नेपालभाषाया छपू न्हूगु म्ये ख्वप देय्या धौया प्रिमियर सिडिसि मल, सुन्धाराय् जुल । म्ये हालामि एवं म्ये च्वमि शिव भक्त गुरु (कृष्ण शाही)या च्वसा व सःलय् सुद्धलक्ष्मि श्रेष्ठं साथ बियाःतःगु दु । थुगु म्य् अनिल तुलाधरं संगीत व संयोजन यानातःगु खः । धौ धायेवं हे ख्वप देसय् नांजाःगु लिं थुगु हे भावार्थया लिधंसाय् थुगु म्ये दयेकातःगु खःसा म्येया छायाँकन ख्वपदेशय् हे यानातःगु दु ।
थुगु म्येय् संजु खड्गी व प्रिया धितालया जोडी दु । म्येय् न्ह्यइपुक्क कोरियोग्राफ करीना खड्गीं यानातःगु दुसा म्येया छायाँकन व सम्पादन सोहन मानन्धरं यानातःगु दु । थुगु म्ये अन्य कलाकार कथं जयलक्ष्मी बज्राचार्य, सुनिता शाक्य, माया मानन्धर, पूर्णदेवी श्रेष्ठ, शान्ता शाही नं दुथ्याः । म्येया निर्देशन सुरेन्द्र तुलाधरं यानातःगु खः ।
प्रिमियर ज्याझ्वलय् वरिष्ठ म्येच्वमि वि नन्द वैद्य मू पाहाँ कथं झायादीगु खः । म्येया बिषयलय् संगीतगुरु धनवहादुर गोपालिं टिप्पणी यानादीगु खः ।
