नेपालभाषाया छपू लोकंह्वाःगु म्ये ‘छंगु ल्यूल्यू’ अमर चित्रकार व सरीता महर्जनया सलय् अमर चित्रकारं हे च्वयातःगु व भूपेन्द्र बज्राचार्यं संगीत लिसें संगीत संयोजन यानातःगु खः । थुगु हे म्येया लिधंसाय् छुं ई न्ह्यः निगू कासा जूगु खः । छगू टिकटक कासा अले मेगु क्याराओके कासा । थुपिं नितां हे कासाया लिच्वः लिसें सिरपाः इने ज्याझ्वः व सरिता महर्जनया सलय् हे छपू न्हूगु म्यूजिक भिडियोया प्रिमियर ज्याझ्वः यलया टाइम आउट रेष्टुरेन्टय् जुल । सरिता महर्जनया सभापतित्वय् जूगु थुगु ज्याझ्वलय् यल १६ वडाया अध्यक्ष निर्मलरत्न शाक्य मू पाहाँ व वरिष्ठ सिनेपत्रकार बिजयरत्न असंबरे विशेष पाहाँकथं झायादीगु खः ।
‘छंगु ल्यूल्यू टिकटक कासाय् मुक्कं १,१०६ म्हं ब्वति काःगु खः । सिरपा लः ल्हायेगु ज्याझ्वलय् न्हूपुस्तायात हःपाः बिइ कथं न्याम्ह प्रतियोगी पिन्त हःपाः सिरपा कथं म्हतिं १५००तका व दसिपौ नं लःल्हाःगु खः । थुकी बबिता रंजित, रेश्मा महर्जन, कृष्मा चित्रकार व सुयम चित्रकार, बिजय डंगोल लिसें ममता श्रेष्ठ व समीर शंखदेव प्रजापतिपिंत लःल्हाःगु खः ।
कासाय् लियांल्यू लाःम्ह निक्की बज्राचार्य देसारयात ५०००तका, ल्यू लाःम्ह श्रीजा अवालेयात १०,००० तका व न्हाप लिसें दकलय् आपाः भ्यूज दुम्ह श्रृतिका श्रेष्ठयात १५००० तका व ५००० तका तका लःल्हाःगु खः ।
उकथं हे थुगु म्येया क्याराओके कासाय् सविन रत्न शाक्य लियांल्यू लाःगु खःसा, ल्यू राजेश बज्राचार्य व न्हाप चन्द्र प्रजापति लाःगु खः । म्ये कासाय् न्हाप लाःम्ह चन्द्र प्रजापतियात छपु म्ये रेकर्डिङ नापं म्यूजिक भिडियो, ल्यू व लियांल्यू लाःपिंकासामिपिन्त म्ये रेकर्डिङया सिरपा देछाःगु दु ।
ज्याझ्वलय् न्ववासे म्येहालामि सरीता महर्जनं संगीतय् यक्व हे शक्ति दु व संगीतं हे जीवन हिला वनीगुलिं संगीतय् सकसितं हःपाः बिइमाः धकाः नुगः खँ तयादील ।
यल १६ वडाया नायः, निर्मलरत्न शाक्यं सरिता महर्जनं संगीत ख्यलय् यानाच्वंगु कुतःयात च्वछानादिल । वरिष्ठ सिने पत्रकार बिजयरत्न असंबरें न्हूगु प्रिमियर जूगु म्यूजिक भिडियो हायेके मतेया बिषय समालोचना यानादील ।
थुगु म्ये मनोज महर्जन व हसना महर्जनया जोडी दुसा म्येया संगीत अनिल तुलाधरया दु अले म्येया च्वमि आनन्द बज्राचार्य खःसा म्ये सरिता महर्जनं हालादीगु खः । थुगु म्येया निर्देशक राजेन्द्र महर्जन खः ।
ज्याझ्वलय् गायक अमर चित्रकार व निल शाक्यं छंगु ल्यू ल्यू म्येया टिकटक कासाया निर्णायक प्रकृया बिषयलय् न्ववानादीगु खःसा कासाया निर्णायक पिं भुपेन्द्र बज्राचार्य, निल शाक्य, अमोघवीर बज्राचार्य, सुरजवीर बज्राचार्यपिन्त नं हनापौ लःल्हाःगु खः ।
