तिबः द सपोर्टया निर्देशक रबि साय्मिया अभिव्यक्तिं आपलं हे पत्रकारतय्सं थौं तिबःया प्रेसमीटय् असन्तुष्टि प्वंकल । निर्देशक रवि साय्मिं तिबः प्याखँयात तिबः बिइगु ज्या कथं स्वयंम निर्माता व कलाकारपिन्त नं ‘पास’या व्यवस्था मयाःसे टिकट हे न्याकाः च्वनागु खँ धाःसें नेवाः पत्रकारतय्सं नं संकिपाःया टिकट न्यानाः स्वयाः बिइमाः धकाः न्ववानादिल ।
थुगु खँयात अखतं हे न्ह्यसः छुनां वरिष्ठ पत्रकार बिजयरत्न असंबरें थुगु प्रेसमितया उद्देश्य छु खः ? धकाः तकं न्ह्यसः तयादील ।
मेम्ह फोटो पत्रकार विक्रम खड्गीं टिकट न्यानाः स्वः ला वने तर हथाय् बथाय् थःगु ज्या त्वताः प्याखँ स्वनेगु सिबें थःगु लाःगु इलय् जक स्ववन धाःसा प्याखँया प्रचार लिपा मलाइला धकाः न्ह्यसः तयादिल ।
पेजथ्रीया सम्पादक दर्शनवीर शाक्यं नेवाः पत्रकारपिंसं टिकट न्यानां स्वयेमाःगु छुं तःधंगु खँ मखु तर तिबः संकिपाः पाखें नेवाः पत्रकारतय्त नं तिबः बिइगु निंतिं गज्योगु योजना दु धकाः नं न्ह्यसः तयादिल ।
नेपालभाषा टाइम्सपाखें राजेन्द्र निलः साय्मिं फिल्मया बजेट तसकं हे हाइ धाःगु प्रचार प्रसार जुल तर बिज्ञापनया निंतिं गुलि बजेट फ्यानातया धकाः न्यनादिल।
संचारकःमि विराजकाजी राजोपाध्यायनं थुगु प्याखँ दयेकाःगु उद्देश्य छु खः धासें टिकट जक मियाः ध्येबा कमेयायेगु खःकि सामाजिक संदेश बिइगु कुतः खः वा नेवाः प्याखँया प्रचार प्रसार खः धकाः न्ह्यसः छुनादिल ।
थुकिया लिसः बिइगु कुतःलय् निर्देशक रवि साय्मि तसकं हथाय् बथाय् प्याखँया ज्या क्वचायेका शो यायेमागुलिं इलय् हे पत्रकार पिंलिसे स्वापू तयेमफूत धकाः नं धयादिल । मुलरुपं नेवाः प्याखँया इतिहास हिलेगु कुतः यायेगु ताः तुनां नेवाः प्याखं क्षेत्रय् आः वंनिसें प्याखँ स्वः वनेत पासया ब्यवस्था हे खारेज यायेगु योजना न्ह्याकेत्येनागु धकाः निर्देशक रवि साय्मिं थःगु याेजना प्वंकादिल ।
प्याखँया निर्माता सरजु रंजितं प्याखँ निर्माणया इलय् छुं कथंया कंजुसी मयानागु व निर्माणयात आवश्यक बजेट थःम्हं उपलब्ध यानागु खँ धयादीगु खः ।
प्याखँ म्वःया प्रतिनिधित्व यासें कलाकार संघरत्न शाक्यं थःनं न्हापा छायाँकन याना जुयाःगुलिं थौंकन्हेया प्रविधि तसकं हे च्वन्ह्यायेधुंकल धकाः कनादिल । वय्कलं पत्रकारपिंसं थुगु प्याखँया बारे सत्यतथ्य रुपं समालोचना यायेत नं इनाप यानादिल ।
प्याखनय् छायाँकन यानादीम्ह अमर चित्रकारं थुगु प्याखँया छायाँकन हिमाली भेगय् यानां लिहां वयेगु दौरान थः याकःचा जुयाः खोंचय् लाःवंगु अले सुनां नं मखंगु इलय थःत खोंचं पिहांवये मफूगु व अन हे सिइला म्वाइला हे थेगान मदुगु इलय् सामान ज्वनिपिं ट्रेकर्स पिंसं अमर चित्रकार हालाच्वंगु सः तायेकाः रेस्क्यु याःगु, म्ह हे सिरिंग जूगु अनुभव नं कनादिल ।
प्याखँया संगीतकार भुपेन्द्र बज्राचार्यं थःगु थी थी म्ये न्यनां निर्देशक रवि साय्मिं संगीतया भाला ब्यूगु खँ कुलादिल ।
प्याखँया शो, किर्तिपुर, येँ लिसें स्वनिगः पिने क्यंवनेगु ग्वसाः दुगु खँ निर्देशक रवि साय्मिं कनादिल ।
