लाेकंह्वाःम्ह कलाकार सुरेन्द्र मानन्धरं शायद थुगु भिडियाे धुंकाः वय्कः हिराेया रूपय् अन्तिम म्यूजिक भिडियाे जुइ धकाः धयादील । थःगु उमेरया कारण आः हिराे जुइ त मल्वःगु धकाः स्वीकार याना दिल । तर गायकया आग्रहयात सम्मान यायेमाःगु कारणं थुगु भिडियाेस हिराे जुयाः म्हिताच्वंगु जुल। सरस्वति मानन्धरया काय् जुयाः म्हिताः च्वंगु थः त हे मछिंसे च्वन धकाः नं धयाःदिल। तर थथे खःसां सुरेन्द्र मानन्धरं निर्देशन यानादीगु म्यूजिक भिडियाे धाःसा सच्छिपु थ्यनेत्यंगु नं कनादीगु खः । समयबजि सिरियलं लाेकंह्वाःम्ह सुरेन्द्र मानन्धर छम्ह कलाकार, आरजे, च्वमि, म्येच्वमि, म्येहालामि, संगीतकार लिसेलिसें म्युजिक भिडियो निर्देशक नं खः । वयकया हे निर्देशनय् ” आः जि छु याये यःमा ” म्युजिक भिडियो श्रीपन्चमि खुन्हु पितब्वज्या जूगु खः ।
प्रबिनचन्द्र बज्राचार्यं हालादीगु थुगु म्ये सुरेन्द्र मानन्धरं हे च्वयादीगु खः । दिपेश सिंह व आकाश महर्जनं लय् चिनादीगु व थ्व म्येया म्युजिक भिडियो दुने सुरेन्द्र मानन्धरया नापनापं रबिता बके श्रेष्ठ,सरस्वति मानन्धर,ध्रुब कपालि,सुरेश मानन्धर म्येहालामि प्रबिन चन्द्र बज्राचार्य व संगीतकार दिपेश सिंह लगायतया अभिनय दुथ्याना च्वंगु दु ।
ज्याझ्वलय् नेवाः टिभिया नबिन जोशी , सन्चारकःमि व संकिपामि दर्शनवीर शाक्य व सिने पत्रकारिताख्यःया न्ह्यलुवा विजयरत्न असंबरे विशेष पाहाँ कथं झायादीगु खः । मू पाहां कथं वरिष्ठ म्येहालामि जुजुकाजी रंजीत झायादीगु खः ।
