फिल्मया टाइटलया कारण हे विवादय् वयाच्वंगु शर्ट फिल्म चिपगु नीलः अन्तत जेठ २६ गते किर्तिपुर सिनेप्लेक्सय् प्रिमियर जुइत्यंगु दु । युवा निर्देशक योवन शाक्यया थुगु प्याखँयात कयाः सामाजिक संजालय् यक्वस्यां हे नीलः धैगु चिप जुइमखु धकाः धयाःच्वंगु दु, तर साहित्य व साहित्यिक विम्बयात छ्यलाः च्वयातःगु थुगु बाखंयात थ्व नां हे दकलय् पाय्छि जु धकाः निर्देशक योवन शाक्यं धाःगु दु ।
चिपगु नीलः नेपालभाषाया बाखं साहित्यख्यलय् नांजाम्ह केशरमान ताम्राकारं च्वयातःगु “चिपगु नीलः” बाखनय् दयेकुगु प्याखँ खः । शहिद, आजु द्यः बाघ भैरब, ध्वः छध्वः रेखाया थें जाःगु शर्ट मुभिया अवार्ड विनर निर्देशक योबन शाक्यया हे पटकथा लेखनय् “चिपगु नीलः” तयार जूगु दु ।
सालुगु गाचा व अय्ला लूवया अले नकतिनिगु माया मदुला थें जागु तसकं लोकंह्वाःगु म्युजिक भिडियोया रील जोडी मनोज महर्जन व नेरिसा महर्जनया लिसे नबिन थेच्वमि, गंगा महर्जन, सुनिता श्रेष्ठ, सलिना महर्जन, चिरिबाबु महर्जन व हसना महर्जन व मचा कलाकार कथं थुकी ओस्मी रंजीतया नं अभिनय दुथ्यानाच्वंगु दु ।
थुगु शर्टफिल्मया सम्बाद लेखन उमेश स्थापितं च्वःगु खःसा, समाः सुषमा परियार, संगीतकार यचु शाक्य, प्रोडक्शन मेनेजर उजय शाही, प्रोजेक्ट मेनेजर ओम रन्जितकार व सजना महर्जन, किपालुमि रकि महर्जन खः ।
चिपगु नीलः या टाइटल ट्राय्क निभाः डंगोलं हालातःगु दु ।
