२०२२ सालया भाषिक आन्दोलननिसें निरन्तर आःया ८१ साल तक्क म्ये हालाच्वनादीम्ह लेजेण्डरी गायक जुजुकाजी रंजित सनिल, पेजथ्री बाःछिपौया ग्वसालय् जुइत्यंगु दु । खुगू दशक तक्क मद्दिक्क म्ये हालाच्वना दीम्ह गायक जुजुकाजी रंजितया लोकंह्वाःगु थी थी नेवाः म्येया लाइभ अकेष्ट्रा सहित दक्षिणकालीया रामछे भञ्ज्यांगया ख्यातिप्राप्त ‘छैमले रिसोर्ट’य् बैशाख १८ खुन्हु जुइत्यंगु खः । पेजथ्री सनिलया थुगु ज्याझ्वलय् वरिष्ठ म्येहालामि जुजुकाजी रंजितलिसें मेम्ह लोकंह्वाःम्ह म्येहालामि रत्नशोभा महर्जनं व सेभन वण्डर्स ब्याण्डं नं नापं दु ।
ज्याझ्वःया मुख्य आकर्षण जुजुकाजी रंजितया लोकंह्वाःगु नेपालभाषाया म्ये, ज्वः म्ये लिसें रत्नशोभा महर्जन व सेभेन वण्डर्स ब्याण्डं नं नेपालभाषाया म्ये हालेत्यंगु दु । वरिष्ठ म्येहालामि जुजुकाजी रंजितयात पेजथ्री सम्मान लःल्हाइगु ज्याझ्वः नं दु । ज्याझ्वलय् पेजथ्री पाखें जुजुकाजी रंजित विशेषांक व वय्कःया स्केच पोष्टर नं पिदनी। वैशाखया १८ गते छन्हू चा अन हे च्वनाः वैशाखया १९ गते मइ दिवस बिदाया दिनय् लिहाँ वयेगु ज्याझ्वः दु ।
जुजुकाजी रंजित नेपालभाषा आन्दोलनं पिलुवम्ह छम्ह म्ये हालामि खः – जुुजुकाजी रंजित । २०२२ सालय् रेडियो नेपालं नेपालभाषाया ज्याझ्वः लिकायेवं स्वनिगलय् भाषिक आन्दोलन तच्वया वन । उगु इलय् थीथी थासय् जुइगु सांस्कृतिक ज्याझ्वलय् वय्कलं म्ये हालेगु यानादिल । वय्कलं दकलय् न्हापा सत्यनारायण राजभण्डरी नाप जानाः हालादीगु म्ये खः ‘पासा उगु दिं वइ तिनि स्वः, म्ह्याय् बुलं धायेवं ख्वइ मखु मांपिं’ ।
भाजु जुजुकाजी रंजित खतु छम्ह हाइड्रोपावरया इन्जिनियर खः । नेपालय् दकलय् तःधंगु हाइड्रो पावर काली गण्डकीया वय्कः प्रमुख जुयाः ज्या यानादी धुंकूगु दु । थौंकन्हय् वय्कः रिटायर्ड जिन्दगी हनाच्वनादीगु दु । नेपाल विद्युत प्राधिकरणया इन्जिनियर जुयाः देय् थीथी हाइड्रो पावरया ज्याय् व्यस्त जुयाच्वंसां वय्कलं संगीत क्षेत्रय् नं थःत उलि हे न्ह्यब्वयेगु ज्या यानादीगु दु । भाजु रंजितं थःगु व्यस्तगु जागिर जिन्दगीया दुने प्यसः स्वयां अप्वः म्ये हालादी धुंकूगु दु । वय्कलं नेपालभाषाया लिसें नेपाली म्ये नं हालेगु यानादीगु दु ।
उगु इलय् जीवन दबू ज्याझ्वलय् म्ये हालाः थःगु सांगीतिक यात्रा शुरु यानादीगु खः । उगु यात्रा आः तक नं निरन्तर न्ह्यानाच्वंगु दु । सिलु प्याखंया मिजं सः फुक्कं वय्कः याकःचिया खःसा उकथं हे वय्कलं नेपाली चलचित्र ‘भुमरी’, ‘रक्षा’ व ‘सुन्दरी’ प्याखनय् नं थःगु सः बियादीगु दु । नेपाभाषाया चर्चित म्ये ‘नापच्वने मदुसां’, ‘यःसां मयः पह यायेमते मय्जु’, ‘छन्त जि धात्थे यःगु खःसा’ , बांलाः मय्जु बांलाः, , थें जाःगु आपालं लोकंह्वाःगु म्ये लेजेण्डरी गायक जुजुकाजी रंजित सनिलय् हालीगु जूगु दु ।
