मनसुनया इलय् झ्वार्रर वा वये थें हे नेपालभाषाया संकिपा नं धमाधम पिदनेगु शुरू जूगु दु । ता ई न्ह्यः निसें सुटिंग जुयाःच्वंगु नेपालभाषाया संकिपा – इन्दिरा धिमे मैंचा या सुटिंग क्वचाल धकाः संकिपाया निर्देशक सुरेन्द्र तुलाधरं थःगु सामाजिक संजाल मार्फत जानकारी ब्यूगुया छवाः लिपा हे थुगु हे प्याखँया न्हापांगु पोष्टर सार्वजनिक यागु दु । थ्व सिबें छन्हु न्ह्यः गोपालकाजि कायस्थं लाखे आजुया पोष्टर सामाजिक संजालय् सार्वजनिक यायेवं नेपालभाषाया संकिपा ख्यलय् छुं भचा हलचल जूगु खने दु । नेपालभाषा ख्यलय् ताः ई न्ह्यः निसें पियाच्वंगु थुगु निगु प्याखनं नेपालभाषाया संकिपा ख्यलय् छगू न्हूगु उत्साह ब्वलंकुगु दु ।
इन्दिरा धिमे मैंचा नेपाःया न्हापांम्ह धिमे व नौबाजा वादक इन्दिरा लाछिमस्यु जीवनय् आधारित बायोपिक प्याखँ धकाः बय्बय् जुयाच्वंगु खः । ख्वपया भक्तपुर नगरपालिका वडा नं ५ निवासी इन्दिरा लाछिमस्युया जीवनमा आधारित थुगु प्याखनय् रोजीना सुवाल इन्दिरा लाछिमस्युया मू भुमिका दु सा थुकी रुपेन श्रेष्ठ, राजाराम भाम, नगिना जोशी, देव चन्द्र बज्राचार्य, लक्ष्मी कुमार महर्जन, विजय लक्ष्मी मानन्धर व मदनकृष्ण श्रेष्ठ नं मू भुमिकाय् दु । बि.के. फिल्मस्या ब्यानरमा थुगु बायोपिक पिदनेत्यंगु खःसा थुकीया मू निर्माता गोपाल कृष्ण महर्जन, लिसें सुरेन्द्र शाक्य, गोबिन्द महर्जन, सह निर्माता कथं डा. कृष्ण कुमार श्रेष्ठ, रंजना जोशी, गंगा मानन्धर, संजय शाक्य, उत्तम प्रधान नं दु ।
अथे हे लाखे आजु वइगु भाद्र १ खुन्हु प्रिमियर जुइगु धकाः प्याखंया वितरक गोपालकाजी कायस्थं थःगु सामाजिक संजालय् न्ह्यब्वयातःगु दु । थुगु प्याखँ नेपालभाषाया नांजाःम्ह निर्देशक आर्यम नकःमिं निर्देशन यानातःगु खःसा लोक बाखनय् आधारय् दयेकातःगु नेवाः प्याखँ खः । थुगु प्याखनय् आशिष्मा नकःमि, सोहित मानन्धर, मदनकृष्ण श्रेष्ठ, मदन दास श्रेष्ठ, नगीना जोशी, सुरज ब्यंजनकार व रुपेन श्रेष्ठ नं दु ।
थुगु निगुलिं हे प्याखँ बिके फिल्मस् या न्ह्यब्वयाः खः ।
