भाद्र २० निसें देय् न्यंकं रिलिज जुइत्यंगु नेपाली संकिपा ‘चिट्ठी’या म्ये ‘सिन्दुरको रंग’ छगू समारोहया दथुइ सार्वजनिक जुल । येँय् ग्वसाः ग्वःगु छगू ज्याझ्वलय् सञ्चारकःमि व कलाकारपिनिगु उपस्थितिइ उगु म्ये सार्वजनिक याःगु खः । एरा प्रोडक्सनया ब्यानरय् निर्माण जूगु थुगु संकिपाया निर्देशन माधव राज खरेलं यागु दु । निर्माण पक्षं कुबेर डिस्ट्रिब्युटर्स प्रा.लि. लिमिटेडया कथं थ्व छगू हरर व हास्य विधाया संकिपा खः धकाः जानकारी ब्यूगु दु । थ्व हे दथुइ संकिपाया भावनात्मक म्ये ‘सिन्दुर्को रंग’ नं पिदंगु खः ।
थुगु म्येय् कमला जोशीया बोल, सरोज कोइरालाया संगीत व बेनिषा पौडेलया सः दु । निर्देशक खरेलया कथं ‘सिन्दुर्को रंग’ म्ये जक मखु, छम्ह मिसाया दुनेया आत्माया सः खः, गुकिं स्वकुमिपिनिगु नुगलय् थिइ धकाः आशा यानादीगु दु। सामाजिक यथार्थ, संस्थागत विकृति, मानवीय प्रवृत्ति व पारिवारिक भावनायात कःघानातःगु संकिपा ‘चिट्ठी’ समसामयिक सन्देशलिसें स्वकुमिपिनि दथुइ बिस्कं सवाः बिइगु कुतः यानातःगु दु ।
संकिपाय् खड्गबहादुर पुन ‘खब्पु’, संजीत भण्डारी, गोपाल ढकाल ‘चण्डे’, नवराज थापा, प्रवन भुसाल, मुस्कान लामा, कञ्चन चालीसे, मोहन निरौला, शान्तिप्रिया, श्रीदेव भट्टराई, नम्रता खरेल, निरहन्द्र थापा, कर्मि पुरुषोत्तम सानु, सोमा खत्री, प्रल्हाद खरेल, डेविलसिंह राजपूत, समीर लामा, राजु कार्की व राजजू गुरुङ लिसें आपलं कलाकारपिनिगु अभिनय दु ।
थुगु संकिपाया निर्माता पत्रकार कमला जोशी खः । संकिपाया छायांकन जीवन पराजुली व राजन खरेलं यानादीगु दुसा सम्पादन राजेशकुमारं यानादीगु दु । भिएफएक्स समिर मियां यानादीगु दु । ध्वनि सम्पादन मनोज परियार व ५.१ ध्वनि सम्पादन अमित श्रेष्ठं यानादीगु दु । संकिपाया छपू म्ये ‘तुतेको तारा’य् डा. शिवताण्डव म्येया संगीत संयोजन राजेन्द्र बजगाईं यानादीगु खःसा संकिपाया द्वन्द्व निर्देशन किरण दाहालं यानातःगु खः । पृष्ठभूमि संगीत पुष्कर खत्रीं यानादीगु खः ।
सञ्चारमाध्यमलिसेया नापलायेगु झ्वलय् संकिपालिसे स्वापू दुपिं कलाकार, निर्माता, संगीतकःमि व मेमेपिन्सं म्ये व संकिपायात कयाः थःथःगु नुगःखँ प्वंकूगु खः ।
