नेपाल सांस्कृतिक अन्तर्राष्ट्रिय चलचित्र महोत्सवया खुक्वःगु संस्करण माघ १७ निसें १९ गते तक जुइत्यंगु दु । थुगु महोत्सवय् ४७ गू देय्या ९८ गू संकिपा क्येनीगु खँ पत्रकार सम्मेलनय् घोषणा याःगु खः । शर्ट फिल्मया नापनापं फीचर फिल्म, वृत्तचित्र, एनिमेटेड फिल्म, लिसें मिसा अधिकार, बाल अधिकार व मानव अधिकार सम्बन्धी संकिपायात नं विशेष थाय् बियातःगु दु । महोत्सवया ग्वसाः खलः चलचित्र तथा संस्कृति केन्द्रया नायः सन्तोष सुवेदीया कथं २ मिनेटनिसें २.५ घण्टातक संकिपा महोत्सवय् दुथ्याकुगु दु ।
कासाया नितिं अन्तर्राष्ट्रिय व राष्ट्रिय निर्णायक मण्डल ल्यःगु खः । थुकी भारतया निर्देशक निपोन धौला, जर्मनीया फेबियन म्याथियास व इभिन बिराजी, बेलायतया च्वमि व निर्देशक लुइसा प्रिटोलानी, क्यानाडाया निर्देशक जुडी ग्लाडस्टोन, इरानया अभिनेत्री, च्वमि व निर्देशक तिमा तगिजादेह, बहराइनया निर्माता, निर्देशक व च्वमि इभा दाउद व रुसया इरिना बिराजी दुथ्याः।
नेपापाखें निर्णायकय् संगीतकार शम्भुजीत बास्कोटा, अभिनेत्री मिथिला शर्मा, निर्देशक दिपेन्द्र के. खनाल, अभिनेता प्रदीप खड्का, पत्रकार टिकाराम यात्री, अभिनेत्री सुरक्षा पन्त, निर्माता रौनकविक्रम कँडेल व निर्देशक दिनेश लिङदेन दुथ्याः।
दक्षिण एसियाली देय् भारत, बंगलादेश, व पाकिस्तानया लिसें पूर्वी एसियाली देय् चीन, जापान, थाइल्याण्ड, दक्षिण कोरिया, युएई, कतार, हङकङ, फिलिपिन्स, इन्डोनेसिया, व भियतनामया संकिपात थुगु महोत्सवय् ल्यःगु दु । अमेरिका, क्यानाडा, अष्ट्रेलिया, अर्जेन्टिना, बेलायत, फ्रान्स, इटाली, आयरल्याण्ड, जर्मनी, रुस, ट्युनिसिया, पोर्चुगल, पोल्याण्ड, हंगेरी, ग्रीस, फिनल्याण्ड, डेनमाक, बुल्गेरिया, चेक गणराज्य, व अस्ट्रिया, नं ल्यःगु दु ।
थुगु महोत्सवय् संकिपा क्यनेगु नापं संकिपाया सहलह, मास्टर क्लास, व कार्यशाला नं जुइ । उलेज्या ज्याझ्वः दरबारमार्गया क्यूएफएक्स सिनेमा राइजिङ मलय् जुइगु जूगु दु । थुगु हे हलय् निन्हु तक नियमित संकिपा क्यनेगु ज्या जुइगु खँ नं न्यनेदु ।
विकास बोर्डय् स्वन्हुयंकं संकिपा क्यनेगु, मास्टर क्लास, कला प्रदर्शनी यानाः महोत्सव क्वचाइगु जूगु दु । थीथी विधाय् उत्कृष्ट संकिपा, कलाकार, प्राविधिकपिन्त सिरपाः नं बी । नेपालभाषाया चीहाः संकिपाः चीपगु निलः नं थुगु फेस्टीभलय् दुथ्याःगु दु ।
