संसार क्रियशन नेपालया क्रियटिभ डाइरेक्टर स्वतन्त्र संसार महर्जन मत्येवं मदुगुलिं नेपालभाषा ख्यः हे शोकाकुल जूगु दु । नेसं ११४५ दिल्लागा दुतिया खुन्हु सुथय् मदुगु खँ संसार्स अनलाइन टिभिया फेसबुक पेज पाखें जानकारी वःगु खः। छुं ई न्ह्यः निसें स्वतन्त्र संसार महर्जनयात उसाँय् मभिना वःगुलिं आकाझाकां किर्तिपुर स्थीत किर्तिपुर हस्पितलय् यंकुगु खः । ब्लड प्रेसर नं तसकं हे म्हो जुयाः वंगु खँ पारिवारीक श्रोतं जानकारी ब्यूगु खः । ताः ई न्ह्यः निसें स्पाइनल कर्डय् ट्युमर बुयाः वःगुलिं स्वतन्त्र संसार महर्जन न्यासि जुइत हे थाकुयाः व्हिलचेयर जीवन हनाच्वंगु खः । तर शारीरिक रुपं समस्या दुसां स्वतन्त्र संसार महर्जनं नेपालभाषा ख्यलय् संसार नेशनल स्टार म्यूजिक भिडियो अवार्डस्या स्वंगूगु संस्करण छुं ई न्ह्यः हे तिनि क्वचायेकुगु खः ।
स्वतन्त्र संसार महर्जनं संसार्स ग्रुप चायेकाः संसार अनलाइन टिभि, एस एस प्रिन्टिंग सर्भिस, संसार अनलाइन न्यूज लिसें आपलं हे ज्याखँ न्ह्याकाच्वंगु खःसा थीथी सम्मानया ज्याझ्वः, सांगीतिक ज्याझ्वः लिसें आपलं हे नेपालभाषा मनोरंजन ख्यःयात कःघानाः थःगु पलाः न्ह्याकाच्वंगु खः ।
वय्कःया निवार्णया कामना यानाच्वना ।
