नेवाः भाषां म्ये हालेतुं हे व नेवाः म्ये जुइ की मजुइ ? छगू चिन्तन याये बहःगु खँ थ्व खः । झीगु थःगु मौलिक लिपि, मौलिक भाय् अले मौलिक संस्कृति आदी इत्यादि फुक्क हे मौलिक दयेधुंकाःनं मौलिक नेवाः म्ये गज्योगु जुइमाः धकाः सकस्यां छक्व बिचाः यायेमाः । अकसर हे नेवाः म्ये धकाः गननं परिभाषा वा परिचय् बिइमालकी हे झीसं राजामति कुमति म्येयात नालाच्वंगु दइ । थुगु म्ये लोकंह्वाःगु कारण हे थ्व लोक म्ये खः । लोकंह्वाःगु थुगु लोक म्ये गनं वल, सुनां हाल धकाः न्ह्याब्लें हे बैचारीक मतभिन्नता पिहांवयाःच्वं तर झी दथुइ हे थम्हं च्वगु म्येयात लोकम्ये कथं लोकंह्वाःकुम्ह छम्ह श्रस्टा जगमोहन वाःमिया बारे थौंया पुस्तां उलि बांलाक्क मस्यु ।
जगमोहन वामि छम्ह म्येहालामि अले संगीतकार नं । वयेकया थी थी म्येचाः मध्यः तसकं हे लोकंह्वाःगु छचाः म्येचाः वाःमिया दबू डिजिटाइजयाना सिडिइ पिहांवःगु दु । थौंतक्क नं दक्वस्यां हे जगमोहन वाःमिया धालकी हे झिंन्यान्हु मानी ब्याहायायेगु झिलमिल स्वांमां क्वखायेगु म्ये छपू लुमंकी । सायद जगमोहन वामिया दकलय् लोकंह्वाःगु म्ये हे थ्व थें ताइ । तसकं हे न्ह्यइपुसे च्वंगु अले नासलं ल्युगु रोमान्स नं उतिकं हे दुगु, संस्कार व सस्कृतिया झलक दुगु थुगु म्ये खः । थ्व म्यें न्यनकी हे सकस्यां थःथःगु ब्याहाया ई छक्व लुमंकी । ब्याहा मजुपिंसं ब्याहायाये न्ह्यः गज्योगु उत्साह दइ धकाः लुमंकी सा ब्याहा जुइ धुंकुुपिंसं थःपिंसं ब्याहा याये झिंन्यान्हु न्ह्यः छु यानाच्वना जुइ धकाः लुमंकेत स्वइ । युगौं न्ह्यःया थुगु म्ये थें च्वं तर नं थुगु म्ये न्यंसा निसें थ्व पुस्ता सिबें न्ह्योंने नं उतिकं हे गुणगुने जुयाच्वंगु म्ये खः सा थ्व पुस्तां नं थुगु म्ये ययेकाच्वंगु हे दु अले वइगु पुस्तां नं थुगु म्ये मयेकी धैगु गनं शंका याये थाय् मदु । थज्योगु म्ये अमर जुइ । गुब्लें पुलां जुइ मखु । थ्व क्लाय्सिक जुइ । तर थुगु म्येचालय् थ्व हे छपू जक लोंकंह्वाःगु म्ये मखु । यक्वस्यां मस्युजुइमा की ख्यालि जुजु मदनकृष्ण श्रेष्ठं हालातःगु छं दुःख स्युगु खना जिगु नुगः हील मिसा.. पासा छम्ह हयेला छन्त ज्युला मज्युला नं जगमोहन वाःमिं च्वयादीगु खः । अथे तुं म्हुतुइ छता मनय् छता याये मते सिन्तलि तताः..रमेश ताम्राकारं हालातःगु म्ये नं वयेकया हे रचना खः ।
थुगु म्येचालय् मेमेगु कर्णप्रिय म्येत नं उतिकं हे दु । उखेंमला थुखें मलाः रमेश ताम्राकार व ज्ञानुराणां हालातःगु म्ये, लेजेण्डरी म्येहालामि योगेश बैद्यया ज्ञानी मय्जु झीगु खँ थौं क्व हे छिना छ्वये, मदनमोहन वामि, रत्नमान व मैंया प्रजापतिया बागः मिखां स्वयेमते, तारादेवीया चा हे मचायेक बैंसया रंग, बिजय नारायण मानन्धर व संगीता शाक्यया भ्वये वनां वःम्ह मैंचा, जुजुकाजी रंजीतया मैं धाय्ला मय्जु धाय्ला ? अले मैंया प्रजापतिया साझवाः हाकुचा दु ।
थुकी म्ये हालादीपिं सकलें हे थौंया इलय् तसकं हे वरिष्ठ व लेजेण्डरी म्ये हालामिपिं जुइधुंकल । म्ये हालीबलय् गज्योगु कथंया सरलता लिसें गज्योगु भाव दयेमाः धकाः थुकी दुगु हरेक म्यें कनांच्वंगु दु ।
थुगु म्येचालय् भिंmन्यान्हु मानी ब्याहा यायेगु म्ये बाहेक दक्व म्येया लय् कृष्णमानं चिनादीगु दु । झिंन्याहु मानी ब्याहा यायेगु म्ये धाःसा जगमोहन वाःमिं हे चिनादीगु दु । उगु ईया लकस कथं हे थुकी च्वंगु म्ये फुक्कं हे लाइभ अर्केस्ट्रा थाना हालातःगु खःसा लय् फुक्क धैथे हे नेवाः पहया दु । थुकी दुथ्यानाच्वंगु फुक्क हे म्ये नेवाः पहःया म्ये कथं नाले छिं छाय्धाःसां थुकीया म्ये ख्यालि पह दु । नासलं ल्यू । रोमान्स उतिकं दु । संगीत फुक्कं हे कर्णप्रिय जू । म्येया भावयात थुइका सकल गाय्क पिंसं म्ये दुनां हालाच्वंगु ताय्के फु ।
धात्थें धायेगु खःसा थुगु म्येचालं नेवाःम्येया पहिचान गथे जुइमा धकाः परिभाषा बियाच्वंगु दु । सकल नेवाःतय्सं थुगु म्येचा न्याना थःगु म्येचाधुकूया शोभा अप्वेकेत स्वयेमाः ।
