न्हापांनिसें म्ये हालेगु इच्छा दयाः नं थःगु प्रतिभा न्ह्यब्वयेत ताः ई पियाच्वनादीम्ह रोशना तुलाधरया निगूगु भिडियो भम्चा बोलया म्येया प्रिमियर सिटिसि मलय् जुल । रोशना तुलाधर एन टिभिइ विगत स्वंगु दशक निसें भिडियो सम्पादन यानाच्वंगु खःसा वय्कः म्येहालामि जुजुभाइ तुलाधरया म्ह्याय् नं खः ।
निल शाक्यया च्वसा व संगीतय् भुपेन्द्र बज्राचार्यया संगीत संयोजनय् थुगु म्ये तयार जूगु खः । म्येय् सुभाय् तुलाधर व नेहा मालाकारया जोडी दु । लिसें भिडियोस निल शाक्य व कृष्णभक्त महर्जनया नं अभिनय दु ।
रक्की महर्जनया छायाँकन, आर आरया भिडियो सम्पादन अले परिकल्पना व निर्देशन रामकृष्ण खड्गीया दु ।
ज्याझ्वःस पाहां कथं झायादीम्ह संगीता थापा शाक्यं रोशनया सः तसकं हे मनमोहक धकाः तारिफ यानादीगु खःसा मू पाहाँ वरिष्ठ साहित्यकार एवं समालोचक प्रकाश साय्मिं थुगु म्यें मिसां हे थः भमचा जुयाः मिजंयात ल्यःगुलिं मिसातय्गु न्हूगु क्रान्तिकारी पक्षयात उजागर यानाच्वंगु दु धकाः धयादिल ।
