न्ह्यखँ
नेवाः म्येचाःया धुकुतिइ न्हूगु नां छगू तँसा वःगु दु । थुगु म्येचाः नेवाः संगीत ख्यःलिसें नेवाः कला ख्यःया नितिं तकं विशेष नं जुयाब्यूगु दु । गुकथं ले धायेबलय्, नेपाःया हे कला ख्यलय् थौंया दिनय् तक नं मिसा कलाकारपिनिगु उपस्थिती म्ह्वः हे धायेफु । उकीसनं नेवाः कला ख्यलय् ला झन हे म्ह्वः । नेवाः संगीत ख्यलय् स्वल धाःसा मिसा म्ये हालामिपिं छुं छुं ल्याखय् दु । तर मिसा लय्चिनामि ला ल्हाःया पतिनय् ल्याःखायेफइ । उकिया दथुइ नेवाः संगीत ख्यलय् छम्ह मिसा म्येहालामिलिसें लय्चिनामि कथं पिलूवःगु दु, देवकुमारी खड्गी । थःगु याकः सःया लिसें याकः लसय् वय्कलं थःगु न्हूगु म्येचाः पिथनादीगु दु, ‘जिगु मनया यःम्ह’ । लिसें वय्कलं थुगु म्येचाःयात न्यनेगु कथं जक मखु, दक्वं म्येया म्यूजिक भिडियो दयेकाः न्यनेगु लिसें स्वयेगु म्यूजिक भिडियो चाःया रूपय् हे पिथनादीगु दु ।
म्हसिका
म्येचालय् मुक्कं न्यापु म्ये दुथ्यानाच्वंगु दु । दक्वं हे म्ये इन्द्र खड्गीं च्वयादीगु दुसा उकी लय् देवकुमारी खड्गीं च्वयाः हाला नं दीगु दु । न्यापु दुने छपु ज्वः म्ये दु । ज्वः म्येय् देवकुमारीलिसे नांजाःम्ह म्येहालामि, लय्चिनामि सुमन कपालीं हालादीगु दु । दक्वं म्येया संगीत संयोजन नं सुमन कपालीं हे यानादीगु दु । म्यूजिक भिडियो दयेकेगु ज्याय् छायाङ्कन नरेश शाही, अमर चित्रकार, शंकर महर्जन व सैलेश डंगोलं यानादीगु दुसा दृश्य सम्पादन राजेशमान सिंह, नरेश शाही व राजन शाक्यं यानादीगु दु । नृत्य निर्देशन आराध्यालक्ष्मी खड्गी, विनोद बज्राचार्य व गौतम तण्डुकारयागु दु । निर्देशन धाःसा भीमसेन रीसाल, सुरेश खड्गी, राजेशमान सिंह व विनोद बज्राचार्यं यानादीगु दु । न्यापु म्येया दुने कलाकार धाःसा यक्व हे तयातःगु दु । मोडलिङ व संकिपा ख्यलय् नांजाःपिं कलाकारलिसें सह कलाकारपिं सकलें यानां न्यापु म्येय् मुक्कं ३४म्ह कलाकारपिन्सं म्यूजिक भिडियोलय् अभिनय यानातःगु दु । निपु म्येय् ला म्येहालामि लय्चिनामि देवकुमारी थम्हं हे अभिनय यानादीगु दु । देवकुमारी खड्गी म्येहालामि व लय्चिनामि जक मखसें अभिनय नं बांलाक यायेसःम्ह कलाकार खः ।
म्येया दुवाला
हाकु छ्वय्ला म्येया म्येग्वः न्ह्यइपुसे च्वं । ख्यालि पहलं म्ये च्वयातःगु दु । भिमसेन रिसालं निर्देशन यानादीगु भिडियो नं व हे कथं ख्यालि पहलं दयेकातःगु दु । स्वयेबलय् न्ह्यइपुसे च्वं । म्यूजिक भिडियोलय् नेवाः संकिपा ख्यलय् बांलाक हे म्हस्यूम्ह दिपक कपाली व इकृना बल्ललिसें म्येहालामि देवकुमारी थम्हं हे अभिनय यानादीगु दु । देवकुमारी खड्गीं तयादीगु म्येया लय् नं बांलाः ला जू । तर लय्यात नं ख्यालि पहः हे बी फूगु जूसा लुँइ नस्वाः हे ह्वले थें जुइगु खः । अथे हे, स्वैदिसँ पासापिं नं ख्यालि म्ये हे खः । फेसनया नामय् अप्वयावंगु विकृतियात न्ह्यइपुक्क थुगु म्येये न्ह्यब्वयातःगु दु । म्येग्वःयात ल्वय्क लय् नं चिनातःगु दुसा हालातःगु नं न्ह्यइपुसे च्वं । थुगु म्येया भिडियोया निर्देशन नं भिमसेन रिसालं हे यानादीगु दु । व हे कथं खःमू ज्वनां म्येय् छम्ह ल्यासें थः यःम्ह मिजंयात हायेकाच्वंगु दु । थुगु म्येय् देवकुमारीं थःगु सलय् न्यासिचाः पहः बियादीगु दु । व पहः म्येयात तसकं ल्वः । म्येया माग कथं हे वय्कलं न्यासिचा पहः बियादीगु जुइमाः । थुगु म्येया निर्देशन राजेशमान सिंहं यानादीगु दुसा थौंकन्हय् नांजाःम्ह कलाकार आराध्यालक्ष्मी खड्गी व पानवती संकिपाया हिरो विनोद श्रेष्ठं अभिनय यानादीगु दु । म्येया भिडियो बांलाःगु ला खत । तर आराध्यालक्ष्मी खड्गीं नृत्य निर्देशन यानादीगु जूगुलिं भचा अप्वः नृत्य दुसा ज्यूगु थें मनय् लुयावः । भचा अप्वः आशा मनय् लुयावः ।
म्येचाःया मेगु बांलाःगु म्ये जिगु मनया राजा खः । रोमान्टिक म्ये न्यने ला यइपुसे च्वं हे । नापं थुगु म्येया भिडियोयात म्येचाः दुनेया म्ये मध्ये दक्कले बांलाःगु भिडियो धायेफइ । क्यामेरा व एडिटिङया ज्यालिसें कलाकारपिनिगु अभिनय सकतां बांलाः । म्यूजिक भिडियो निर्देशक सुरेश खड्गीयाके म्यूजिक भिडियो दयेकेगु कला दुगु खनेदु । म्येय् रन्जना सितिखु व माधव श्रेष्ठं अभिनय यानादीगु दु । थुगु म्येचाःया भिडियोया छगू विशेष पक्ष धयागु कलाकार खः । नांजाःपिं, बांलाःपिं कलाकार अले यक्व कलाकार । दक्व हे म्येय् यक्व कलाकारत दु । तर जिगु मनया राजा म्ये छपु जक हे खः, गुकी निम्ह जक कलाकार दु । तर व म्येया डिमान्डया ल्याखं हे खत, कुंखिनेमाःगु मखु । मेगु म्येय् यक्व कलाकार भिडियोया कन्सेप्टया डिमान्ड कथं खत सा थुगु म्येय् निम्ह जक कलाकार नं कन्सेप्टया हे डिमान्ड खत ।
टाइटल म्ये जिगु मनया यःम्ह म्येचाःया विशेष म्ये जुयाब्यूगु दु । म्येचाःया जक मखु, संगीत ख्यलय् हे छगू विशेष म्ये धायेफइ थुगु म्येयात । शुरुइ म्ये न्यनेबलय् मेमेगु थें साधारण तायेदइ । तर अन्तराय् थ्यनीबलय् विशेष तायावइ । अन्तराय् थ्यंकाः जब ‘ईन्द्र गन दु, देवी अन दु’ अनं म्येया भाव थुल धाःसा म्ये नुगलय् दुने हे थ्यनी । थुगु म्ये मतिना म्ये ला खत । म्येहालामि लय्चिनामि देवकुमारी खड्गी व वय्कःया जहान म्ये च्वमि ईन्द्र खड्गीया हे मतिनाया बाखं खः । विनोद बज्राचार्यं निर्देशन यानादीगु भिडियोलय् नांजाःम्ह म्येहालामिलिसें कलाकार सरस्वती मानन्धर व भिमसेन रिसालं अभिनय यानादीगु दु । पारिवारिक लकस क्यनातःगु बांलाः जू । थुगु हे म्येचाःया भिडियोलय् देवकुमारी थः हे छम्ह बांलाक अभिनय यायेसःम्ह कलाकार धकाः ला सी हे दत । व ल्याखं देवकुमारी व ईन्द्र थम्हं हे थुगु म्येय् अभिनय याःगु सा अझ हे बांलाइ ला धइथें जू । छाय्कि थ्व म्ये वय्कःपिनिगु हे बाखं खः ।
लिखँ
समग्रय् जिगु मनया यःम्ह म्येचाः नेवाः संगीत ख्यःया नितिं छगू बांलाःगु देछा खः । न्यापु म्येया दुने संगीतया यक्व हे पक्षया सवाः बीत म्येचाः ताःलाःगु दु । ख्यालि, रोमान्टिक पहःया लिसें सामाजिक लिसें पारिवारिक सन्देश नं दयाच्वंगु दु । दबुलिइ प्याखं हुलेत नं थुगु हे म्येचालय् म्ये दु । व बांलाःगु पक्ष खः । म्येच्वमि, लय्चिनामि, हालामि म्येचाः बांलाकेत माःगु यक्व पक्षयात बिचाः यानाः हे म्येचाः पिथंगु खनेदु । थौंकन्हय्या डिमान्ड अनुसार म्येया भिडियो तकं दयेकाः पिदंगु दु । म्ये छपु रेकर्डिङ द्वःबद्वः धेबां मगाः । उकीसनं भिडियो ला अझ आपाः खर्च जुइतिनि । थ्व छचाः म्येचाः छगू निगू लख जक खर्च यानां पिदंगु खइमखु । झीसं थुगु पक्षय् नं बिचाः याये हे माः । डाउनलोड यानां, कपि यानां जक म्ये न्यनां वा स्वयाः म्ये ला लोकं व्हायेफइ । तर कलाकारयात थुगु ख्यलय् निरन्तर न्ह्यानाच्वनेत लँ प्वाःतिनाबी । लखौं खर्च यानां पिदनीगु म्येचाः न्यायेत झीसं ला छुं भचा धेबा पूसा गाः । झीसं म्येचाः न्यानाः हे न्यनाबिल, स्वयाबिल धाःसा कलाकारयात तःधंगु तिबः जूवनी ।
बिराजकाजी राजोपाध्याय
