पेजथ्री बाःछिपौया ४०० ल्याः पिदंगु लसताय् लेजेण्डरी गायक जुजुकाजी रंजित लाइभ इन छैमले ज्याझ्वः तःजिक क्वचाल । छैमले रिसोर्टया मनमोहक सन्ध्याय् पेजथ्री सनिलया लसकुस, पेजथ्री बाःछिपौया सम्पादक व ज्याझ्वःया परिकल्पनाकार एवं संयोजक दर्शनवीर शाक्यं यानादीगु खः । पेजथ्री पत्रिकाया हरेक २५ अंकलिपा छुं नं छुं छुं ज्याझ्वः जुयाःच्वंगु पेजथ्रीया बाःछिपौया १९ बर्षया इतिहास कंसें ४०० ल्याः पिदंगु लसताय् थुगु पेजथ्री सनिलया ग्वसाः ग्वःगु खँ कनादील ।
ज्याझ्वःया शुरुवातय् हे जुजुकाजी रंजितया क्लाय्सिकल व सिग्नेचर म्ये, संकिपाः सिलु पाखें बांलाः मय्जु बांलाः हालादीगु खः । अनलिं छन्त लुमंकाः व लुँस्वां लुयाः हालादीगु खः । रत्नशोभा महर्जनं छु जुल रे म्ये व मिखाया अजलं जुजुकाजी रंजित लिसे ज्वः म्ये न्यंकुगु खः । थुगु म्ये लिपा छंगु लुमन्तिइ दुबि दुबि थें व छंगु म्हगः गुलि बांलाः न्यंकादिल। अनं हाकनं रत्नशोभा महर्जनया सलय् छल याना जुसां ज्यु बोलया म्ये न्ह्यब्वःगु खः । थ्व धुने वं हे मेगु ज्वः म्ये मकः जन्म कायेमाली न्ह्यब्वःगु खः । जुजुकाजी रंजितया मेगु सिग्नेचर म्ये नापच्वने मदुसा नं हाःगु खः थनं लिपा रत्न शोभा महर्जनया सिग्नेचर म्ये लिक्क वयाः न्यंकादीगु खःसा यःसां मयः पह ज्वः म्ये न्यंकाः ज्याझ्वःया अन्तिम प्रस्तुति कथं छन्त जि धात्थें यःगु खःसा हालाः क्वचायेकादीगु खः ।
ज्याझ्वलय् लेजेण्डरी सिंगर जुजुकजी रंजितयात पेजथ्री सम्मान लिसें झिंन्याद्व तका नगद नं लःल्हाःगु खः । माननीय शैलेन्द्रमान बज्राचार्य, बागमति प्रदेश संस्कृति पर्यटन एवं सहकारी मन्त्रीं थुगु सम्मान लः ल्हाःगु खःसा ईलोहं प्रकाशनया प्रबन्घ निर्देशक नरेशवीर शाक्यं दोसल्लां न्ययेकाः सम्मान यनादीगु खः ।
ज्याझ्वलय् पेजथ्री पत्रिकापाखें जुजुकाजी रंजित विशेषांक पिदंगु खःसा स्केच आर्टिस्ट अर्पिता शाक्यं च्वयातःगु जुजुकाजी रंजितया स्केच पोष्टर नं लःल्हाःगु खः ।
ज्याझ्वलय् छैमले रिसोर्ट पाखें नं जुजुकाजी रंजितयात सम्मान पत्र लःल्हाःगु खःसा १६ वडा कलाकार समितिं, यल पाखें नं हनापौ लः ल्हाःगु खः ।
सेभेन वण्डर्स ब्याण्डं साथ ब्यूगु थुगु ज्याझ्वलय् ब्याण्ड पाखें नं छपू थःगु हे प्रस्तुति नं देछाःगु खःसा ज्याझ्वः कल्पना बज्राचार्यं न्ह्याकुगु खः ।
