नुगः मछिंसे च्वनावइगु – वया मां, जि

न्ह्यः खँ
मगन इन्टरटेन्मेन्टया न्हूगु भिडियो वया मां जि म्येया प्रिमियर किर्तिपुर सिनेप्लेक्सय् जुल । भिडियो स्वयेत आपलं मनूत मनतयाः पियाच्वंगु खः । मगन इन्टरटेन्मेन्टया भिडियो धाये मात्रं हे थुकी छुं विशेष जुइ धैगु खँ सकस्यां हे सिइधुंकल । मगन इन्टरटेन्मेन्टं संवेदनशील विषयलय् भिडियो दयेकेगु याः । थ्व सिबें न्ह्यः नं व मनू सु मनु थें जाःगु म्यूजिक भिडियो व उच्च शिक्षा थें थौंकन्हेया विषयवस्तु दुथ्यानाच्वंगु शर्ट मूभी पिदनेधुंकुगु दु । थुगु म्ये नं संवदेनशील विषयलय् हे दयेकातःगु म्ये खः ।

म्ये
म्ये ताः लायेगु निंतिं म्येग्वः, संगीत अले शब्दया तालमेल उत्कृष्ट जुइमाः । थुगु म्ये नां जाःम्ह वरिष्ठ गीतकार श्याम तमोतजुं च्वयादीगु खः । श्याम तमोतजु व हे म्येच्वमि खः गुम्हेस्यां गाउँ गाउँ बाट उठ थें जाःगु कालजयी म्ये च्वयाःदीगु खः । थुगु म्येयात मेम्ह सुरं जाःम्ह संगीतकार सुरेन्द्र श्रेष्ठं संगीत तयादीगु खः । अले थुगु हे कुतःयात जीवन्त याःम्ह म्येहालामि रत्नशोभा महर्जनं हालातःगु म्ये खः । वय्कःपिं स्वम्हेसिया समिश्रणं मेगु छपू नुगलय् थिइगु म्येया श्रृजना जूगु दु गुगु म्ये न्यने मात्रं हे नुगः खुलुलु मिनिं । नेपालभाषाया म्येय् थज्योगु विशेषतां जाःगु म्ये तसकं हे म्हो हे जक दु ।

थुगु म्येया भाव स्वल धाःसा छम्ह मचां थः मांया ममतायात लुमंका च्वंगु भाव पिज्वयाच्वंगु दु । म्येय् आपाः हे कथ्य भाव पिदनाच्वंगु दु । वया मां जि .. शब्द ब्वनेबलय् जि वयाः मां ( म उस्को आमां) धाः थें जुइ तर कथ्य कथं धाःसा झीत सःतिबलय् झीस वया मां, जि वयाः धाइ । म्येय् धैगु हे लेख्य सिबें कथ्य जुइगु हुनिं थुगु शब्दं म्येया भाव हे बिस्कं यानाब्यूगु दु । म्येय् च्वयातःगु भाव आधुनिक मजू । थुकी मांया ममताया वर्णन लिसें मांम्ह मचायात म्वःल्हुका ब्यू धैगु खँग्वः नं छ्यलातःगु दु । थ्व ल्याखँ थुगु परिवेश थनिं २५÷३० वर्ष न्ह्यः या हे जुइमाः धकाः अनुमान याये छिं तर नं म्येया संगीत आधुनिक पहया दु । पारम्परिक नेवाः म्येया संगीत सिबें थुगु म्येया संगीत पाः । संगीतया वाद्यबादन नं पुवंक हे पाश्चात्य जुयाच्वंगु दु । प्लकिंग शैलीइ हालातःगु थुकी रत्नशोभाया सलं झन हे जीवन्त यानाब्यूगु दु ।

भिडियो
थुगु म्येया भिडियो मिखायात आनन्दया संसारय् दुबिंकीगु छगू माध्यम खः । भिडियो थुलि सल्ल न्ह्यां की गननं छुं मचाः मगाःगु खंके थाकु । भिडियोस छगू गरीव परिवारया परिवेश न्ह्यब्वयातःगु दु । मां व म्ह्याय्म्हं त्यासा पुले मफयाः म्ह्यायम्ह विदेश वनी अले ध्येबा कमेयानां साहुया त्यासा पुला बिइ तर थ्व हे दौरान धाःसा मांम्ह मदइ । म्ह्याय्म्ह ध्येबा कमेयाना वइ तर मां दइ मखु । म्येया शब्द कथं भिडियो तसकं हे पाय्छि कथं निर्माण जुयाच्वंगु दु । थुगु भिडियो निर्देशन यानादीइम्ह रजीन महर्जन अपालं हे बधाइया पात्र खः ।

भिडियोस कलाकार कथं सुनिता श्रेष्ठ व सुधा महर्जनया अभिनयया तारिफ न्ह्याक्व याःसां मगाः । सुधा महर्जन छम्ह सेल्लाम्ह कलाकार खः धैगु दसू थुगु भिडियोलय् खने दु । अथे हे थुगु भिडियोस नेपालभाषाया स्येल्लापिं कलाकार सुनिता श्रेष्ठ, लक्ष्मीकुमार महर्जन, रूपेन्द्र श्रेष्ठया भुमिकां झन हे जीवन्त यानाब्यूगु दु । मुख्यत सकलें हे कलाकारपिं निर्देशक रजीन महर्जनया नियन्त्रणय् खनेदु । सुनानं माक्व सिबें आपाः एक्टिंग यानाच्वंगु खने मदु । म्ये कथंया दृष्य दुथ्यानाच्वंसां गन नं नाटकीय पन खने मदु । भिडियोस सम्पादनय् न्हू न्हूगु प्रयोग यानातःगु दु । पाय्निंग शटय् हे फ्लायसब्याक क्यनातःगु प्रयोग थुगु भिडियोस खनेदयाच्वंगु दु । टेक्निकल रूपं तसकं हे थाकुगु थुगु शट खः । थुलि बःचा हाकःगु इलय् छगू बाखँयात कने नं तसकं हे मेहनत यानातःगु खने दु। भिडियोया स्क्रीन प्ले तसकं हे प्रभावकारी खने दु । थी थी शटस्या माध्यम अले नन् लिनियर रूपं न्ह्याकातःगु थुकीया बाखं तारिफ योग्य हे जू । भिडियोस निम्ह मस्त नं छ्यलातःगु दु । छगू फोन वइगु इलय् मस्तय्सं फोन वल धकाः सःतिइगु । अकसर मस्तय्गु शट् वइबलय् नेपालभाषाया म्यूजिक भिडियोस भचा आपाः फुटेज बिइगु याः । तर थुगु भिडियोस मुक्कं ३ सेकेण्ड जक थाय् बियातःगु दु। संकिपा श्रेष्ठ व आरुषि पोखरेलया थुगु शट नं स्वकुमिया मनय् ल्यनाः हे च्वनिं । अर्थात सुयांगु रोल ताःहाकः जुइवं व सकस्यां लुमनाच्वनि मखु धैगु दसू थुगु भिडियोलं बियाःच्वंगु दु ।

विश्लेषण
म्ये व भिडियो बिस्कं बिस्कं हे प्रोजेक्ट खःसां नेवाः म्यूजिक भिडियो उत्कृष्ट जुयाः पिदनीगु तसकं हे म्हो । थुगु म्ये थनी न्याद खुदँ न्ह्यः हे पिदने धुंकुगु म्ये खः । तर नं थुगु म्ये उलि लोकं मह्वाः । तर थुगु हे म्येया भिजुअल तयार जुइ धुंकाः थुगु म्ये स्वयाः ख्वबि दिके मफूपिं सुं हे मदु । तसकं हे संवेदनशील म्ये कथं पिदंगु दु । शायद थुगु म्येयात ई सिबें न्ह्यः या म्ये धकाः नं धाये ज्यु । म्ये तयार जूगु न्यादँ खुदँ लिपा तिनि हे थुगु म्ये लोकंह्वाःत । थुगु म्ये लोकंह्वाःगु या मेगु कारण रत्न शोभा महजर्नया सःयात न्याय् बिइफूगु अभिनय् पर्दाय् खने दुगुलिं नं खः । छपू उत्कृष्ट भिजुअल दयेकेगु बांलाःगु म्ये जक मखुसे तसकं बांलाम्ह कलाकारया आवश्यकता नं दु धैगु खँ थुगु भिडियोलं कनाच्वंगु दु । उकिं नेवाः म्ये नं उत्कृष्ट जुयाः मेमेगु भाय्या म्ये लिसे धेंधेंबल्ला यायेफू धैगु दसू थुगु म्ये खः ।

थुगु म्येय्या मेगु छता विशेषता यक्वस्यां बिचाः मयाःगु जुइफु । म्येया शुरुइ हे छगू नोइज् लयष्कभ वयाच्वनिं । मथुगु भासं छुं न्ववानाच्वंगु दु। वास्तवय् थुगु सलं भिडियोया मू कलाकार सुधा महर्जन देसं पिने च्वनाच्वंगु खँयात संकेत याइ । अले मेगु फ्लाय्स ब्याक लिपा प्लेनय् दुनेया दृष्यं व नेपाः लिहाँ वयाच्वंगु क्यनिं। थुगु कथंया सम्पादन ट्रान्जिक्शनयात एल कट् धकाः नं धायेगु याः ।

आलोचना
आलोचनाया ल्याखँ थुगु भिडियोस तसकं हे कुत्तुकुला जक छुं छुं खँ आलोचनात्मक मिखां खनिं । दकलय् न्हापा म्येया खँग्वःयात ध्यान बियाः स्वयेगु खःसा भौगोलिक रूपं थुगु म्येय् छ्यलातःगु भाषा पानाच्वंगु दु । वया मा जि सिबें नं वल मां.. जि वल वा गनं लिहां वःगु खःसा थ्यन मां जि धायेगु यक्व सरल व सल्ल वं । उकथं हे म्येया छगू लाइनय् आगमय् तयाः जिगु छ्यनय् चिकं थाना ब्यू यःमां धयातःगु दु । झीसं आगंयात पुजाः क्वथाया रूपय् छ्यलाच्वना तर भिडियोस क्यनातःगु नेपाली भासं आँगन व म्ये धायेत स्वयाःच्वंगु नं छेँ पिनेया भचा चकंगु थाय् खः । उकथं हे झीगु भाय्या विशेषता कथं झीसं चिकं छ्यनय् तिलेगु वा तिइ । छ्यनय् चिकं थाइ मखु । म्हय् जक चिकं थाइ । शब्दया अर्थय् हे म्येय् पानाच्वंगु खँय् थुकी कुँखिने बह जू ।

रचनाया ल्याखँ थ्व म्ये सिबें नं चिनाखँया सवाः वः । थुकी छ्यलातःगु शब्द व भावय् छम्ह कविं थः मांयात त्वताः थःगु लजगाया कारण पिने पिने चाःहिलाः जुयाः उकिं आः मां लुमंकाः थ्यंकः वया धकाः च्वयातःगु खः । तर भिजुअलय् धाःसा मांया त्यासा पुलेगु निंतिं म्ह्याम्ह विदेश वनां ध्येबा कमे याना छ्वयाः हइगु जुयाच्वंगु दु । भावार्थ व भावदृष्य नं थुकी पानाच्वंगु दु।

भिडियोया टाइम लाइन स्वल धाःसा नं थुकी भचा मेहनत मगाःगु खनेदु । भिडियोस छुं बर्ष न्ह्यः धकाः धयाःच्वं । तर नं फ्लायसब्याक व भिडियोया स्थीति २्/३ बर्ष जक पानाच्वंगु खनेदु । निर्देशकं सुधा महर्जनया स्वरूपय् यक्व दँया ह्यूपाः खनेदयाच्वंगु मदु । थुकींयाना म्येँ धयाच्वंगु भाव व भिडियोस क्यनाच्वंगु भावय् छुं भचा अनमेल खनेदयाच्वंगु आभाष जुइ ।

भिडियोया टाइमलाइनय् टेलिफोनया नं तःधंगु हे प्रभाव खनेदु। स्वदँ प्यदँया अन्तरालय् नं फोन वइगु इलय् छथासं मेथासय् सःतवनेगु मयाये धुंकल । सामान्य सिबें सामान्य परिवारय् नं सकसिकं मोबाइल फोन छगः घायेगु याः । थुगु दृष्यया ल्याखं थुगु भिडियोया टाइमलाइन घटि नं १०/१५ वर्ष लिहां वनेमाः । तर थुगु टाइम लाइन कथं कलाकारया रूपय् ह्यूपाः खने मदु ।

भिडियो अन्त तसकं हे माःगु सिबें आपाः नाटकीय खनेदु । रूपेन्द्रया संवादं कलाकार सुधा महर्जनया क्यारेक्टर अन्यौलय् लाः ।

मां मदुगु तर थःगु हे छेँय् लिहाँवःम्ह सुधायात थःपिनिगु छेँय् नु धकाः ब्वनायंकीगु भचा अन्यौल खनेदु । ख्वबिइ हुइकेगु दृष्य रोम्यान्टिक फिल बियाच्वंगु दु तर मचा धकाः सम्बोधन याइगु इलय् निम्ह दथुया स्वापू छु धकाः नं अलमल जु । बरु छेँया ताःचा ब्यू वःगु जुसा अझ सार्थक जुइगु खइ । लिसें सुधाया मांया कंसं न्ह्यय्नुया ज्या नं दनि धैगु संवाद टाइमलाइन व म्ये अलमल खनेदु ।

लिखँ
समग्रय् थुगु नेपालभाषाया छगू उत्कृष्ट म्येया दसू खः । कलाकार, संगीत, सः, निर्देशन अले सकतां हे पाय्छि म्ये खः। थुगु म्ये मेमेगु भायया म्ये लिसे धेंधेंबल्ला यायेबहगु म्ये खः । म्येया सफलताया कामना याना ।

(पेजथ्री दँ १९ ल्याः १९)