ताः ई लिपा गायन क्षेत्रय् हाकनं पलाः न्ह्याकः वम्ह म्येहालामि अमर चित्रकारया छंगु ल्यूल्यू बाेलया न्हूगु म्येया प्रिमियर सिटिसि मलय् जुल। थुगु म्येय् सरीता महर्जन लिसे जानाः ज्वः म्ये कथं हालातःगु खः ।
ख्यालि जुजु मदनकृष्ण श्रेष्ठया मूपाहाँ, लोकगायक रत्न बेहोशी बज्राचार्यया विशेष पाहाँ व ललितपुर महानगरपालिका १६या अध्यक्ष निर्मलरत्न शाक्यया पाहाँ कथं झायादीगु खः ।
भूपेन्द्र बज्राचार्यं संगीत तयादीगु थुगु ज्वःम्येया रेकर्डिङ फिरोज बज्राचार्यं यानादीगु खःसा, थुगु रेकर्डिङ ज्योति म्यूजिकय् याःगु खः ।
रवि सायमिं निर्देशन व कृष्णभक्त महर्जनं कोरियोग्राफी, अमर चित्रकारं छायाँकन, सम्पादन व रंग संयोजन नं याःगु थुगु म्येया भिडियोलय् मनोज महर्जन, नेरिसा महर्जन, कृष्णभक्त महर्जन, निश्चल भुजेल, सुब्रिना चित्रकार लगायत कलाकारपिन्सं अभिनय यानादीगु दु ।
म्ये–भिडियोय् समा सनमकुमार श्रेष्ठ व विमला सापकोटां याःगु खः ।
ज्याझ्वलय् न्ववासें निर्देशक रवि साय्मिं प्रिमियर ज्याझ्वलय् धाःसा मनूत म्वः म्वः वइ थें नेवाः प्याखँ नं थथे यानाः स्वः वये माः धकाः धयादीगु खः ।
म्ये हालामि एवं म्ये च्वमि अमर चित्रकारं थुगु म्येय् नेवाः थाय्बाय्या मौलिक नेवाः नां छ्यलातइगु खँ कुला दिल ।
१६ वडाया नायो निर्मल रत्न शाक्यं यल, १६ वडाय् थें सकल वडाय् नेवाः कलाकार समिति दयेके माःगु खँय् बः बियाः दिल ।
म्ये हालामि सरिता महर्जनं म्येयात माया यानादीत इनाप यानादिल ।
मू पाहाँ ख्यालि जुजु मदन कृष्ण श्रेष्ठं म्ये हालामि अमर चित्रकारया बहुआयामिकत्वयात कुलादिल । वय्क छम्ह क्यामरा पर्सन, भिडियो सम्पादन याइम्ह, म्ये च्वमि व म्ये हालामि नं जूगु खँय् लय्ता प्वंकादिल ।
ज्याझ्वः रीजु महर्जनया सभानायोसुइ जूगु खः ।
