नेपालभासाख्यलय् दम्भ दु । जिं थथे याना । जिं मयाःसा सुनां याइ । जिं याना ला जूगु खःनिं । जिमिसं थथे यानाच्वना जिमिसं अथे यानाच्वना धकाः हालाच्वनिं । तर न्ह्याथे न्ह्याक्व हालाच्वंसां जब तक्क थुकीया लिच्वः सामान्य रूपं खने दइमखु तब तक्क खँ जक न्यायेका च्वनेथें जुइ। थौंया स्थीतिइ धायेगु हे खःसा नेपालभासा ख्यलय् छुं कथंया थोस लिच्वः वया च्वंगु मदु । नेपालभासा ख्यःया खायुगु यथार्थ खः ।
सामाजिक संजालय् खने दुगु छता खँ । त्रिभुवन विश्वविद्यालय अन्तर्गत आर आर क्याम्पसय् १०म्ह सिबें म्हो नेपालभासा ब्वनिपिं जुल धाःसा क्याम्पसं नेपालभासा हे ब्वंकेगु लिकायेगु हँ । तर थ्व खँ चर्चाया बिषय जुइ फयाच्वंगु मदु नेपालभासाया बौद्धिक जगतय् नं अले नेपालभासा ख्ययाः कार्यकर्ता तहगतय् नं । छाय् चर्चा मजुल धैगु तकं नं चर्चा मदु ।
आर आर क्याम्पस स्वनिगः दुने या क्याम्पस खः । नेपालभासा अध्यापन जुइगु छगू क्याम्पस खः तर नेपालभासा ब्वनिपिं मदयाः झिम्ह सिबें म्हो जुसा कलेजं ब्वंके मखुत धैगु तर्क तयाच्वंगु दु । स्वनिगः दुने नेपालभासा कयाः ब्वनिपिं झिम्ह हे विद्यार्थी मदु धैगु खँ तसकं हे संवेदनशील विषय खः ।
प्रदेशीय संरचनाय् वने धुंकाः नं नेपालभासायात थुकथं अवहेलना यायेगु वातावरण ब्वलनाच्वंगु धैगु हे नेवाः न्ह्यलुवाःतय्गु नालायकीपन खः । बौद्धिक वा एकेडेमिक संस्थाय् च्वना नीतिगत रूपं नेपालभासाया कोर्षया अपडेट मयायेगु वा नेपालभासा ब्वनांनं थःगु तुतिइ चुइफइगु लकसया नितिं पहल मयाइगु खःसा अज्योगु बौद्धिक संघसंस्थाया नं छुं ज्याखँ वइ मखु । स्वनिगलय् नेवाःतय्गु भुमिइ दनाच्वंगु क्याम्पसं नेपालभासा ब्वंके फइमखु धायेगु थौंया इलय् हरेक नेवाः संघसंस्थाया निंतिं हाथ्याया बिषय खः ।
संघसंस्थाया पदाधिकारी, नेवाः संचारकःमिपिंसं थौंया स्थीतिइ नेपालभासा ब्वने हे माः धैगु प्रावधान हयेगु नं आवश्यक जु । नेपालभासाय् ब्याचलर्स पासयापिंत नेपालभासा ख्यलय् गथेकी टिभि, एफ एम, पत्रपत्रिका, एम सि इत्यादी थासय् विशेष प्राथमिकता बिइगु ज्याखँय् प्रात्साहन बिइगु हथाय् जुइ धुंकल । नेवाः कलाकार लिसें नेवाः संकिपाःकःमिपिंसं नं बिशेष रूपं नेपालभासाया अध्ययन यायेगु आवश्यक जु । प्याखनय् न्ववाइगु संवादया शुद्धता लिसें म्ये हालेबलय् माःगु शब्दया ज्ञान फुक्कं हे नेपालभासाया अध्ययन याःसा जक हे सइ ।
एकेडेमिक व नन्एकेडेमिकय् फरक छुटेयाययेगु झीसं मफुनी अले मसःनिं । थथे मसःतले नेवाःतय्गु विकास जुइ मखु मात्र नेवाःतय्गु आडय् न्ह्याकाच्वंगु संघ संस्थाया जक हे ‘विकास’ जुइ ।
