लोयात ब्रेक यानाब्यूगु थें ताः । संगीत संयोजकं अथे मयाःसां ज्यूगु थें च्वं । उकिया नापं नांजाःम्ह म्येहालामि निशा देशारया सोलो म्ये ‘तिमिसँगको यो लामो सफर’ नं म्येचालय् दुथ्यानाच्वंगु दु ।
म्येचाःया टाइटल म्ये ‘जीवनको यात्रा एक्लो एक्लो छ’ न्यने न्ह्यइपू जु । क्लासिकल पहः दुगु थुगु म्येयात धनबहादुर गोपालीजुं नं बांलाक हालादीगु दु । नापं थुगु म्येय् तबला थानातःगु न्ह्यइपुसेच्वं । म्येग्वः दार्शनिक पहः वः । म्येग्वलं जीवन दर्शनयात न्ह्यब्वयेत स्वयाच्वंगु नं बांलाः धायेमाः । तःम्ह म्येहालामिया गायनया भेराइटि न्यनेदइगु थुगु म्येचालय् मय्जु संगीता शाक्यया छपु म्ये नं दुथ्यानाच्वंगु दु । वय्कलं हालादीगु ‘पहिलो पहिलो माया’ नं बांलाः जू ।
नेवाः संगीत ख्यलय् थौंकन्हय् नांजाःम्ह म्येहालामि दिपा महर्जनया निपु म्ये म्येचालय् दुथ्यानाच्वंगु दु । वय्कलं हालादीगु ‘तिमिसँग केवल एउटै प्रश्न छ’या संगीत संयोजन तसकं बांलाः तायेदु । दिपेश सिंहं संयोजन यानातःगु थुगु म्येया गितारवक्र्स नं च्वछायेबहःजू । तर दिपाया हे मेगु म्ये मान्छेहरुलाई विश्वास गरुं कसरी धाःसा म्ये बांलाःसां म्यूजिकं यक्व हे थासय् सः त्वपूगुलिं न्यनेबलय् कचिलाय् क्वँय् न्ह्यः थें जू । रत्नशोभा महर्जनं हालातःगु म्ये ‘कहिले त बुझ यो मनलाई’या लय् व संगीत संयोजनया तालमेल मिले जू । पप लिसें आधुनिक पहः तायेदुगु थुगु म्येया लय्लिसे ज्वःलाक्क हे संगीत संयोजन यानातःगु दु ।
श्रेया सोताङं हालातःगु म्ये ‘मेरो दिल आज यो के चाहन्छ’ न्यनेबलय् वय्कःया गायन शैलीइ पप पहः तायेदुसा लसय् आधुनिक पहः । अथे हे थुगु म्येयात जीवित जल्मीं फिल्मी पहः बियादीगु दु । थुगु स्वताजि पहः छथाय् मुंवःबलय् म्येयात धाःसा न्ह्यइपुसे च्वंकाब्यूगु दु । अथे हे फास्ट बिटया सुरेन्द्र श्रेष्ठं हालातःगु ‘मलाइ मेरो माया लाग्छ’ न्यने नं न्ह्यइपुस्से च्वं ।
म्येचाःया द्यवः डिजाइन नांजाःम्ह डिजाइनर अनिल स्थापितं यानादीगु दु । न्ह्यःनेया द्यवः सिम्पललिसें आकर्षक जू । न्ह्यःनेया द्यवलं मिखायात सिच्चुसे च्वंकू । तर ल्यूनेया ब्वय् अनिल स्थापित लुयामवः । बांमलाःगु मखु, अनिल स्थापितजुया डिजाइनय् दइगु एक्पेक्टेशन धाःसा मिट मजूगु पक्कां खः । लिसें म्येचाःया नां ‘यात्रा जीवनको’यात अंग्रेजी भाषं पाथ अफ लाइफ धयातल । थनथाय् यात्रायात पाथ धायेगु स्वयां जर्नी खँग्वः हे ज्वं थें च्वं ।
समग्रय् खँ ल्हायेबलय् म्येचाः बांलाः हे धायेमाः । जीवनलाल मास्के संगीत ख्यलय् यक्व हे अनुभव दयेकेधुंकूम्ह संगीतकःमि जूगु ल्याखं नं खइ, म्येचालय् कुंखिनेमाःगु खास हे छुं मदु धाःसां ज्यू । अय्लाः लूवःम्ह भम्चाया ग्वालि तज्याः धायेथें जुइसां छता निता धाःसा धाये हे माःगु खँ दु । म्ये न्यनेबलय् गनं गनं म्येच्वमिं नेपाली खस भाषाय् बोलीचालि मदुगु हिन्दि खँग्वःत नं छ्यलातःगु दु । अज्याःगु खँग्वःत न्यनेबलय् भचा मछिं थें मछिं थें जू । अज्याःगु हिन्दि खँग्वःया थासय् नेपाली खँग्वः हे जूसा झन हे बांलाइगु खः । अले म्ये न्यनेबलय् गनं गनं म्येया लय्लिसे म्येग्वःयात मात्रा ज्वःमलाःगु थें नं तायेदु । अथे जूबलय् म्येहालामियात खँग्वः कायेत मछिंगु थें तायेदु । अथेजूगु थासय् बरु हे खँग्वः छ्यलाः मात्रा मिलेयाःगु सा म्येया फ्लोयात डिस्टर्व मजुइगु खइ । गुगु गुगुं म्येय् मिक्सिङ बांलाक मजूगु तायेदु । थज्याःगु छता निता हे जक भिंकेमाःगु थें तायेदुगु पक्षत बाहेक म्येचाः बांलाः हे धायेमाः ।
