मगन इन्टरटेन्मेन्टया लुखां बहुप्रतिक्षित म्ये वया मां जि, थौं किर्तिपुर सिनेप्लेक्सय् प्रिमियर जुल । वरिष्ठ म्ये च्वमि श्याम तमोत (गाउँ गाउँबाट उठ)या च्वसां पिज्वःगु थुगु म्येय् तसकं मर्मस्पर्शी सलय् रत्नशोभा महर्जनं हालातःगु दुसा थुगु म्ये सुरेन्द्र श्रेष्ठया संगीतय् तयार जूगु म्ये खः । म्येयात जीवन्त यासें मूर्त रुप बिइगु झ्वलय् निर्देशक रजीन महर्जनं नेपालभाषाया हे छगू उत्कृष्ट भिडियो न्ह्यब्वःगु दु । थुगु भिडियोस सुनिता श्रेष्ठ, सुधा महजर्न लिसें लक्ष्मीकुमार महर्जन, रुपेन्द्र श्रेष्ठ व सुबन जोशीया नं अभिनय दु ।
ज्याझ्वलय् म्येया बिषय न्ववाःसें म्ये च्वमि श्याम तमोतं – अकसर झीसं प्याखँ दयेकीबलय् प्याखँया घटना काल्पनिक खः धकाः न्हापा हे सुचं बिइ तर थुगु म्ये यक्व हे मनूतय् जीवनय् न्ह्यानाच्वंगु व थुकीया कारणया अन्त जुइ आवश्यक जु धकाः कनादील ।
म्येया संगीतकार सुरेन्द्र श्रेष्ठं थुगु म्येया खँग्वः न्यनेसातकं हे थःगु मेमेगु ज्याखँ त्वताः थुगु म्ये निं कम्पोज यानागु खँ कनादील ।
मू पाहां ख्यालि जुजु मदनकृष्ण श्रेष्ठं थ्व म्ये स्वयाः थःगु ख्वबि दिके मफूगु खँ कुलादिल ।
ज्याझ्वलय् मगन इन्टरटेन्मेन्टया संस्थापक दुजः विक्रम महर्जनं सुभाय् देछानादीगु खः । भिडियोस स्वापूदुपिं कलाकार एवं प्राविधिक पिन्त दसि पौ नं लःल्हाःगु खः । ज्याझ्वलय् थुगु हे म्येया खस भासं नं पिथंगु खः । खस भासं संगीतकार सुरेन्द्र श्रेष्ठं म्ये हालादीगु खः ।
