नेपालभाषा ख्यः, पत्रकारिता ख्यः वा मनोरंजन ख्यलय् अनेकौं चुनौतीपूर्ण स्थिती दयाच्वनिं अले वयाच्वनिं, अज्याःगु हाथ्याःया लिधंसा जुयाः खनेमदयेक हे थःगु भूमिका म्हीताच्वनिं । अज्यागु हे चुनौतीयात आत्मसात यानाः न्ह्यःने वःपिं नेपालभाषा ख्यलय् लुमंके माःम्ह व्यक्ति धर्मवीर शाक्य नं खः । गुम्हेसिया जीवन, बिचाः व कर्मं ईलोहं प्रकाशनया लुखां छगू युगया मार्ग निर्देशन याःगु दु । वंगु २५ दँ न्ह्यवंनिसें नेपालभाषाया थीथी पत्रिका पिथना वयाच्वंगु इलोहं प्रकाशनया संरक्षक धर्मवीर शाक्य ९४ दँया उमेरय् मदुगु झी सकलसिगु निंतिं अपुरणीय क्षति खः ।
वय्कःया भौतिक अनुपस्थितिं शून्यता ब्वलंकूसां वय्कलं क्यंगु लँपु, वय्कलं दयेकादीगु जग, वय्कलं तयादीगु पुसा थौं नं शब्द, भाषा, चिन्तनयानितिं उत्प्रेरणा बियाच्वंगु दु । नेपालभाषाया पत्रकारिता छगू कथंया संघर्ष खः, गन भाषा जक मखु, विचाः व पहिचानया नं रक्षा यायेमाः । थ्व खँ थुगु प्रकाशनया संरक्षक धर्मवीर शाक्यं वाःचाः । उकिं वय्कः थःगु जीवनकालय् ईलोहं प्रकाशनयात छगू संस्थागत संरचना दयेकेगु जक मखु, छगू भाषिक आन्दोलनया रूपय् स्थापित यायेत नं सफल जुयाच्वंगु दु ।
ईलोहं मासिक (मचा मासिक), लाय्कू (द्वैभाषिक पत्रिका), पेजथ्री (मनोरञ्जनात्मक पाक्षिक), नःलि (साहित्यिक लय्पौ), लिपि लय् पौ व लुँआखः (मौलिक रञ्जना लिपिपौ), अले अंग्रेजी भासं पिदंगु द नेवारल्याण्ड थेंज्याःगु थीथी विधाया प्रकाशन वय्कलं दयेकातःगु आधारभूत संरचनाया कारण सम्भव जूगु खः । थुपिं फुक्क पत्रिकात भाषा संरक्षण यायेगु माध्यम जक मखु, नेपालभाषा ल्हाइपिं पुस्तायात विविध रुचि व युग अनुकूल सामग्री उपलब्ध याकेगु माध्यम नं जुयाच्वंगु दु ।
धर्मवीर शाक्यं थःगु योगदानयात व्यक्तिगत सीमितताय् जक सीमित याये चाहे मजू । वय्कलं नेपालभाषाया पत्रकारितायात थः मस्त काय् व छय्यात समर्पित यायेत छगू लकस नं दयेकादीगु दु । अले थ्व चेतना छगू पुस्तां मेगु पुस्ताय् हस्तान्तरण नं जुयाच्वंगु दु। थ्व परम्पराया पुस्तान्तरणया छगू बांलाःगु दसु खः, गुगु परम्परा आः नं ईलोहं प्रकाशनया ज्याया शैली व उद्देश्यय् खनेदु ।
थौं धर्मवीर शाक्यप्रति श्रद्धाञ्जलि देछायेगु झ्वलय् वय्कःया योगदानप्रति गर्व यायेगु नापं उकियात निरन्तरता बीगु संकल्प नं यायेमाः । वय्कःया योगदान अले दूरदर्शिता, नेपालभाषाप्रतिया मतिना झी सकसितं प्रेरणाया श्रोत जुइमाः ।
धर्मवीर शाक्य भौतिक रूपं झी नापं मदुसां वय्कःया योगदान, वय्कःया बिचाः, वय्कःया म्हगस ईलोहं प्रकाशनया शब्दं भविष्यया योजनाय् म्वानाच्वनी । वय्कःया आदर्शयात अनुसरण यानाः नेपालभाषाया पत्रकारितायात अझ गहन, शक्तिशाली, जीवन्त दयेकेबलय् जक वय्कःप्रति झीगु श्रद्धाञ्जलि सत्य जुइ । न्ह्योने प्रत्यक्ष रूप वय्कः सकृय जुयाः खनेमदुसां ईलोहं प्रकाशनया छगू क्वातुगु थां व लिधंसा वय्कः हे खः । वय्कःया सुगतिया कामना यानाच्वना।
