लकडाउनया इलय् म्ये हालेगु लकस ब्वलंगु धासें म्ये हालामि राजेन्द्र सुवाल लकडाउनया ईया सदुपयोग यानागु खँ प्वंकलसा मेम्हे म्येहालामि बिपना शाक्यं जीवनया थ्व मोडय् थः आ मस्त ब्वलंकेगु जिम्मेवारी क्वचाये धुंकाः थःगु म्ये हालेगु इच्छायात हाकनं पुवंकागु खँ कनादील । अडियो नेपाल÷बीआर प्रोडक्सनं नेपालभाषाया न्हूगु म्यूजिक भिडियो “तिम्रो याद” सार्वजनिक याःगु ज्याझ्वलय् वरिष्ठ म्येहालामि जुजुकाजी रंजितया मू पाहाँ जुयाः झायादीगु खः ।
राजेन्द्र सुवाल व विपना शाक्यया सलय् हालातःगु थुगु म्ये पवनकुमार बुढाथोकीं च्वयातःगु खःसा बुद्ध सायामिं लसय् हनां संगीत संयोजन यानातःगु खः । सुरेन्द्र मानन्धर व सिवानी बज्राचार्यं निर्देशन यानातःगु थुगु म्यूजिक भिडियोलय् किरण जोशी व भिंतुना जोशीं अभिनय यानातःगु दु ।
थुगु ज्याझ्वः वरिष्ठ फोटोग्राफर राजभाइ सुवालया स्टुडियो क्रियटीभ डि स्टुडियोलय् जूगु खः सा ज्याझ्वलय् पाहां कथं नेवाः दे दबूया नायः पवित्र बज्राचार्य, वरिष्ठ सिने पत्रकार विजयरत्न असंबरे, संगीतकःमि बुद्ध सायामि लिसें म्येच्वमि पवनकुमार बुढाथोकीया उपस्थिति दुगु खः ।
