नेपालभासा चीहाःसंकिपाया थीम कथं नेपालभासाया साहित्यया लिधंसाय जुइमाः धकाः धाःगु खः । थ्व सिबें न्हपांगु चीहाःसंकिपाः कासाय् प्यंगु थीम ब्यूगु खः ग्वसाखलकं । १०गू प्याखँ मध्य जिं दयेकाःगु प्याखँ द मिथ ०या थीम धाःसा झीगु भासा झीगु सम्पदा व झीपिं थःगु भासं ब्वनेमखंपिं धैगु निगु थीम दुथ्याकागु खः । यक्वसिनं हे जिं दयेकाःगु प्याखँ थीमय् हे मलाः धकाः ताय्कल खनिं छाय्की सकस्यां हे न्हापांगु थीम झीगु भासा मन्त धाःसा धैगु थीमय् दयेकुगु खः । थुगु खँ अझनं मथुपिं दनिं ।
खय्तला जिं नं नेपालभासाया साहित्य च्वया । छपू निपू बाखँनं च्वया। बाखँ च्वया छुं हलचल नं जूगु दु । तर नं नेपालभासाया साहित्य धकाः जिं च्वयागु अथेभनं च्वछाये बहःगु मदुनिं थें च्वं उकि मध्य नं जिं च्वयाःगु साहित्यया आधारय् फिल्म हे दयेके धैथे नं मदु । व हे कारण ग्वसाः खलःया आज्जु कथं हे नेपालभासाया साहित्यया बारे सोच तया । सकस्यां हे थी थी साहित्यकारया बाखँया लिधंसाय् प्याखँ दयेकी धकाः अनुमान यानागु खः व हे कारण छुं पृथक यायेगु मत्तिइ तयाः लुँति अजिमाया बाखँ बारे बिचाः याना । लुँति अजिमाया बाखनं जितः मचां निसें हे प्रभावित याःगु बाखं खः । मचाबलय् कमिक्स छगू स्वःयागु लुमं । लिपा तिनि सिल उगु कमिक्सला महाकवि गिरिजाप्रसाद जोशीं च्वयादीगु जुयाच्वन । लुँति अजिमाया बाखंया लिधंसाय् प्याखँ दयेके फइला धकाः बिचाः जिं न्हापानिसें नं यानाच्वनागु खः।
नेपालभासाया निगु चीहाः संकिपाः व निगू संकिपा (द मिथ, द मिथ ०, धोषक व व्याहा यानागु लच्छि मदुनि) जिं च्वये धुन । थ्व हे दौरान लुँति अजिमाया प्याखँ दयेकेगु बारे मनोज रत्न शाही लिसे छझा खँ नं व्याके धुनागु । तर जिगु निष्कर्ष धाःसा थ्व बाखनय् पुवंक प्याखँ दयेकेगु सिबें शर्ट फिल्म हे जक पाय्छि जुइ । छाय्धाःसां थुगु बाखंया शुरुवात नं मदु अले अन्त नं मदु । मात्र छगू घटना दु । घटनायात प्याखँ दयेकलकी यक्व हे कल्पनाया खँ दुथ्याके माली । गथेकी लुँति अजिमा छाय् गरीब जुल । वया ब्याकग्राउण्ड गथे दु अले भोय् ब्वय्तिसा तयेधुंकाः प्याखँ गथे क्वचाइ । अनं लिपा नं यक्व खँ जुइ तिनि । तर तिसा भोय् ब्वये तइगु घटनां छगू अतिकं हे महत्वपूर्ण घटना खः गुकिं समाजया मूल्य व मान्यतायात हाथ्या बियाच्वंगु दुसा थुलि घटनां न्ह्यः व लिपाया खँ क्यनाच्वने उलि आवश्यक मजु । उकिं थुगु घटनायात कयाः चीहाः प्याखँ हे जक दयेकेगु उपयुक्त जुइ धैगु जिं निश्कर्ष पिकयाः ।
लुति अजिमाया बाखँयात न्ह्योने निसें छसियाना क्यंसां १ धण्टा याना क्यने ज्यू तर चीहाः प्याखँया अवधारणा वनेधुंकाः प्याखँया अवधि नं चीहाकः याये माल । व हे कारण थुकीया स्क्रीप्ट च्वयेगु इलय् गथे याना चीहाकःयाये धैगु बिचाः याना । अन्तत थुगु प्याखँयात मुक्कं ८ मिनेट दुने तयेत ताःलात । तर थथे खःसां बाखंया सार स्यंकागु मदु । छम्ह पात्रं समाजया मूल्य व मान्यता कथं मन दुपिं सिबें धन दुपिंत जक मान सम्मान बिइगु जुगुलिं थज्योगु मूल्य व मान्यता गलत खः धैगु सन्देश थुगु चीहाः प्याखनं न्ह्यब्वयागु दु ।
इन्द्रायणी छगू लोकबाखं जूगु कारण थुगु बाखँया यक्व हे स्वरूप, धारणा व मूल्य मान्यता दु । गनं इन्द्रायणीयात थः छेँ खलकं हेपे यात धकाः धयातःगु दुसा, गनं मांम्हं जक हेपेयात वा गनं तःक्येँहेपिंसंनं हेपेयात धकाः च्वयातःगु दु । अथेहे गनं नखत्या कन्हे खुन्हु जक सःतल धकाः धयातःगु दुसा गनं नखत्याः सःताः नं छेल्ली तयाः नकल, थनं बासिगु दुसी मरी नकल धकाः नं कनातःगु दु । अथेहे तुं इन्द्रायणीया मस्तः मनसे ख्वख्वं लिहांवःगु इलय् फसि छगः लुयाः वःगु व वहे फसि छेँय् दयेकुगु इल्य लुँ जुल धकाः नं धाः । लोक बाखनय् यक्व हे अलौकिक खँ त दु । तर थज्योगु खँत गुलिं प्याखनय् क्यने धाःसां पत्याः हे मजुइगु अवस्था दु । फसि दायेकु दायेकुं गथे लुँ जुइ? संभावना मदुगु खँ थौंया स्वकुमिं पचे याइ मखु । थुलि बाखँया लिधंसाय् नं महाकवि गिरीजाप्रसाद जोशीं धाःसा इन्द्रायण्ीया भाःत तापलय् वनां लिहांवःगु क्यनातःगु दु गुकी लौकिक खँ दु थें ताः । अथेतुं बाखनय् मांम्हं थः म्ह्याय्यात हेपेयाःगु धकाः धयाःतगु दु तर झीगु लौकिक जीवनय् धाःसा सुं नं मामं थः हे म्ह्याय्यात गरीब जूगुलिं हेपेयाना खँ ल्हाइगु धैगु पत्याः याये थाकु । खयेफु छुं १९ २० पाकाः मांपिंसं थः मस्तय्त नं व्यवहार याइ तर हेपे हे याना खँल्हाइगु परिस्थीथि कल्पाना याये नं थाकु । थुगु खँयात प्याखनय् ब्वयेगु तसकं हे हाथ्याःया खँ खः । प्याखँया स्थीति थुकथं जक हे न्ह्यब्वयेमागु दुकी मांम्हं थः म्हयय्यात माया यानां कन्हे खुन्हु नखत्या सःतुगु खःसां इन्द्रायणी थःगु सम्मानय् घाः लाःगु वाः चायेकी । झीसंनं थौं कन्हे नखत्या सतेबलय् सुं सुं खलः कन्हे खुन्हु सःताःच्वंगु दइ । ल्यं पुल्यं फुकेगु नितिं अकसर पासापिन्त सःताच्वंगु हे दइ । थ्व हे खँयात वाःचायेकाः थ्व परिस्थीतियात न्ह्यब्वयागु दु गुकी मांम्ह माया हे याःसां नं व हेपेयाःगु प्रतिक जुयाच्वंगु दु छाय्की छम्ह माम्हं थःमस्तय् छथाय् तयाः नके मफू ।
अथे हे लोकबाखँया मेगु अलौकिक खँ कथं इन्द्रायणीया मस्त नयेमखंपिं तसकं गरीब धकाः धयातःगु दु । तर थौंया लौकिक संसारय् मनसे सुं नं म्वाये फइ मखु । च्वयातःगु खँ प्याखनय् ब्वयेत तसकं हे थाकु । उकिं छुं नं चिं बाखँयात प्याखँ दयेकेतुं व चीहाः बाखँ जुइ मखु । थ्व परिवेशयात ध्यानय् तयाः हे इन्द्रायणीया परिवारं साक्क भिंगु नये मखंगु परिस्थीति हिइकागु दु ।
इन्द्रायणीया शुटिंग न्ह्यः थुगु टिमं इन्द्रायणी प्याखँ दयेकेगु निंतिं निला न्ह्यो निसें होमवर्क यानागु खः । पेजथ्री पाखें मिथ ०या टिम हे लिसा कयागु जुलसा कलाकारय् धाःसा माःगु चरित्र कथं थप यानागु जुल। इन्द्रायणीया दकलय् तःधंगु हाथ्या धैगु हे थुगु प्याखँयात न्याये याये फइकी मफइ धैगु खँय् बहस जूगु खः । टिमया स्वम्ह कोर मेम्बर मनोज रत्न शाही व राजन शाहीलिसे थ्व बिषयलय् बहस याना । स्वम्हेस्यां नं इन्द्रायणी बारे न्यनातःगु बाखँ पाः । थुपिं हे बाखँया लिधंसाय् स्क्रीनप्ले च्वइगु इलय् पत्या याये बहः जुइमा धकाः ध्यान तयाः ।
इन्द्रायणीया कलाकार
कलाकार चयनया खँय् आराध्या लक्ष्मी खड्गीयात ध्यानय् तयाः स्क्रीप्ट च्वयागु खः। कलाकार चयनया खँय् आराध्या हे छाय् धैगु खँ वय्फु । मूल खँ जितः आराध्या व आराध्याया मांया भुमिका म्हितेत अःपुइमा वा पत्याः जुइमा धैगु कथं खः । आराध्याया तःमां देवकुमारी खड्गी छम्ह सेल्लाम्ह कलाकार जुगु हुनिं इन्द्रायणीया ख्वाः फयांफत्तले थः मां लिसे ज्वः लायेमाः धैगु खः । मां व म्ह्याय्या ख्वाः लुपिं कलाकारया शारीरिक बनोटय्नं ध्यान बियागु खः । अथेहे तुं आराध्याया मस्त ल्ययेगु निंतिं नेवाः इंग्लिस स्कुल थेच्वः स्कुलय् हरेक क्लास चाःहिला फयांफत्तले आराध्याया ख्वाः ज्वःलापिं मस्त ल्ययाःगु खः । मस्त ल्ययाबलय् इन्द्रायणीया मस्त गँसिपिं अले इन्द्रायणीया क्येँहया मस्त ल्ह्वंपिं जक ल्ययासा इन्द्रायणीया क्येँहेपिं नं आराध्याया फेशकट लिसे मिले जुइक ल्ययाःगु खः । अथे हे तुं इन्द्रायणीया भाःत धकाः क्यनेगु निंतिं म्हो भुमिका तर महत्वपूर्ण भुमिकाय् रूपेन थाक्वायात गेष्ट आर्टिस्ट कथं ल्यया । कलाकार छनौट व डे«सया निंतिं राजन शाहीं याःगु मेहनत यक्व हे च्वछायेबह जु । वकर्शप लिपा कलाकारं व वसः पुनेवं हे छक्वलं थःपिं चरित्रय् दुहांवनाथें तायेकल । डाइलगस न्ववायेबलय् टेक नं म्हो हे जक नल । लगभग सकस्यां हे वान टेक डायलग न्ववाःगु खः ।
आराध्यां धाःसा थथे सिरियस भुमिका म्हितुगु मदुनी । थ्व खँ बांलाक्क हे वाः चाः । थ्व हे खँया ध्यानय् तयाः इन्द्रायणीया चरीत्रय् दुबिंकेत वर्कशप याका । वर्कशपयात अझं शसक्त यायेगु निंतिं लोकेशनय् वनांनं अभ्यास नं याका । अले इन्द्रायणीया भुमिकाया निंतिं नं बिशेष रूपं वसःया ट्रायल बिया स्वयागु खः ।
मेगु खँ
थुगु प्याखँया मेगु विशेषता धैगु प्याखँया छायाँकन नं खः । छगू न्हूगु प्रयोग कथं थुगु प्याखनय् हरेक धैथे शट मोशन शट दु । फिक्स फ्रेमय् म्हो हे जक तयाः । थुकीया निंतिं डि ओ पि मनोजरत्न शाहीया यक्व हे मेहेनत दु । शटयात सुन्दर ढंगं न्ह्यब्वयातःगु दुसा सम्पादन पक्षनं मोशनयात कःघानातःगु दु गुगु तसकं हे मेहनतया ज्या तायेके हे माः । मोशन शट्सय् सम्पादन यायेगु धैगु अःपुगु खँ नं मखु ।
प्याखँया मेगु सशक्त पक्ष थुकी दुथ्याःपिं मचा कलाकार खः । थेच्व नेवाः स्कुलय् मस्त दुगुलिं हे थुगु स्कुलया मस्त व लोकेशन ल्ययाःगु खः। कारण मस्त ज्वना मेगु लोकेशनय् वने थाकुइ । उकिं लोकेशनया निंतिं मनोज रत्न व राजन शाही च्वना फाइनल याना । प्याखँ एतिहासिक जुइमाःगुलिं थुकी मेकअपया निंतिं सम्झौता यायेगु खँ मजुल लिसें लाइट नं सम्झौता मयासे प्याखँयात माक्व फुक्कं हे गाक्क याना । प्याखँयात माःगु मेगु पक्षय् प्रोडक्शन निर्देशक कथं रानीशोभा महर्जन, रोजन शाक्य व सर्जु बज्राचार्य दु । लोकेशनय् माःगु फुक्कं हे ज्याखँ प्रोडक्शन टिमं याःगु दुसा मेम्हे ग्वाहलिमि नविन थेच्वमिं माःगु प्रोप्स चुलाकाबिल । हरेक लोकेशनय् छुं नं छुं प्रोप्स थुगु प्याखनय् दुथ्यानाच्वंगु दु । प्याखँया संगीत ध्वनि पक्षय् नं यक्व हे मेहनत जूगु दु । प्याखँया मू ध्वनिंया निंतिं लाइभ म्युजिक दुथ्याकागु दु । प्याखँया शुरुवात नाय्खिं थाना द्यल्हाःगु बाजं दु । यक्वस्यां थ्व धूनयात सि बाजं धकाः तायेकुगु दु । झीपिं सिबाजं व द्यःल्हाःगु बाजं हे म्हसिके मफयेधुंकुगु अवस्थाय् थ्यन धुंकल । द्यःया प्याखँ भाः पियागुलि हे प्याखँया शुरुइ हे द्यःल्हाःगु बाजं तयागु खः । थ्व लाइभ बाजंया सः खः । अथे हे प्याखँया अन्तय् पाहांच¥हेया धुन दु । इन्द्रायणी यात पाहांच¥हेबलये हेपे याःगु लिं आःवंनिसें पाहांच¥हे नखत्या वये मखुत धकाः इन्द्रायणीया अल्लग हे बालाच¥हेया जात्रा याइगु खः । थ्व हे खँयात ध्यानय् तयाः पाहांच¥हेया धुन तयाःगु खः ।
