न्ह्यः खँ
नेपालभाषाया वरिष्ठ एवं अग्रज संगीत साधक हनेबहम्ह योगेश वैद्य मत्यवं मन्त । ताः ई न्ह्यः निसें हे वय्कः उसाँय् मदयेका छेँय् हे आराम यानाच्वनादीगु खः। वय्कः पेजथ्री पिपल्स च्वइस अवार्ड ११३० न्हापांगु संस्करणय् अवार्ड लः ल्हायेत झायादीगु खः । हेल्थ कन्सियस जुयाः च्वनादीम्ह वय्कः योगेश वैद्य मत्यवं हे थुगु लोक त्वःता झायादील ।
मूल्य व मानन्यता
श्रष्टा योगश वैद्य नेवाः संगीतय् विशेष रुची तयादीम्ह ब्यक्तित्व खः । नेवाः म्येया छुं नं न्हूगु पुंलांगु खँयात वय्कलं दुनुगलं निसें मनन यानादी । नेपालभाषाया म्येहालामिपिंसं वा सुं नं छम्ह गायकं न्ह्योनेलाःथे म्ये हाले मज्यू धैगु मान्यता दुम्ह ब्यक्तित्व खः । वय्कःया मूल्य मान्यता कथं म्येय् दकलय् महत्व पूर्ण पक्ष धैगु हे छम्ह म्येहालामिया सः खः । सलं हे म्येयात जीवन्त याइ । छम्ह म्ये हालामिं म्येया शब्द भावयात थुइकाः म्ये दुबे जुइफुसा जक म्ये हालेगुया अर्थ दइ धैगु वय्कया मान्यता खः । संगीत जक सुमग्धुर जुइवं नं म्ये सफल जुइ मखु । मखुसा संगीत जक (इन्स्ट्रुमेन्टल) न्यंसां गाः। छाय्की अन संगीतया हरेक सुर पाय्छी जुयाः च्वनिं तर नं झीत थिइगु धैगु गायकया सलं खः । उकिं म्ये ताःलायेत सः दकलय् महत्वपूर्ण अले छम्ह म्येहालामिं रियाज यायेगु नं दकलय् महत्वपूर्ण जू ।
वय्कःया कथं सः प्राकृतिक खः । म्ये हालिइम्ह मनूया सः प्राकृतिक रूपं हे सरल व स्वच्छ जुइ माः । सुयाकें प्राकृतिक रूपं हे सः दइ । थुकीयात निखार हयेगु निंतिं रियाज आवश्यक जू । तर जबतक्क छम्ह गायकयाके संगीतया ज्ञान दइ मखु अले शब्दया भावया ज्ञान दइमखु अज्योपिंसं हाःसां म्येयात न्याय जुइ मखु । थुगु हे मूल्य व मान्यतायात नालाः नं मगाः छम्ह गायकं न्हू न्हूगु सवाः लिसें न्हू न्हूगु पह अथवा ई कथं न्ह्यानाच्वने माः धैगु नं वय्कःया मान्यता दु ।
अकसर थौंकन्हे नेवाः म्ये कम्पोज जुइगु इलय् म्येया भाव हे मथुइकं पूर्व तयारी लसय् म्ये पूर्वनिर्धारीत ढाँचाय् न्ह्यंकीगु खँय् नं वय्कलं असन्टुष्टि प्वंकादी । नेवाः म्येया थःगु हे विशेषता दुगु खँय् सकस्यां वाः मचायेकु धैगु नं वय्कःया खँ दु ।
पेजथ्री अवार्डया मेन्टर
हनेबहःम्ह योगेश वैद्यजु लिसे पेजथ्री अवार्डया सिलसिलाय् थनिं १४ दँ न्ह्यः दकलय् न्हापां औपचारिक रूपं हे नापलानागु खः । वय्कलं पेजथ्री अवार्डया मूल्यांकन प्रकृयायात समर्थन यानादीगु खः । कारण संगीत धैगु गुब्लें नं हिसाबय् थें ल्याः चाःया रूपय् नम्बर बिइफइमखु अले सुंनं निर्णायकया मूल्यांकन मुक्कं ब्यक्तिगत जुइगु कारण थ्व बिषयगत खँ जुयावनिं । मुक्कं निर्णायकया जक आधारय् सुयातं अवार्ड बिइगु थौंया इलय् पाय्छि मजुइफु । तर निर्णायकतय्सं ल्ययातःगुयात पिपुल्स च्वइस अर्थात आम् नेवाःतय्सं समर्थन याःगु म्येयात अवार्ड बिइमाः धैगु पक्षय् वय्कलं समर्थन यानादी ।
न्हापांगु अवार्डय् वय्कःया अनुभवयात छ्यलाः सुं नं निर्णायकं पूर्णांक बिइ दइ मखु अले छुं नं श्रृजनायात न्यूनतम ल्याखं म्हो बिइ दइमखु धकाः मार्ग निर्देशन यानादीगु खः छाय्घाःसां सुनां नं यदि थःत यल धायेवं पूर्णाक बिइवं मेमेपिं निर्णायकया लिच्वलय् असर लाइगु खँय् वय्कः सचेत जुयादी । थुकिंयानां सुं छम्ह निर्णायकया निर्णय नामांकनय् हावी मजुइमा धैगु नं वय्कःया बिचार खः ।
निक्वःगु पेजथ्री अवार्डय् नेवाः म्येहालामिपिं लिसें गैर नेवाः म्येहालामिपिं नं यक्व हे दुथ्याःगुलिं गैर नेवाः म्येहालामिपिंत नं दुथ्याके माः धैगु वय्कःया हे खँ खः । थ्व हे कारण निक्वःगु पेजथ्री अवार्डय् गैर नेवाः सः कथं निताः क्याटागोरी तनागु जुल।
अथे हे स्वक्वःगु पेजथ्री अवार्ड थ्यंगु इलय् आधुनिक नेवाः म्येया स्तर न्हापा सिबं छुं भचा सन्तोषजनक स्थीतिइ थ्यंगु वय्कःया मूल्यांकन दु । दुहांवःगु म्ये मध्ये आपलं हे लुधनेगु थाय् दुगु खँ वय्कलं कनादीगु लुमं ।
प्यंगूगु संस्करणया अवार्डय् नेवाः म्ये नेवाः म्येहालामिया विविधतायात सम्मान याःसें थी थी कथंया विधा दयेकेगु खँय् वय्कःया हे मार्गनिर्देशन पालन यानागु खः । वय्कलं गब्लें हे थथे याः वा अथे याः धकाः धया मदी । तर वय्कलं झीगु न्ह्योने थज्योगु थज्योगु लँपु दु धकाः न्ह्याब्लें व लँपु क्यनादी । छुं नं निर्णययात वय्कलं गुब्लें नं टिप्पणी यानामदी तर हरेक निर्णययात सम्मानपूर्वक कयादी ।
निर्णायक
हनेबहम्ह योगेश वैद्यजुयात थः पेजथ्री अवार्डया निर्णायक खः धकाः सार्वजनिक यायेगु इच्छा मजू । थौं वय्कः मदये धुंकाः थुगु खँ पितहःसां छुं मपाइगु ई खः । सुं नं मनू निर्णयक धकाः सिइव यक्व हे अनावश्यक प्रेसर ब्यूवइगु व थी थी कथं उपहार ज्वनाः हेयकः वइगु कारण गुलिं गुलिं नेवाः कलाकारपिं कलाकार हे मखु धैगु तकं वय्कःया धारणा दु । कलकारं थःगु क्षमतां दर्शकया नुगः सालाकायेगु ज्या यायेमाः धैगु वय्कःया धारणा खः ।
सार्वजनिक ज्याझ्वलय् मवइगु कारण
थनिं १० दँ न्ह्यः हे वय्कःया किड्नी ट्रान्सप्लान्टया कारण थःगु हाइजिनया कारण सावधानी नालाच्वंम्ह खः, वय्क । लिपा वनां वय्कःयात न्यासी वनेत नं भचा बः कायाः जक वनेमाःगु शारीरिक समस्या त उत्पन्न जुल । वय्कः पेजथ्री अवार्डया न्हापांगु संस्करणय् छक्व जक झायादीगु खः । अनं मेमेगु संस्करणय् व्यक्तिगत रूपं न्ह्याक्व आमन्त्रण यानासां वय्कलं वयेगु खँ ल्हानामदी । छन्हु वय्कलं थः सार्वजनिक समारोहस मवयेगु कारण कथं धयादील की – थः न्यासि वनेत बः कयाः वा तुतां चुयाः जूगु मनूतय्सं खनेवं वय्क प्रति सहानुभुति प्वंकी । वय्कःयात स्वयेगु नजर हे पाना वनी । थः छम्ह म्ये हालामि कथं संसारं म्हसीया च्वंथाय् मनूतय्गु नजर मेगु हे साहनुभुति जुइगु कारणं थःत सार्वजनिक समारोहस वनेगु इच्छा मदुगु कनादील ।
लिखँ
निक्वःगु पेजथ्री अवार्ड क्वचाये धुंकाः नेवाः म्येया विषयलय् नेवाः म्येहालामिपिं मुंकाः छगू वर्कशप यायेगु प्रस्ताव जिं तयाःगु खः । गुकि म्येहालामिं ध्यान बिइ माःगु खँ व नेवाः म्येया विशेषताया विषय चर्चा यायेगु खँ तयाःगु नं खः । तर वय्कःया उसाँय्या कारण सम्भव मजुया वन ।
वय्कःलिसे न्ह्याम्हं वा न्ह्याब्वलें खँ जुसां म्ये, संगीत व अझ विशेषयाना म्येया ट्रेण्डया बारे खँ जुइगु याः । विश्व बजारय् गज्योगु म्येया ट्रेण्ड न्ह्याच्वन व नेवाः म्ये गज्योगु ट्रेण्डय् न्ह्यानाच्वन धैगु खँय् चर्चा जुइगु याः । अझ नं योगेश वैद्य जुया पुलांगु अन्तरवार्ता मालाः न्यन धाःसां नं नेवाः म्ये हालामिपिंसं यक्व हे खँय् ध्यान बिइफइगु जुइ ।
