मनकामना केबुलकार व तिम्रो मेरो सम्बन्ध बाेलया निपु म्येया पितब्वज्या केबिएस लुभु प्रोडक्शन हाउसं छगू ज्याझ्वःयानाः पितब्वज्या जुल । वरिष्ठ कलाकार नगिना जोशी मूपाहाँ कथं झायादीगु पितब्वज्याय् म्येहालामि कल्पना श्रेष्ठया खस नेपाली भाय्या म्ये ” तिम्रो मेरो सम्बन्ध ” व परम थसिमि व दिपा महर्जनया ज्वम्ये “मनकामना केबल कार” या म्युजिक भिडियो लय् सः दुथ्यानाच्वंगु खः ।
ज्याझ्वलय् वरिष्ठ सिने पत्रकार विजयरत्न असंबरें निपु म्येया समीक्षा यानादिल । पाहाँ कथं झायादीम्ह भिन्तुना जोशीं नं नुगःखँ तयादिल । केबिएस लुभु प्रोडक्शन हाउसया कजि केबिएस लुभु या सभानायसुइ जूगु खः । पितब्वज्या जूगु निपु म्युजिक भिडियो मध्ये ” मनकामना केबुलकार ” म्येया च्वमि , लय् चिनामि नं परम थसिमि हे खः । वय्कया हे युट्युब च्यानलय् थ्व भिडियो अपलोड जूगु दु ।
थ्व निगुलिं भिडियो या निर्देेशक बाल मुकुन्द प्रजापति व क्यामेरा व एडिटींग शैलेश श्रेष्ठ लुभुयागु खःसा हुलाप्याखं स्यनामि किरण जोशी खः । नेवाः म्येय् किरण जोशी व श्रीजा अवालेया नापनापं जय रक शुशील, मुकेश बैद्य, अनिता महर्जन मालि, सुदेष्णा महर्जन, याङजी तामाङ्ग, प्रितिजा धमला, रोहणी श्रेष्ठ व श्रेया प्रधान पिन्सं नं म्हितातःगु दु ।
थ्व निगुलिं भिडियो या निर्माण परिकल्पना व निर्माण व्यवस्थापन केबिएस लुभुं यानादीगु खः । कल्पना श्रेष्ठं हालादीगु “तिम्रो मेरो सम्बन्ध ” या भिडियोखय् किरण जोशी व अनिता महर्जन मालिया नापनापं बाल कलाकार सुबिन श्रेष्ठ व मेमेपिं कलाकारय् शुशील महर्जन,रिया थकुरी व रफिना बादेया अभिनय स्वयेदु । थुगु म्येया संगीतकार जुगल डंगोल खः । म्ये निर्भान मिडिया युट्युबय् अपलोड यानातःगु दु ।
