न्ह्यःखँ
नेपालभाषाया संगीत ख्यलय् छगू आकर्षण दु । नेवाः म्ये हालेगु निंतिं नेवाः जक मखु गैर नेवाः लिसें गैर नेपाःमिपिंसं तकं नं मौलिक नेवाः संगीतय् भ्यलय् पुनेत तयार हे जुयाच्वंगु खनेदु । नेपालभाषा ख्यलय् आपलं हे म्यूजिक भिडियो गैर नेवाःतय्गु सलय् पिदनेगु यानाच्वं । थ्व हे झ्वलय् नेपाली संगीत ख्यलय् नांजाःपिं हस्ती राजु लामा व इन्दिरा जोशीया सलय् जेरी चाकुसे बोलया म्ये पिदंगु दु । ज्योति म्यूजिक थौंया इलय् नेपालभाषा म्यूजिक भिडियोया ख्यलय् तसकं हे सकृय जुयाः न्ह्यानाच्वगु दु । थ्व हे झ्वलय् जेरी चाकुसे पिदंगु खः ।
म्ये
म्ये च्वमि विश्वास बज्राचार्यया फेसबुक स्टाय्टस कथं लकडाउन अर्थात २०१९ पाखे च्वःगु खः । लकडाउनया सदुपयोग कथं थुगु म्ये फिरोज बज्राचार्यं लय्चिनां तयार याःगु खःसा नेवाः म्ये गैर नेवाःपिन्त हायेकाः प्रचार प्रसारय् नेवाः म्ये च्वन्ह्यायेमाः धैगु ताःतुनाः हे रिकर्ड याःगु खनेदु । म्ये छपू दोहरी पह दुगु कथं च्वयातःगु दुसा थुकीया संगीत आधुनिक सवाःया दु। निम्ह मतिनामि दथुइ न्ह्यसःलिसःया कालबिल यानां म्ये न्ह्यानाच्वंगु ख्यालि म्ये खः । माकुगु सवाः व चाकुगु सवाःया लिधंसाय् म्ये च्वयातःगु दु। राजु लामा व इन्दिरा जोशीया सलय् म्ये मनमोहक जु, कर्णप्रिय जु । संगीत नं तसकं हे सरल व छगू हे पायटर्नय् न्ह्यानाच्वंगु दु ।
भिडियो
थुगु भिडियोस निम्हं म्येहालामि कलाकारपिं राजु लामा व इन्दिरा जोशीं हे म्हिताच्वंगु दु । लिसें नेपालभाषाया निम्ह सकृयपिं कलाकार चिरिबाबु महर्जन व रविता बाकेया नं अभिनय दु । छगु सामान्य बाखं कथं राजु लामां जेरी छपाः न्यानां द्वछि वंगु द्येबा बिइगु व हिलाः ध्येबा लित बिइगु व उगु द्येबाया हाकनं मेगु जेरी व खुवा कायेका छ्वइगु खः । प्यम्हं हे कलाकारया अभिनय स्वभाविक खनेदु । तर चिरिबाबु व रविता बाकेया अभिनय धाःसा प्याखनय् हास्य पात्रं याइगु अभिनय् थें सवाः बियाःच्वंगु दु । राजु लामा व इन्दिरा जोशीयात नं पारम्परिक नेवाः वसः फिकातःगु दु । नेवाः वसः पुनेवं हे सकलें नेवाः थें खनेदइगु नेवाःतय्गु विशेषता हे खः । यलया नेवाः लाय्कुलि लिक्क लिक्क छायाँकन यानातःगु थुगु भिडियोलय् नेवाः थाय्बाय् अपुक्क छ्यलातःगु दु ।
विश्लेषण
नेवाः म्येय् थी थी विषयल व थीथी बिम्ब छ्यला च्वयातःगु दु । नेवाः म्येय् मरीचरीया नां तयाः तसकं म्हो हे जक म्ये दयेकातःगु दु । मरीया प्रसंग म्ये गनं गनं वयाःच्वं – गथेकी रसबरी नयां च्या त्वनांला च्या हे न्यालुल.., लाय्कुलिइ दरवार दु, असनय् प्यारा मरि दु.., छुचुंमरी छ्यारा छ्यारा, ग्वारामरी ग्वारा ग्वारा…., कुने सु वल ? धापलां ख्या… लाखमरी साः ला साः… सा…, गुलुमरी चाकुमरी चतांमरी,.. । यःमरिया बिषयलय् आपलं म्ये दु तर नं खुवाः व जेरीया विषयलय् म्ये मदुनी । नेपालभाषाया संगीत ख्यलय् म्येया दायरा अप्वयेकेगु कथंया ज्याखँ थुगु म्यें यानाच्वंगु तायेके माः ।
नेवाःतय्गु पारम्परिक लजगा कथं मरी छुइगु व मिइगु याः । नेवाः सभ्यताय् थुगु लजगा नं तसकं हे महत्वपूर्ण जू । नेवाः म्येय् वास्तवय् माःगु कथंया वातावरण व लकस थथे हे लजगाः खः । थुगु दृष्यं यानां म्येय् नेवाः पह वइ । छुं नं म्ये नेवाः म्ये धकाः क्यनेगु निंतिं वसः व शब्द बाहेक नं नेवाः परिवेश तसकं हे आवश्यक जू ।
निम्ह म्येहालामिपिं नेपालभाषा न्ववायेगुलिइ पोख्त मजुसां थुगु म्येय् उच्चारण उलि स्येनाच्वंगु खने मदु । नेवाः शब्दया उच्चारण व खस भाय्या शब्द उच्चारणय पानाच्वनी । तर म्ये थथे छुं कथंया गम्भीर असर लानाच्वंगु धाःसा मदु ।
आलोचना
नेपाली संगीत ख्यःया सुपरस्टारपिं राजु लामा व इन्दीरा जोशीया भिडियो नेपालभाषां पिदंगु खःसां थुगु भिडियोलय् वय्कःपिन्त न्ह्यब्वयाःतःगु वा प्रस्तुतिकरण उलि पाय्छि जुइक खनेमदु । लोकंह्वाःपिं कलाकारपिनिगु स्टारडम गुगु कथं प्रस्तु यायेगु धैगु खँय् ध्यान बिइ मफूगु खनेदु । तसकं हे सामान्य कथं जक वय्कः पिनिगु प्रस्तुति दु । भिडियो स्वयेबलय् छगू बांलाःगु मौका चुके जुल ला धैथे ताइ ।
भिडियोस कोरियोग्राफि नं दुथ्यानाच्वंगु दु तर मू कलाकारपिंसं छुं विशेष कथंया स्टेप बियातःगु मदु । छुं कथंया डान्स स्टेप थुगु म्येया माग नं खः । म्येया स्टेप पुरा मदुगु अवस्थाय् भिडियो भचा सवाः मदुगु खनेदु ।
भिडियोया निंतिं छायाँकन भचा सुधार यायेफइगु अवस्था नं दु । कलाकारपिन्त माःगु कथं स्टाय्ब्लिस यायेत छायाँकनया नं तःधंगु ल्हाः दइ ।
धात्थेंगु सुटिंग लोकेशनय् छायाँकन यायेगु हाथ्याः खः । मरी छुइगु धात्थेंगु लोकेशनय् क्यामरा एंगलया छुं समस्या खने दु । थज्योगु शटय् निर्देशक व छायाँकारं छुं चिट् शट म्हितेत आवश्यकता खनेदु ।
लिखँ
नेपालभाषाया म्यूजिक भिडियो ख्यलय् न्हू न्हूगु प्रयोग व कुतः जुयाच्वंगु दु । नेवाः म्येय् गैर नेवाःभाय् ल्हाइपिं नं यक्व हे मन बियाच्वंगु नं खनेदु । तर वय्कःपिन्त न्ह्यब्वइबलय् सामान्य नेवाः भिडियो कथं जक ब्वयां मगाः । छुं दँ न्ह्यः ओ मैंचा छंगु मिखा गुलि बांलाः बोलया म्ये युट्युबया ट्रेण्डिंग तक्क नं थ्यंगु खः । झीगु सोच चकनां वनाच्वंगु दु । थज्योगु सोचयात सकस्यां साथ बियाः अझ च्वन्ह्याकेगु लँपुइ न्ह्यां वने माः ।
