मितेश ताम्राकारया च्वसा, संगीत व सलय् विश्वास बज्राचार्यया निर्देशनय् येँया पुन्हि म्यूजिक भिडियोया प्रिमियर सिडिसि मलय् जुल । येँ महानगरपालिकाया उपमेयर सुनिता डंगोल मू पाहाँकथं झायादीगु उगु ज्याझ्वःस म्यूजिक भिडियोया तारिफ यानादिल । हरेक मनुखं थःगु ज्याखँ उत्कृष्ट तरिकां याःगुलिं थुगु भिडियो स्वइबलय् आः हे येँयाः पुन्हिं वयेधुंकुगु थें च्वं धकाः नं धयादील जबकि येँयाः पुन्हिं वयेत अझं छ वाः मानिं । म्येयात मस्तय् दथुइ व न्हूगु पुस्ता दथुइ यंके फत धाःसा म्ये अझं लोकं ह्वानाः न्हून्हुगु रेकर्ड दयेकेत ताः लाइ धाःसें थुगु म्ये नं मस्तय्गु म्हुतुइ थाइगु थें सवाः दु धकाः धयादील।
म्ये हालामि मितिलेस ताम्राकारं थःगु व्यवसायिक ज्याखँया कारण लिमलाःसां नेपालभाषाया म्ये हालेत थः न्ह्याब्लें हे अग्रसर जुयाःच्वनागु खँ तयादील । समिक्षक एवं वरिष्ठ सिने पत्रकार विजयरत्न असंबरें नेपालभाषाया म्यूजिक भिडियो ख्यः झन हे तब्याः जुयाःवंगु व थुगु भिडियो तसकं हे बांलाःगु धकाः तारिफ यानादील ।
ज्याझ्वलय् भिडियोया म्ये हालामि निभा डंगोल, मनोज महर्जन व प्रशंसा रायमाझीं नं नुगः खँ तःगु खः ।
थुगु भिडियाेस मनाेज महजर्न, प्रशंसा रायमाझीया अभिनय दुसा म्येया च्वसा, संगीत व सः मितिलेस ताम्राकारं बियातःगु दुसा मिसा सः निभाः डंगाेलं बियातःगु दु । म्येया संगीत संयाेजन फिराेज बज्राचार्यं यानातःगु दु । काेरियाेग्राफी राेहिया महर्जनं यानातःगु दु । सम्पादन आकृष्ट शाक्यं यानातःगु दु अले छायाँकन साेहन मानन्धरं यानातःगु दु ।
