न्ह्यः खँ
नेपालभाषाया संकिपाय् द्वन्द वा फाइट मदुगु मखु । न्हापांगु नेपालभाषाया संकिपाः सिलु प्याखनय् नं एक्शन वा फाइट गाक्कं दु । सिलु प्याखनय् हिरो भालु लिसे ल्वाइगु, डाकातय्गु पुचलं हिरोनं हिरोनीयात बचेयाना हइगु दृष्य सिलु प्याखँयात नं छगू एक्शन प्याखँ हे धायेफइगु स्थीति दु । उगु ईया हिन्दी संकिपाःया हे प्रभाव धायेमाः कि सिलु प्याखनय् थुकथंया एक्शन दुथ्याकातःगु जुल । राजमति संकिपाय् नं छुं छुं द्वन्दया दृष्य दुथ्यानाच्वंगु दु । तर अनं लिपा नेपालभाषाया प्याखनय् खासै एक्शन दुथ्यानाच्वंगु मजुल । अप्वः धैथे हे संकिपाः सामाजिक विषय बस्तु दुथ्यानाच्वंगु कारण द्वन्दया दृष्य म्हो हे जुयाच्वन । तर नेपाल संवत् ११२९य् जिपिं बदमाश मखु मुक्कं हे छगू एक्शन फिल्म कथं पिदन । अनं लिपा अंश संकिपाः पिथन । थुपिं निगुलिं हे प्याखनय् एक्शनयात प्राथमिकता बियातःगु खः । एक्शनं हे प्याखँ न्ह्यानाच्वंगु खः । थ्व हे झ्वलय् आः वहिदार बाबु प्याखँ सुकुन्दा फिल्मस्या लुखाँ पिदंगु दु । गुगु प्याखँ पुवंक हे एक्शनं जायाच्वंगु दु ।
बहिदार बाबु
बहिदार बाबु प्याखँया उद्देश्य मात्र मनोरंजन जक हे खनेदु। छुं कथंया सामाजिक सन्देश वा घटना न्ह्यब्वःगु खनेमदु । थौं कन्हे छेँय् छेँय् हे अतिकं यइपुक्क स्वइगु भारतया दक्षिण पाखेया प्याखं थें मनोरंजनयात हे जक बः बिइगु कुतः थुकी जुयाच्वंगु दु । प्याखँ स्वइबलय् नं झीगु मौलिक नेपालभाषाया साहित्य सिबें यक्व हे पाक्क परम्परागत रूपं स्वयाः वयाच्वनागु दक्षिण भारतीय प्याखँया सवाः बहिदार बाबुं बियाच्वंगु वाः चाइ । हिन्दी फिल्म शैलीं हे प्याखँया शुरुवात जुयाच्वंगु वाः चाइ । छगू बस्ती खाली याकेगु निंतिं छपुचः मनूत वइ । तर उगु बस्तीया हिरो वासु शाहीं इमिगु कुतःयात बिफल याना बिइ । थुगु ज्या तालाकेगु निंतिं ज्या ब्वःम्ह मनूया म्ह्याय् (शोभा महर्जन) उगु बस्तीइ खाली याकेत खँ ल्हाये धकाः वनिं । तर वैत छम्ह मिजं (सुरज नापितं) जंगलय् यंका अनुचित ज्या यायेत स्वइ गन वासु शाही वयाः बचे याइ । अन नं छगू द्वन्द जुइ । थुकींयाना वासु शाही व शोभा महर्जन दथुया स्वापु क्वातुइ । तर शोभाया बाया भूमिकाय् सुरज व्यंजनकारं धाःसा वासु शाहीयात स्याये धकाः वइ । अले वासु शाहीयात खनेवं हे सुरज व्यंजनकारं माफी फ्वनी। छाय्की वासु शाहीया ख्वाः धाःसा वहिदार वाबु (वासु शाही)या ख्वाः लिसे ज्वः लाः । आः वहिदार बाबुया सु खः व इमि दथुइ छु स्वापू दु धैगु खँ प्याखँ स्वयाः हे जक सिइके माली ।
कलाकार
वहिदार बाबु छगू मल्टी स्टारकास्ट संकिपा खः । थुगु प्याखनय् बासु शाही लिसें ख्यालि जुजु मदनकृष्ण श्रेष्ठ, लक्ष्मी गिरी, राजा राम पौड्याल, शुशील पोखरेल, रवि डंगोल, सुरज व्यंजनकार, सुरज नापित, शोभा महर्जन, आराध्या लक्ष्मी खड्गी, हरी घेमोसु लगायत आपलं मेमेपिं कलाकार दुथ्यानाच्वंगु दु । कलाकार कथं वासु शाही छम्ह साउथया सुपर स्टारया छवि थें च्वंक न्ह्यब्वयातःगु दु । पुरा प्याखनय् वासु शाहि छम्ह हे जक खनेदयाच्वंगु दु । कलकारय् शुशील पोखरेलया अभिनय् सशक्त जु ।
छम्ह खलपात्रया रूपय् जीवन्त अभिनय् शुशील पोखरेलया खनेदु । राजाराम पौडेल व लक्ष्मी गीरिया केमेस्ट्री हास्य चरित्र कथं न्ह्यब्वयातःगु दु । मदनकृष्ण श्रेष्ठ छगू चरित्र भुमिकाय् खने दु । हिराइन कथं शोभा महर्जन व आराध्यालक्ष्मी खड्गी बःचा धंगु भुमिकाय् खने दु । रवि डंगोल छम्ह हास्य कलाकार कथं परिचित जुसां नं थुकी छगु गम्भीर भुमिका बियातःगु दु । सुरज नापित व सुरज व्यंजनकार सपोर्टिंग भुमिकाय् जक दु ।
प्याखँया प्राविधिक पक्षयात स्वयेगु खःसा वासु शाहीया लेखन व निर्देशनय् तयार जूगु थुगु प्याखँ खः । छायाँकन, सम्पादन सोहन मानन्धरं यानातःगु दु । प्याखँनय् द्वन्द लक्ष्मण सेन्चुरीं निर्देशन यानातःगु दु । संगीत सावन देव श्रेष्ठया दु अले प्याखँया निर्मात्री रीता घेमोशु खःसा सह निर्माता डा. कृष्ण कुमार श्रेष्ठ दु ।
विश्लेषण
वहिदार बाबु नेपालभाषाया प्याखँ खःसां थुकीया बिषय वस्तु हिन्दी संकिपाः थें ताइ । थुगु कथंया बिषय वस्तु नेपालभाषा ख्यःया निंतिं न्हापांगु हे खः । ब्वलसाया भावना यात च्व न्ह्याका एक्शन संकिपाःया रूपय् नेपालभाषाया छगू संकिपाः निर्माण जूगु दु । दक्षिण भारतीय संकिपाःया प्रभाव आपलं लानाच्वंगु कारणं प्याखँया थी थी दृष्य थी थी लोकंह्वाःगु संकिपाः पाखें प्रभावित जूगु वाः चाइ । थुगु संकिपाःया दकलय् सबल पक्ष धैगु हे थुकीया द्वन्द निर्देशन खः । द्वन्द निर्देशक लक्ष्मण सेंचुरी यक्व हे मेहनत यानातःगु दु । लिसें थुगु प्याखँया मेगु सबल पक्ष मेकअप नं खः । एक्शन धुंकाः जुइगु घाः तसकं हे धात्थें लाःगु घाः थें च्वंक क्यनेत ताः लाःगु दु । एक्शन दृष्यया नितिं नं यक्व हे लोकेशन छ्यलातःगु दु । एक्शन संकिपाः कथं थुगु प्याखँ पुवंक हे ताः लाः धायेमाः ।
प्याखनय् मात्र निम्ह कलाकारपिं वासु शाही व सुशिल पोखरेलया चरित्रय् ध्यान बियातःगु खनेदु । थुपिं निम्हेसिया द्वन्दं हे प्याखँ पुवंक न्ह्यानाच्वंगु दु । नेपालभाषाया संकिपाय् थथे नायक व खल पात्रया आमने सामने वा पुवंक प्याखँ हे निम्ह चरित्रय् जक केन्द्रित जूगु प्याखँ म्हो हे जक दु । नेवाः प्याखनय् निम्ह चरित्रया तक्कर जुइगु प्याखँत नं तसकं हे म्हो । प्याखँयात न्ह्याकेत माःगु द्वन्द (कन्फिल्क्ट) मात्र निम्ह पात्रय् सिमित जुइगु बाखँ नेपालभाषा ख्यलय् कमी दु ।
प्याखँया संगीत पक्षय् नं न्हूगु् सवाः दु । बहिदार बाबुया टाइटल ट्राय्क कथं छपू रक म्ये न्ह्यथनातःगु दु । वहिदार बाबुया चरित्र न्ह्यब्वयेत थुगु म्ये वासु शाहीया चरित्र झन सेल्लागु अनुभव जुइ । प्याखँया संगीतं चरित्र निर्माण यायेगु पक्षय् ग्वाहलि जुइमाः धकाः थुगु प्याखनं हाकनं छक्व लुमंकाः ब्यूगु दु सा अकसर नेवाः प्याखनय् मेमेगु म्ये वा न्हापा हे हालातये धुंकुगु म्ये बरः कायेगु चलन नेपालभाषाय् जुयाच्वंगु दु ।
आलोचना
वहिदार बाबु नेपालभाषाया छगू सशक्त एक्शन फिल्म खःसा थुकीया फ्यासुगु पक्षत नं आपलं हे दु । प्याखनय् न्ववानातःगु संवाद नं तप्यंके हिन्दी प्याख पाखें ल्ह्ययाः अनुवाद यानातःगु थें ताये दु । उकथं हे वासु शाहीया फिट्नेस लेभल छम्ह हिरो थें मजूगु नं यक्वस्यां हे वाःचायेकुगु दइ ।
प्याखनय् आपलं हे कलाकारपिं दुगु अले यक्व धैथे नांजाःपिं कलाकार दुगुलिं सकसितं हे न्याय याये मफूगु थें नं ताया वइ । उकिइ द्यने हाकनं प्याखँया स्क्रिन प्ले सरर मवं । प्याखनय् आपलं हे दृष्य त मगाःगु वाः चाइ । थुगु प्याखँ क्वचायेकेत यक्व हथाय् चाःगु थें निर्माता निर्देशक खनेदु । प्याखनय् बाखं न्ह्याकेत स्क्रिनप्लेस सम्झौता यानातःगु वाः चाइ । प्याखँया छायाँकन पक्ष नं औसत हे जक दु । गनं सरर वंक छायाँकन यानातःगु दु । गनं म्वाःसां म्वाःसां अनावश्यक एंगल दयेकाः छायाँकन यानातःगु दु । द्वन्दया दृष्यय् यक्व मेहेनत यानातःगु दु तर व हे कथं मेमेगु दृष्य उलि सशक्त छायाँकन मजू ।
लिखँ
समग्रय् नेपालभाषा ख्यलय् छगू न्हूगु पहया नेवाः संकिपाः निर्माण जूगु दु । प्याखँ छक्व स्वये बह जु । दक्षिण भारतीय प्याखँ स्वये यःपिन्त थुगु प्याखनं छगू न्हूगु नेपालभाषाया संकिपाःया अनुभव बिइ ।
