गुज्ये मालाकार २०३६ सालं निसें हे प्रगतिशील म्ये पाखे प्रभावित जुयाः जन पक्षिय म्ये व संगीत पाखे लिनादिइम्ह किपूया श्रष्टा खः । वय्कः किपूलिइ जक सिमित मजुसे नेपाःया थी थी जिल्लाय् सांगीतिक ज्याझ्वः यानां प्रगतिशील म्ये हाला प्रचार यानादीम्ह संगीतकार खः । वय्कःलं हेटौंडा, नारायणघाट, विराटनगर, सिराहा, सरलाही, जनकपुर, पोखरा लिसें भारतया दिल्ली व कलकत्ताय् वनां नं थःगु सांस्कृतिक प्रस्तुति न्ह्यब्वयादी धुंकुम्ह ब्यक्तित्व खः । वय्कलं सच्छि सिबें आपाः म्येय् संगीत तयादी धुंकल । वयकःया संगीतय् झी नेवाः (जनकवि दुर्गालाल श्रेष्ठया च्वसा), काफल चरी म्ये मुना, म्याउ कि म्याउ मचा म्येचाः नं पिदने धुंकुगु दु ।
२०१६ सालय् कितिपुर वडा १०या भरयांपुखु त्वालय् वय्कःया जन्म जूगु खः। वय्कः १५ बर्ष दुगु इलय् निसें हे संगीत क्षेत्रयात थःगु कर्म क्षेत्र दयेकाः निरन्तर रुपं न्ह्यानाच्वनादीम्ह ब्यक्तित्व खः । वय्कलं संगीतय् जुनियर डिप्लोमा तक्क यानादिल । वय्कलं विशेष याना खस नेपाली संगीत व नेपालभाषाया म्येय् संगीत क्षेत्रय् सकृय जुयादिल । थौंया इलय् तक नं वय्कः ब्वनेकुथिइ छम्ह संगीत शिक्षक कथं आवद्ध जुयाःदी । जनचेतना पुस्तकालय्या साहित्य सम्मेलनय् जनकवि दुर्गालाल श्रेष्ठया रचनाय् संगीत तयादीगु हे वय्कःया दकलय् न्हापांगु म्ये खः ।
इन्द्रेणी सांस्कृतिक समाज विसं २०४४ सालय् स्थापना जुसांनिसें आ तक्क सक्रिय जुयाः हे संस्थाय् आवद्ध जुयाःच्वनादीगु दु । जनपक्षिय संगीतया उत्थानय् निरन्तर रुपं गतिशील जुयाःदिइगुलिं वय्कःयात पारिजात कला सम्मान २०७९ पाखें सम्मान नं लःल्हाये धुंकुगु दु ।
गुजे मालाकारया संगीतय् किर्तिपुरया जक मखु आपलं हे म्येहालामिपिन्सं थःगु सः बिइ धुंकल । थ्व हे झ्वलय् इन्द्रेणी सांस्कृतिक समाजं ‘गुजे मालाकारया लसय् सांगीतिक ज्याझ्वः’ या ग्वसाः ग्वःगु दु । थुगु ज्याझ्वस नांजाःपिं गायक जुजुकाजी रंजित, वीर प्रसाद भंसारी, सत्य नारायण मानन्धर, सतिश महर्जन, मथुरा महर्जन, दिपा महर्जन, रत्नशोभा महर्जन, रानीशोभा महर्जन, रोजी डंगोल श्रेष्ठ, गंगादेवी महर्जन, स्वस्ती महर्जन, प्रमिला महर्जन, वीर माया महर्जन, मोहन शोभा महर्जन, मीना महर्जन व रफेला महर्जन पिंन्सं सांगितिक प्रस्तुति न्ह्यब्वयेत्यंगु दु ।
ज्याझ्वः जेठया ३२ गते शुक्रवार जुइत्यंगु खःसा टिकटया मू १००० तका तयाः बेलिया नं ब्यवस्था यानातःगु दु ।
