नेपालभाषाया सांगीतिक ख्यलय् दशकौं न्ह्यों निसें थःगु मन तयाः सेवाः यानाच्वनादीम्ह १८ वडाया अध्ययक्ष न्हुच्छेकाजी महर्जनया न्हूगु निपू म्ये थौं क्लाय्सिक ब्यांक्वेटय् प्रिमियर जूगु दु । छम्ह म्ये च्वमि कथं व संगीतकार कथं न्हूच्छे काजी महर्जनयात नेपालभाषाया सांगीतिक ख्यलय् यक्वस्यां म्हस्यु सां अभिनय् ख्यलय् नं न्हूच्छे काजी महर्जनया आपलं हे भिडियो पिदने धुंकुगु दु सा थौं पिदंगु म्ये मध्ये छपू म्येय् वय्कलं हे निर्देशन यानादीगु दु ।
तिम्रो दिलमा चोट लाग्दा बोलया नेपाली खस म्येया निर्देशन न्हूच्छे काजी महर्जनं याना दीगु दु । थुगु म्ये वय्कलं हे च्वयादीगु खःसा अनिल शाहीं म्ये हालाः संगीत नं तयादीगु खः । म्येया छायाँकन व सम्पादन सुरेन्द्र महर्जनं याःनातःगु दु । म्येय् न्हूच्छे काजी महर्जन व रविना महर्जनं अभिनय यानातःगु दु ।
अथे हे मेगु म्ये जि यःम्ह सिरिमतिचा बोलया म्ये नं पिदंगु खः । थुगु म्ये राजमतिया लोक लसय् अनिल शाहीं न्हूगु एरेन्ज यानातःगु खःसा म्येय् राजेन्द्र शाक्य व सविना मानन्धरं हालातःगु खः। थुगु म्येय् नेपालभाषाया लोकंह्वाःम्ह कलाकार रवि डंगोल लिसें रविना तुलाधरं अभिनय यानातःगु दु । म्येया निर्देशन बाल मुकुण्ड प्रजापतिं यानातःगु खःसा छायाँकन व सम्पादन सैलेश श्रेष्ठ लुभुं यानातःगु खः । म्येया परिकल्पना के वि एस लुभुं याना तःगु खः ।
ज्याझ्वलय् पूर्व मेयर विद्या सुन्दर शाक्य मू पाहां कथं झायादीगु खःसा वरिष्ठ सिने पत्रकार बिजय रत्न असंबरें नितां हे भिडियोया समिक्षा यानादीगु खः ।
न्हूच्छे काजी महर्जनया बुदिंया लसताय् म्ये हालामि रीता महर्जन, सरसस्वती मानन्धर, राजेन्द्र शाक्य, सविना मानन्धर व रोजी श्रेष्ठं सांगीतिक प्रस्तुति नं न्ह्यब्वयादीगु खः ।
