नेपालभाषा ख्यलय् थःगु दत्तचित्त पानाः, थःगु जीवन हे पानाः जुइपिं तसकं हे म्हो । म्हिगः म्हिगः नेपालभाषा ख्यलय् थथे सेवाः याइपिं बाखं वा किताबया पानाय् छम्ह पात्र थें जक ताइगु तर थौं झी थुलि भाग्यमानी जुयाः कि नेपालभाषाया निंतिं थःगु सम्पूर्ण जीवन पानाः वंम्ह छम्ह व्यक्तित्व स्वतन्त्र संसार महर्जन लिसे प्रत्यक्ष झीसं साक्षात्कार याये खन । स्वतन्त्र महर्जनं नेपालभाषा ख्यलय् नाटक, ख्यालः म्हिताः पलाः न्ह्याकाः प्याखँया माध्यमं थःगु लोकप्रियता शिखरय् थ्यंकूम्ह छम्ह सामान्य व्यक्ति खः। तर वइगु संघर्ष, लगन अले निस्वार्थ भावनां यानाः स्वतन्त्र संसार महर्जन मदुगु इलय् सकल नेपालभाषा मनोरंजन ख्यःयात हे शोकाकुल याना थकल ।
नेपालभाषा ख्यलय् नं आपलं हे कलाकारपिं दिवंगत जुयावंगु दु । तर स्वतन्त्र संसार महर्जन मदुगु इलय् सकल हे नेपालभाषा मनोरंजन ख्यः स्तब्ध जूगु दु । स्वतन्त्र संसार महर्जनं थःगु क्यारियर शुरु याःबलय् छम्ह सामान्य कलाकारकथं हे प्याखँ दयेकाः याःगु खःसां जीवनय् छगू विचाः मयानाकथंया घटनां स्वतन्त्रया शारीरिक सबलताय् पंगः थना बिल । अर्थात स्वतन्त्रया स्पाइनल कर्डय् ट्युमर बुयाः वल, गुकिंयाना स्वतन्त्र जीवन मृत्युया संघारय् लात । तर विज्ञानया चमत्कार धायेमाः कि स्वतन्त्रं थःगु शारीरिक सबलताया मू पुलाः छगू मेचय् फ्यतुनाः थःगु जीवन हनेत बाध्य जुइ माल । स्वतन्त्रं थःगु स्पाइनल ट्युमरया अपरेशन सफल यायेगु निंतिं जीवनय् गुब्लें न्यासि वने मफइगु मू पुले माल । जीन्दगीं स्वतन्त्रयात छगू थासय् च्वना जीवन हनेगु निंतिं विवस यानाबिल । तर स्वतन्त्रं धाःसा जीवन लिसे हारे मचाः । नां हे स्वतन्त्र जुसेंनिं गथे छथाय् लिकुनाः च्वने फइ !
स्वतन्त्रया अपरेशन लिपा स्वतन्त्रं बुलुहुँ बुलुहुँ इभेन्ट यायेगु पाखे ज्या न्ह्याका हल । स्वतन्त्रया संलग्नताय् सांस्कृतिक ज्याझ्वः, म्यूजिक भिडियो अवार्ड, अनलाइन म्येहालेगु कासा, सांगीतिक कासा थें आपलं हे ज्यायाना वंगु खः । थुकिं दकलय् बांलाःगु पक्ष धैगु हे थज्योगु ज्याखनय् ब्वति कयाः आपलं हे नेवाः कलाकारपिन्त छगू प्लाय्टफर्म चु लाःगु खःसा नेपालभाषा ख्यलय् म्यूजिक भिडियो अवार्ड थें जाःगु तःजिगु ज्याझ्वः यानाः आपलं आपाः कलाकारतय्त हःपाः ब्यूगु खः ।
स्वतन्त्र संसार महर्जनं म्हो इलय् हे थुलि याकनं सकलसिगु नुगः त्याकाः काःगु दु कि थौं वय्कः मत्यवं मदयेवं हे थुगु ख्यः शोकाकुल जुयाच्वंगु दु । वय्कःया योगदान नेपालभाषा ख्यलय् छु दु धैगु सुनां हतपत वाः चायेके मफय्फु । वय्कलं नेपालभाषा ख्यःयात थुलि गतिशील यानाच्वंगु दु कि गुलि मनूत थुगु गतिशीलतायात थुइकेत सक्षम नं मजू ।
वय्कलं गुब्लें नं थःगु शारीरिक असक्षमतायात त्वहः तयाः लिचिलेगु यानामदी । गुब्लें नं थःगु शारीरिक कष्टयात छगू साहानुभूतिया बाहाना दयेका मदि । स्वतन्त्र संसार महर्जनया नुगलय् सदां नेपालभाषा प्रतिया मतिना जक हे खने दु । नेपालभाषा ख्यलं नालेमाःगु धैगु हे स्वतन्त्र संसारया नुगः गुलि चकं व हे कथं थुगु ख्यः नालाः झी नं न्ह्यचिले माः । वास्तवय् स्वतन्त्र संसार महर्जन थःगु नितिं सिबें नेपालभाषाया निंतिं म्वानाच्वंगु खः धैगु खँ झीसं वाः चायेके माः। वय्कः सुखावति भुवनय् बासं लायेमाः ।
