नेपालभाषा ख्यःया वरिष्ठ संगीतज्ञ एवं साहित्यकार योगेश वैद्यया लुमन्तिइ म्यूजिक भिडियो पितब्वज्या व सांगीतिक ज्याझ्वः किर्तिपुर सिनेप्लेक्सय् जुल । नेपाल कला संस्कृति उत्थान समाज व सीता संगीत स्मृतिया मंकाः ग्वसालय् थुगु ज्याझ्वःया जूगु खः । ज्याझ्वलय् नेपाल कला संस्कृति उत्थान समाजया पाखें विजयलाल डंगोलं लसकुस यानादीगु खः । वरिष्ठ लोकगायक, संगीतकःमि व गीतकार रत्न बेहोशीया सभापतित्वय् जूगु उगु ज्याझ्वलय् मूपाहाँ कथं ख्यालि जुजु मदनकृष्ण श्रेष्ठ व विशेष पाहाँ कथं कीर्तिपुर नगरपालीका मेयर कृष्णमान डंगोलयात ब्वनातःगु खः ।
ज्याझ्वलय् जनकवि दुर्गालाल श्रेष्ठया शब्दय् च्वयातःगु छ न्हूगु हे छेँय् छन्हु वनिं तिनि म्येया प्रिमियर जूगु खः । थुगु म्ये योगेश वैद्यं हालादीगु खःसा संगीत नं वय्कलं हे तयातःगु खः । म्येय् छुं ह्युपाः कथं हाकनं रेकर्ड यानां मिसा सः कथं रीता महर्जनया सः नं दुथ्याकातःगु दु । थुगु म्येया निर्देशन, छायांकन, सम्पादन राजेन्द्र डंगोलं यानातःगु दुसा परिकल्पना व सह–निर्देशन राजु महर्जन जुजुं यानातःगु खः । थुगु म्यूजिक भिडियोया मू परिकल्पना धाःसा नवीन चित्रकारं यानातःगु् खः। भिडियोस सुरज ब्यञ्जनकार व सुमिना महर्जनया अभिनय दु ।
ज्याझ्वलय् रीता महर्जन पाखें योगेश वैद्यया थीथी सांगीतिक प्रस्तुति नं न्ह्यब्वःगु खः । अथेहे ज्याझ्वलय् योगेश वैद्यया न्हापा हे रेकर्ड यानातःगु डकुमेन्टेशन नं न्ह्यब्वःगु खः । योगेश वैद्यया हे संगीतय् स्वपू मेगु म्यूजिक भिडियो नं क्यंगु खः । थुकी मध्ये छपू योगेश वैद्यया संगीतय् पूर्ण वैद्यया च्वसाय् पुचः म्ये जः त्वये मा नं पितब्वज्या जूगु खः ।
ज्याझ्वलय् पाहाँ मदनकृष्ण श्रेष्ठं योगेश वैद्ययात लुमंकुसे वय्कःलिसेया स्वापूया बिषलय् कनादील । सीता संगीत स्मृति पाखें नीता महर्जनं सुभाय् देछानादीगु खः ।
