नेपालभाषाया पत्रकारिता ख्यलय् मनोरञ्जन विधायात कःघाना पिदना च्वंगु पत्रिका उलि खनेमदु । ने.सं. १११९/२० पाखे पिदंगु वाःपौ “स्वनिगः” धुंका थ्व ख्यःया पत्रिका ख्यलय् मेगु पत्रिका खनेमदया च्वंगु खःसा थ्वहे अभावयात न्हंकेत थौंसिबें १५ दँ न्ह्यवः पिदंगु बाछीपौ खः, पेजथ्री । थ्व पेजथ्री बाछिपौया सम्पादक खः, दर्शनबीर शाक्य । वयात जिं नरेशबीर शाक्यया काय् धकाः जक म्हसिउगु खः । पेजथ्री पिहाँ वयेसिबें न्ह्यःया खँ खः । छक्वः दर्शनवीरं सन्ध्या टाईम्स पत्रिकाय् शुक्रबारया तंसापतिइ पिदंगु हलिउड स्टारतय्गु बारेया जिगु च्वसुयात कया नं छपु प्रतिक्रिया पिकाल । उगु इलय् व ल्याय्म्हचाहे तिनि । वं उलि ग्यंक्क प्रतिक्रिया च्वइ धइगु जित पत्यायाये हे थाकुल । च्वःगु वं हे जुया च्वन । शायद थनंनिसें तिनि वलिसे नतुसुतु ब्याःगु । थ्व घटनाया स्वदँप्यदँ लिपा वयागु हे सम्पादनय् “पेजथ्री” पिदन ।
मनोरञ्जन व फिल्मख्यःया पत्रकारिताय् ल्हाःन्ह्याकावया च्वनाम्ह जूगुलिं ् “पेजथ्री” पत्रिकां जिगु नुगः याउँक हे सालाकाल । सालाकाःगुजक मखसे नुगः त्याका हे काल धाःसां छुं पाइमखु । पेजथ्री”या जि छम्ह नियमित ब्वमिं हे जुया तरथ्व पत्रिकाया न्हापान्हापाया ल्याखय् धाःसा उलि च्वये मनं । लिपा वना तिनि नियमित रूपं थुके च्वसा न्ह्याकागु खः । दर्शनवीर नाप जिगु स्वापु अझ क्वातुना वंगुया हुनिं छगु धइगु पेजथ्री पिपुल्स च्वइस अवार्ड नं खः । मनोरञ्जनया स्वंगुख्यः संकिपा, संगीत व म्युजिक भिडियोयात कःघाना पेजथ्री पत्रिकाया ग्वसालय् थौंसिबें झिदँ न्ह्यः ने.सं. ११३० य् दकलय् न्हापांखुसी थ्व अवार्डया घोषणा जूबले जित संकिपाख्यःया सिरपा निर्णायकया भाला बिल । थुकथं जिगु थ्व अवार्डलिसे सतिक स्वापु दत । अनंलिपा ने.सं. ११३४ व ने.सं.११३७ य् जूगु थ्व अवार्डय् नं संकिपापाखेया सिरपा क्वछीत निर्णायकया भाला क्वबि खन ।
नेपालभाषाया मनोञ्जन पत्रकारिता ख्यलय् छगु ज्वमदुगु पत्रिकाया रूपय् पलाः न्ह्याकुगु पेजथ्री पत्रिकाया ग्वसालय् थ्व ख्यःया संकिपा , संगीत व म्युजिक भिडियोयात कःघाना न्ह्याःगु पेजथ्री पिपुल्स च्वइस अवार्ड धइगु थ्व ख्यःया न्हापांगु अवार्ड ज्याझ्वः खः । प्यदँय् छक्वः हे जूसां थ्व मनोरञ्जन ख्यलय् नियमित रूपं जुया वःगु थ्व छगुयांछगु हे जक अवार्ड खः । थ्व अवार्डयात दर्शनबीरया थ्व ख्यः प्रतिया मतिना कथं कायेमा अले थ्व ख्यलय् ज्यायाना वया च्वंपिंन्त हनेमा धका पिज्वःगु विचाःया छगु दसु कथं नं कायेमा । थ्व अवार्डय् स्वंगु थीथी विधाय् धेंधें बल्ला याना सिरपा बीगुजक मखसे थ्व ख्यलय् थःगु जीवन पानादीपिं स्रष्टापिन्त जीवंकाछी हना कथं लाईफटाइम एचिभमेंट अवार्डपाखें हनेगु नं याना वया च्वंगु दु । ने.सं.११३० य् नेपालभाषाया साहित्य व संकिपा ख्यलय् थःगु जीवन हे पानादीम्ह रामशेखर नकःमियात अले ने.सं. ११३३य् नेपालभाषाया संगीतख्यलय् ज्वमदुगु योगदान दुम्ह जगमोहन वाःमियात लाइफटाइम एचिभमेंट अवार्ड व नेसं ११३७य् नेवाः लोकसंगीतया श्रष्टा विष्णु जल्मियात हंगु खँ थनथाय् लुमंके बहजु ।
थुकथं थ्व ख्यःयात मतिना याना वया च्वंम्ह दर्शनबीर सदां थ्व ख्यःया विकासयाबारे चिउता कया च्वनिम्ह छम्ह संकिपा व संगीतह्यःमि सञ्चारकःमि खः । छगु हे ख्यःलिसे स्वापु दुपिं जूगुलिं जिपिं नापलानांतुं च्वं । नापलाइबले न्ह्याब्लें थ्व ख्यःयात कया हे खँल्हाबल्हा जुइ । आःतक नं अथे जुयांतुं च्वंगु दु । वयागु व जिगु ख्यः व नुगः ज्वला । जि नं पत्रकार व सञ्चारकःमि अले व नं । वया नं साहित्यपाखे ल्हाः न्ह्याः अले जि नं । उलिजक मखसे जि नं संकिपाया निर्देशनय् पलाः न्ह्याकावया च्वनाम्ह खःसा वं थुखेपाखे थःगु पलाः न्ह्याकुगु न्यादँखुदँ हे दत । न्यादँखुदँति न्ह्यःया हे खँ खः , दर्शनबीरं थःयात छम्ह संकिपा च्वमिया रूपय् न्ह्यने हल । उगु इलय् वया च्वसां पिदंगु “पलाः” नांयागु संकिपाया दयेकेज्या न्ह्याःगु खः ।
मनोजरत्न शाहीया निर्देशनय् दयेकेगु धका ग्वसाः ग्वःगु उगु संकिपाय् नेवाः फिल्मख्यःया लोकंह्वाम्ह हिरोइन आशिष्मा नकःमिया केंहें अन्जला नकःमिं हिरोइनया रूपय् इण्ट्रि काइगु खँ जूगु खः । थ्व फिल्मया मुहुर्त नं जुल । तर फिल्मया शुटिंग धाःसा मन्ह्यात । लिपा वना दर्शनबीरं मच्छिन्द्र क्लबया ग्वसालय् जूगु नेवाः चीहासंकिपा कासाय् “द मिथ” नांयागु चीसंकिपाया निर्देशक व च्वमिया रूपय् थःयात न्ह्यब्वल । उगु कासाय् वयागु चीसंकिपां न्हाप सिरपा हे त्याकेत ताःलात । थुकथं छम्ह संकिपाकःमिया रूपय् वयागु पलाः न्ह्याःगु खःसा अनंनिसें वयागु पलाः निरन्तर न्ह्याना हे च्वंगु दु । थगुने नेपालभाषा चीहासंकिपा कासाय् दर्शनबीरया “द मिथ जिरो” चीसंकिपां लिउ सिरपा लाःकलसा थुगुसी नेपालभाषा टाईम्स चीसंकिपा सिरपाया निंतिं जूगु कासाय् वयागु “ईन्द्रायणी” संकिपां लियांलिउ सिरपा त्याकुगु दु ।
छम्ह निर्देशकया रूपय्जक मखसे छम्ह संकिपा च्वमिया रूपय् नं वयागु पलाखय् निरन्तरता दया वया च्वंगु दु । छम्ह स्क्रीप्ट राइटरया रूपय् दर्शनबीरं न्ह्याकुगु न्हापांगु पलाः “पलाः” संकिपा धाःसा शुरु हे मजुल तर वयागु पलाखं धाःसा दिपा मका । न्ह्यानांतुं च्वन । दर्शनबीर थःम्हेसिनं निर्देशन याःगु स्वंगुलिं चीसंकिपा “द मिथ ” “द मिथ जिरो” व “ईन्द्रायणी” या स्क्रीप्ट राइटर व थःहे खःसा वयागु च्वसां पिदंगु बुद्धकालिन बाखनय् आधारित “घोषक” नांयागु संकिपाया शुटिंग क्वचाये धुंकुगु दु । थ्व संकिपाया निर्देशक अमृतचन्द्र श्रेष्ठ खः । उलिजक मखसे छम्ह कलाकारया रूपय् नांजाम्ह पल्पसा डंगोलया निर्देशनय् दयेका च्वंगु “ब्याहा यानागु लच्छि मदुनि” या स्क्रीप्ट राइटर नं दर्शनबीर शाक्य हे खः । थुकथं छम्ह फिल्ममेकरया रूपय् थःगु पलाः क्वातुका हःम्ह दर्शनबीर शाक्यया सम्पादनय् पिदना वया च्वंगु “पेजथ्री” बाछीपौया स्वसःगु ल्याः पिदने त्यंगु न्यना थ्व नुगः लसतां लसतां जाया वःगु दु । नेपालभाषाया मनोरञ्जन पत्रिकाया ख्यलय् छगु ज्वमदुगु पत्रिकाया रूपय् पिदना च्वंगु थ्व पत्रिका पलाः सदां ताःलाना च्वनेमा । अले मनोरञ्जन ख्यलय् नुगः क्वसायेका वया च्वंम्ह दर्शनबीर शाक्यया पलाः नं सदां धिसिलाना च्वनेमा । थुलिहे भिन्तुना च्वना ।
