ईलाेहं प्रकाशनं नेपालभाषाया संचार ख्यलय् यानाः वयाच्वंगु याेगदानया कदर स्वरूप नेवाः एकता अभियानं क्षेत्रपाटी पार्टिप्यालेसय् छगू ज्याझ्वः याना नगदतका लिसेें सुभाय् पाै देछात । नेवाः एकता अभियानं नेपालभाषाया थी थी सञ्चार माध्यम, नेपालभाषा चिनाखँ धेंधें बल्ला कासाय् ब्वति काःपिं व युवा नेवाः उद्यमिपिन्त ग्वहालि लिसें सुभाय् देछाः ज्या नेसं ११४५ यंलाथ्व दुतिया (२०८२ साल भाद्र ९ गते सोमवाः) खुन्हु याःगु दु । ज्याझ्वलय् वागमति प्रदेशया पूर्वमन्त्री एवं सभासद हरिप्रभा खडगी श्रेष्ठ मू पाहांकथं झायादीगु खः । वय्कलं सम्मानित जुयादीपिन्त सुभाय् पौ देछानादीगु खःसा नेपालभाषा आकादेमिया चान्सलर मल्ल के सुन्दरं खादा न्ययकादीगु खः । अले नेवाः एकता अभियानया आर्थिक कवःया कजि सुनिल कुमार शाक्यं नगद तका लःल्हानादीगु खः ।
नेवाः एकता अभियानया आर्थिक कवःया कजि सुनिल कुमार शाक्यया सभापतित्वय् जूगु थुगु ज्याझ्वलय् नेवाः एकता अभियान नेपाःया कजि कुमोद श्रेष्ठं लसकुस यानादीगु खः । ज्याझ्वलय् ५० दँ स्वयां अप्वः ई न्ह्यःनिसें नेपालभाषाया थीथी पत्रिका छेँय् छेँय् थ्यंका वयाच्वनादीपिं (थौंकन्हय् नेपालभाषा टाइम्स न्हिपौ) खड्गमान वज्राचार्य व रमेश मल्लयात अभियानपाखें दोसल्लां न्यय्काः नगद लःल्हाना हनेज्या नं यायगु ज्या याःगु खः ।
ज्याझ्वलय् नेपालभाषा टाइम्स, न्यूज नेपाः डट कम्र, सम्यक वाः पाै, नेवाः अनलाइन न्यूज, लहना वाःपाै, झीगु सः टिभि ज्याझ्वः, नेवाः सुचना केन्द्र, लिसें सामाजिक अभियन्ता राजाराम तण्डुकार व व्यवसायी मनिषा महजर्न यातनं सम्मान
नेवाः एकता अभियानया ग्वसालय् नेपालभाषा चिनाखँ धेंधेंबल्लाकासाया लिच्वः कथं लिजला महजर्न, अष्टिन महजर्न, एजल महर्जन, नायरा महजर्न, संकिपा श्रेष्ठ, हना महर्जन व निभाः श्रेष्ठयात नं सिरपाः लः ल्हाःगु खः ।
