न्ह्य खँ
मगन इन्टरटेन्मेन्टं मद्दिक्क हे नेवाः म्यूजिक भिडियो व चिहाः संकिपाः पिकयाच्वंगु दु । मगन इन्टरटेन्मेन्टया लुखां नकतिनि हे थःगु युट्युबय् सलिंचाय् बोलया म्ये पिदंगु दु । छुं ई न्ह्यः हे जक नं मगन इन्टरटेन्मेन्टपाखें आर मानन्धरया च्वसाय् व जुजुकाजी रंजितया सलय् छंगु म्हगः गुलि बांलाः बोलया म्ये पिदंगु खः । उगु हे म्येया सिक्वेल धयाः छंगु म्हगः गुलि बांलाः २ ट्याग लाइन तयाः सलिंचा म्ये पिकाःगु खः । छंगु म्हगः गुलि बांलाः म्ये २९०k भ्यूज् पुलेधुंकुगु दु । थुगु हे म्येया सिक्वल कथं आधिकारीक रूपं हे नालाःतःगु थुगु म्ये सलिंचाय् खः । अथेला नेवाः म्ये वा म्यूजिक भिडियोया सिक्वल धकाः पिदंगु तसकं हे म्हो तर थ्व सिबें न्ह्यः कलाकार रूपेन्द्र श्रेष्ठं हालातःगु मुसुमुसु न्हिलाः छं म्युजिक भिडियोया सिक्वेल कथं छु जुल जुल म्ये पिदंगु खः ।
म्ये
सलिंचा म्ये सतिश महर्जनया सलय् हालातःगु म्ये खः । थुगु म्ये आर मानन्धरं च्वयातःगु खःसा म्येया संगीत नं सतिश महर्जनया हे खः । म्येया संगीत संयोजन दिनेश श्रेष्ठं यानातःगु दु । थौंकन्हे लोकंह्वानाच्वंगु किवर्ड – अय्लाया जःखः हे थुगु म्ये च्वयातःगु दु । म्येय् छम्ह मय्जुं अय्लाः लुना च्वंगु अले व हे लुनाः च्वंगु अय्लाः स्वयाः म्येच्वमिया मनय् अय्लाः लुनाच्वंम्ह मिसाया प्रति मतिनाया भाव जायाःवयाच्वंगु दु । शब्द तसकं हे सरल अले यइपुगु भावं च्वयातःगु दु । शब्दय् छुं विशेष खँग्वः मदुसां म्येयात माःगु कथंया लय् शब्दय् खनेदु । गाय्क सतिश महर्जनं म्येयात पुवंक हे न्याय् याना हालातःगु दु । संगीत संयोजन नं कर्णप्रिय जु । दिनेश श्रेष्ठं म्येय् ल्वयेक ट्रेडिशनल व मोर्डन संयोजन यानातःगु दु । म्ये न्यनिबलय् नं रेट्रो फिल ब्यू ।
भिडियो
छगू भ्वय्या लकसय् छम्ह मनू भ्वय् ननं हे छंगु म्हगः गुलि बांलाः म्ये स्वयाःच्वनिं अले उगु हे म्येया मोडल राष्ट्रिका शाक्य खनां मोहित जुइ । व मनुखं भ्वजय् अय्लाः लु वःम्ह मिसा नं राष्ट्रिका हे खंकाच्वनिं अले ड्रिम सिक्वेन्सय् वनां म्ये हाहां प्याखँ हुलिइ । मिजं कलाकारया भुमिकाय् रजिन महर्जन म्हिताच्वंगु दु । मिसा मोडलय् राष्ट्रिका शाक्य म्हिताच्वंगु दु । म्येय् कोरियोग्राफि देवेन्द्र महर्जनं यानातःगु दु । म्येया छायाँकन निरोज महर्जनं यानातःगु दु । निर्देशन, सम्पादन व स्क्रीनप्ले रजिन महर्जनं हे यानातःगु दु ।
विश्लेषण
नेपालभाषाया म्यूजिक भिडियो ख्यलय् सलिंचाय् म्ये छगू कर्णप्रिय लिसें स्वयेबलय् आनन्द वइगु कथंया भिडियो खः । भिडियोया कलाकार, छायाँकन, सम्पादन, म्येया बहाव सल्ल वनाच्वंगु खंकेफइ ।
थौंकन्हे अय्लाः खँग्वः दुथ्यानाच्वंगु म्ये लोकं ह्वानाच्वंगु दु । छुं ई न्ह्यः हे तिनिं अय्लाः लूवयाः म्ये तसकं हे लोकंह्वाःगु खःसा थुगु म्येय् नं अय्लाः खँग्वः छ्यलातःगु दु। थुगु कारणं नं म्ये लोकंह्वाइगु आश यानाकाये छिं । छाय्कि छगू ट्रेण्डय् वंगु खँग्वलं म्येया भ्यूजय् असर यानाच्वंगु दइ ।
म्येया च्वसाय् साहित्य ल्वाक ज्यानाच्वंगु दु । म्येया शब्द सरल जुसां म्येया भावय् अमूर्तपन नं ल्वाका ज्यानाच्वंगु दु । लुइत ला छं लुनाच्वन सलिखय्, मू सइवल मस्यू गय् गय् नुगलय् थें जाःगु भाव रोमान्टिक हे जू । तिरिरिरि छं लुनाच्वन सलिखय् घुनुनुनु बाजं थ्वयावल नुगलय् । म्ये थुकथंया अनुकरणात्मक शब्द छ्यलेगु तसकं म्हो जुइ धुंकल । तर च्वमि आर मानन्धरं थुगु कथंया सवाः म्येय् बियाच्वंगु दु सा थुगु म्येयात आधुनिक म्ये कथं नाले मछिं बरु पारम्परिक म्ये कथं हे नालेमाः ।
थुगु म्येय् प्रोडक्शन भ्याय्लु नं खंकेफइ । अकसर म्ये सुटिंग यायेबलय् लाइभ लोकेशनय् वनां सटिंगयाइ । तर थुगु म्येया निंतिं धाःसा सेट निर्माण यानां सुटिंग यानातःगु दु । प्रोडक्शन भ्यालु कथं अझ नं थुकी आपलं प्रोप्ससत थप याये फइथाय् दुगु खः ।
म्ये कोरियोग्राफि नं विशेष मेहनत यानातःगु खंके फइ । म्येयात छगू हुक स्टेप वा सीग्नेचर स्टेप थुकी मू कलाकारयात बियातःगु दु । थुकथंया स्टेप पुलांगु हिन्दी फिल्मय् देवानन्दं याइगु झीसं स्वयाःच्वनाःगु हे खः ।
म्यूजिक भिडियोया सम्पादननं बांलाः जु । भिडियोया अन्तिमय् इनभिजिबल कट् छय्ला सम्पादन यानातःगु दु । न्हापांगु शटय् रजिन व राष्ट्रिका प्याखँ हुलाच्वंगु शट दु सा टिल्ट शट लिपा हाकनं क्वय्या तल्लाय् रजीन महर्जन पासापिं लिसे च्वना भ्वय् नयाःच्वंगु लु वइ ।
अथे हे तुं थौं कन्हे छगू बानी वा विकृति कथं हे ननं हे मोबाइल स्वयेगु बानी झीगु जुयाच्वंगु दु । भडियोया मू कलाकार रजीन महर्जन नं थ्व हे परिस्थीतिइ खनेदयाच्वंगु दु ।
आलोचना
मगन इन्टरटेन्मेन्टया लुखां पिदंगु म्येय् न्ह्याब्लें हे छगू बिस्कं आशा दयाच्वनिं । थ्व हे कारणं नं म्येय्या हाइप अप्वयाच्वनिं । अझ थुगु म्ये अतिकं हे लोकंह्वाःगु म्ये, छंगु म्हगः गुलि बांलाया सिक्वेल धकाः नं प्रचार यानातःगु खः । थ्व हे कारणंनं थुगु म्येया छुं छुं पक्षयात थन दुवालेमाःगु नं दु ।
थुगु म्येय् छगू हे लोकेशनय् सिधयेकातःगु दु । म्येया हरेक दृष्य अंगःया अप्पा खने दु । म्येय् लोकेशनया विविधता क्येने मफूगु खँ थुगु म्यें स्वीकार याये माः । छगू हे लोकेशन खनेदइगु इलय् म्ये भचा मोनोटोनस खनेदयाच्वंगु दु ।
कलाकारया रूपय् दँ वःम्ह रजिन महर्जनं थःगु अभिनय् यायेगु इच्छा थुकी पुवंकुगु खने दु । म्येय् कलाकार दथुइ दयेमाःगु केमेस्ट्री रजिन व राष्ट्रिका दथुइ उलि खने मदु । उमेरं स्वःसां नं निम्हेसिया एज ग्याप फाय्क्टर थुकी खंके फइसा रजिन महर्जनंया रोम्यान्टिक हिरो जुइगु उद्देश्य रिजिडिटि खने दु । गुलि राष्ट्रिका सरल भावं खनेदु उलि रजिन सरल खंकेमफु । लिसें छथाय् निथाय् लिप्सिंगय् नं ताः मलानाच्वंगु दु ।
म्युजिक भिडियोया क्यारेक्टरय् रजिन महर्जन व पासापिं छथाय् भ्वय् नयाच्वंगु खनेदु । भ्वय् हे मनः से मोबाइल स्वयाच्वच्वं राष्ट्रिकाया हिसि ख्वालं रजिन ड्रिम सिक्वेन्सय् दुहांवनिं । अनंलि राष्ट्रिका लिसे रोमान्स यायां हे मस्त नं दइ तर छक्वलं हे व मस्त तनिं । हाकनं रोमान्सय् वनिं । छगू कथंया सिक्वेन्सय् थुगु म्ये सलल न्ह्यां मवनाच्वंगु दु । छक्वलं हे भ्वय् ननं हे ग्वार्चा ग्वाः पसलय् थ्यनी । ग्वार्चा ग्वाः पसःया चरित्र थनथाय् छाय् आवश्यक जुल धैगु खँ निर्देशकं न्यायोचित याये फयेमाः ।
लिखँ
मगन इन्टरटेन्मेन्टं मद्दिक्क हे नेपालभाषा ख्यलय् भिडियोत न्ह्यब्वयाच्वंगु बांलाःगु खँ खः । म्येया सुमधुर संगीत थुगु म्येया बांलाःगु पक्ष खः । म्ये न्यनेबलय् व स्वइबलय् नं सल्ल वंगु हे भाव खनेदु । ताः ई लिपा सतिश महर्जनया सलय् छपू बांलाःगु न्ह्यइपुगु म्ये पिदंगु दु ।
