दच्छि ति न्ह्यः हृदयप्रसाद मिश्रया अध्यक्षताय् नेपालभाषा संकिपा संघ चायेकूगु खः । थुगु संघय् न्वकु पत्रकार सुरेश किरण, छ्यांज्ये कलाकार श्यामसुन्दर सिल्पकार, दांभरि कलाकार अन्नपूर्णेश्वरी श्रेष्ठ जुयादीगु दुसा दुजलय् निर्देशक लिसें च्वमि आर्यम नकःमि, कलाकार शरद कसाः, गायक पवित्र कसाः, कलाकार कृष्णभक्त महर्जन, कलाकार अर्नेश्वरी शिल्पकार, कलाकार अन्नपूर्णेश्वरी श्रेष्ठ व अधिवक्ता जुजुकाजी महर्जन (कानुनी सल्लाहकार) दु । थुगु संघया संरक्षकया रूपय् डा. शान्तवीर सिंह तुलाधर च्वनादीगु खः ।
छुं ई न्ह्यः थुगु हे संस्थाया दुजः आर्यम नकःमिया नेतृत्वय् नेपालभाषा सिनेमा विकास केन्द्र नांया संस्था चायेकेवं छगू न्हूगु विवाद ब्वलंगु दु । छम्ह हे मनू निगु निगु संस्थाय् संरक्षक जुल धकाः हृदय प्रसाद मिश्र नायः जूगु संस्थां छगू वक्तव्य पिकाःगु दु । छगू संस्था चायेकाः छुं हे ज्या मयासे हाकनं मेगु संस्था चायेकाः नेवाः संकिपाकःमितय्त हे विभाजन यायेत स्वल धैगु मू आरोप बियाः उगु बक्तव्यय् धयातःगु दु । लिसें ‘नेपालभाषा संकिपा संघ’पाखें ज्या न्ह्याकेया लागिं प्यंगू करोड तका दां मुंकेगु बचं बियाः नेपालभाषा संकिपा संघया अस्तित्वय् दयेक दयेकं हे छुं सहलह तकं मयाःसे थःगु हे संरक्षकत्वय् व हे उद्देश्यया मेगु संस्था गठन यायेमाःगुया कारण छु खः ? धकाः न्ह्यसः न्यनातःगु दु ।
नेपालभाषा सिनेमा विकास केन्द्रया नायः कथं आर्यम नकःमि, निम्ह न्वकूपिं सबिन शाक्य व ज्ञानीशोभा तुलाधर नेवाः, मूछ्यान्जे सुनिता जुनु, छ्यान्जे नानीहेरा प्रजापति, दाँभरीं राजेन्द्रमान शाक्य, लिउ दाँभरीं कृता बज्राचार्य व मू दुजलय् अन्नपुर्णेश्वरी श्रेष्ठ, कृष्णभक्त महर्जन, केशरमान ताम्राकार, नरेश सुवाल च्वनादीगु दुसा कानून सल्लाहकार जुजुमान महर्जन व हामा कथं डा. शान्तबीर सिंह तुलाधर दु ।
ताः ई न्ह्यः निसें हे हृदय प्रसाद मिश्र, आर्यम नकःमि व सविन शाक्य जानाः यक्व हे नेवाः प्याखँ दयेकाः वयाच्वंगु खः। सुभाय्, न्याल्ल ब्यां, पपू मदुम्ह झंगः, तारेमाम् आदि प्याखनय् ज्यायानाच्वंपिं थौं संस्थागत रुपं विस्कं विस्कं संस्थाय् आवद्ध जुयाः सामाजिक संजालय् पिदनाच्वंगु, नेवाः ख्यःया नितिं दुर्भाग्य खनेदु ।
