योगेश वैद्य – नेवाः संगीत ख्यलय् जक मखु, नेपाःया हे संगीत ख्यलय् स्वइतं म्हसीकाच्वने माःगु नां मखु । नेपाली सुगम संगीत ख्यलय् ताः ई न्ह्यवःनिसें मदिक्क बांबांलाःगु म्ये हालाः योगदान बिया वयाच्वनादीम्ह वय्कःया बारे स्वइतं कनेमाःगु हे मखुत । योगेश वैद्यया नां कयाकथं सपना भुलाई सारा, कति प्यासी छ जिन्दगी, आँखैमा रात गली, यो लामो लामो जीवनमा किन म हतास हतास छु लिसेंया म्येनापं नेपालभाषाया म्येत छं मिखा पर्लक्क चायेकाः, जिमि यःम्ह थौं जिथाय् वइ थुज्वःगु आपालं म्येत झीत लुमना हे वयेधुंकी । यइपूगु सःया तःमि योगेश वैद्यःया न्हूगु म्येत न्यनेमखनाच्वंगु नं छुं ई दय्धुंकल । योगेश वैद्यया न्हूगु म्ये न्यनेत पियाच्वंपिं फाय्नतय्गु नितिं छगू बांलाःगु खबर दु । पुलां पुलांगु नेवाः म्येयात योगेश वैद्यं हाकनं हालाः फर्गटन मेलोडि नांया म्येचाः बजारय् पिदनेधुंकल ।
संचारकःमि लिसें संगीतकःमि रीता महर्जनं थुगु म्येचाः पिथनादीगु खः । म्येचालय् मुक्कं झिपु म्ये दु । दक्वं हे म्ये योगेश वैद्यं हे हाला जक दीगु मखु, न्हय्पु म्येय् लय् नं तयादीगु दु । छ न्हूगु हे छेँय्, यः जितः, अले धरती जितः छं थुगु स्वपु म्ये रीता महर्जनलिसे ज्वःम्ये दु । अथे हे निपु म्ये अफशोच जिं छु स्यू व थ्व समाजया मिखाय् म्येया लय्चिनामि नातीकाजी श्रेष्ठ खःसा छपु म्येय् रीता महर्जनं लय् तयादीगु खः । अथे हे म्ये च्वयेगु ज्या नेवाः साहित्य ख्यलय् ख्वबिलु धकाः म्हस्यूम्ह जनकबि दुर्गालाल श्रेष्ठं यानादीगु दु । सःतिरे छं जितः म्ये छपु धाःसा भूषणप्रसाद श्रेष्ठं च्वयादीगु दु । झिपु मध्ये च्यापु म्येया संगीत संयोजन सन्तोष महर्जनं यानादीगु दुसा म्ये हाले जिं व सःति रे छं जितः थुगु निपु म्येय् जिवित जल्मिया संगीत संयोजन दु ।
न्हापा न्हापा थीथी दबुलिइ हालातःगु पुलां पुलांगु नेवाः म्येयात न्हूगु हे रेकर्डिङ यानाः थुगु म्येचाः पिथंगु खः । म्येचाःया म्येया खँ ल्हायेबलय् दक्कले बांलाःगु व बल्लाःगु पक्ष धयागु ला सः हे जुल । म्येहालामि योगेशया सः ला सकसिनं ययेकातःगु हे सः खः । वय्कःया यइपूगु व झ्यातूगु सःया लिसें सलय् तायेदुगु फिलिंग्सं म्ये न्यनांच्वने थें दयेकाब्यु ।
छपु छपु यायां न्यनेबलय् प्रत्येक म्येया लय् यइपुस्से च्वं । संगीत व संगीत संयोजनया तालमेल नं बांलाः खनेदु । म्ये न्यनाच्वनबलय् आनन्द वः । बहनी अथवा सुनसान इलय् म्ये न्यनेबलय् म्यें झुमिं यंकू । आपाः धइथे म्ये गजल पहःया जूगुलिं गजलया पारखीतय्गु नितिं नं नेवाः संगीत ख्यलय् छगू बांलाःगु सवाः जुइगु निश्चित खः ।
म्येचाःया मेगु बांलाःगु पक्ष धइगु म्येग्वः खः । जनकवि दुर्गालाल श्रेष्ठया च्वसां पिज्वःगु खँग्वःत बांमलाइगु ला खँ हे मन्त । मतिनाया, विरहया, दार्शनिक पहःया, देशभक्तिं जाःगु थीथी भावया म्येत जनकविं च्वयादीगु दु । म्येचाःया दक्व हे म्येया म्येग्वःत सशक्त जुयाः नं दक्कले न्हापांगु ल्याखय् दुगु म्ये ‘अपशोच ! जिं छु स्यू हा ! थय् नं मनूत सीयः’ यागु म्येग्वः धाःसा अझ न्ह्यथनेबहःजू । थः सीगु अले थः सिथं यंकूगु तकया कल्पना यानाः म्ये च्वयेगु धइगु अःपूगु ज्या धाये फइमखु । म्ये हाले जिं, न्ह्यः वयेकि म्ये चिसलं हायेकाः मिखा तिसिनाः न्यनाच्वन धाःसा ला धात्थें हे आनन्दं न्ह्यः हे वइजुइ । म्येग्वःया भावलिसें लय् अले लय्लिसें संगीत संयोजक थवंथवय् क्वात्तुक्क ज्वनाज्वंगु दु ।
म्येचाःया दक्वं हे म्ये बांलाः तर, छता निता खँय् छुं छुं भिंकेमाःगु खःला धइथें नं ताः । रीता महर्जनया सः नं बांलाःगु हे खत । वय्कलं ला निक्वःगु पेजथ्री नेपालभाषा पिपुल्स च्वाइस अवार्डय् दक्कले बांलाःगु मिसा सः विधाय् अवार्ड हे त्याकादीगु दु । अथेसां योगेश वैद्यलिसे वय्कःया सः या केमेस्ट्री गुलि दये माःगु खः उलि मदु । अझ यः जितः म्येय् रीता महर्जनयात म्ये हालेत थाकूगु खःला धइथें हे ताः । हाइ स्केलय् थाकुक मफु मफु हालातःगु थें तायेदु । अथे हे म्येचाःया छपु छपु दत्तले बांलाःसां, दक्वं म्ये नापनापं न्यनावनेबलय् ननस्टप म्ये न्यनाच्वनागु थें च्वनावः । अलग अलग म्येया भेराईटी धाःसा खनेमन्त । दक्वं म्ये छगू हे कथंया तायेदत । छखे प्रेम सिखः व जितः लुमंकाः ख्वबि तिकिनंकाः थुगु निपु म्ये धाःसा फरक तायेदु ।
समग्रय् धायेमाल धाःसा म्येचाःया दक्वं हे म्ये दक्वं हे बांलाः । नेवाः संगीत ख्यःया धुकुतिइ छगू ग्यसुलाःगु सम्पत्ति जूगु ‘फर्गटन मेलोडि’ । दुर्गालाल श्रेष्ठया च्वसाय् योगेश वैद्यया लसय् वय्कःया हे सः न्यनेदुगु नं छगू न्ह्यइपूगु पक्ष खः । थुकथंया स्तरीय म्ये काचाक्क धयाकथं न्यने दइमखु । फर्गटन मेलोडिया रूपय् थुकथंया म्ये न्यनेदुगु नं झीसं बांलाःगु व्हःताः हे कथं कायेमाः ।
विराजकाजी राजाेपाध्याय
