बहुप्रतिक्षित नेपालभाषा चिहाः संकिपा चिपगु निलःया प्रिमियर किर्तिपुर सिनेप्लेक्सय् भव्यरुपं जुल । योवन शाक्यया निर्देशनय् तयार जूगु थुगु चिहाः संकिपा थौंकन्हेया नेपालभाषा ख्यःया लोकंह्वाःपिं कलाकारपिनिगु अभिनय् दु । नेरिसा महर्जन, मनोज महर्जन, सुनिता श्रेष्ठ, चिरिबाबु महर्जन, नविन थेच्वमि,गंगा महर्जन, सलिना महर्जन, हसना महर्जन व मचा कलाकार कथं ओसमि रंजितकार दु ।
केशरमान ताम्राकारं थनिं ४० बर्ष न्ह्यः नेपालभाषा साहित्य सम्मेलनय् न्हाप सिरपा त्याकेत ताःलाःगु बाखंया लिधंसाय् थुगु प्याखँ दयेकुगु खः । छम्ह भाःत मदुम्ह मिसां हाकनं जीवन शुरुवात यायेत्यंगु परिवेशय् न्ह्यब्वयातःगु बाखं थुकी दु ।
जनकवि दुर्गालाल श्रेष्ठ, समाजसेवी एवं साहित्यकार हितकरवीर सिंह कसा व आख्यानकार मथुरा साय्मि विशेष पाहांकथं झायादीगु खः । कलाकार, प्राविधिक एवं थुगु प्याखं दयेकेत ग्वाहलि याःपिन्त वय्कःपिंसं दसिपौ लिसें खादां न्येकाः सम्मान नं याःगु खः ।
कलाकार पिनिगु सशक्त अभिनय् व उत्कृष्ट सिनेमेटोग्राफी थुगु प्याखँया बांलागु पक्ष खः । मेकअप आर्टिस्ट कथं सुस्मा परियार, प्रोडक्शन म्यानेजर उजय शाही, आर्ट निर्देशन राज्य लक्ष्मी महर्जन व फोटोग्राफी रोजश शाहीं यानातःगु खःसा प्याखँया छायाँकन व सम्पादन रक्की महर्जन व योवन शाक्यं यानातःगु खः ।
प्याखंया बिजिएम, यचु शाक्यं यानातःगु दुसा प्याखँया निंतिं टाइटल म्ये निभा डंगोलं हालातःगु दु । प्याखं शुरु याये न्ह्यः केशरमान ताम्राकारं बःचाहाकःगु रेकर्ड यानातःगु सन्देश नं न्ह्यब्वःगु खः ।
