पुस्तान्तरण जुयाःच्वंगु म्ये -जिगु देय् जित यः

नेपालभाषाया संगीत ख्यलय् जिगु देय् जित यः म्येया चर्चा मयायेकं पूवनि मखु । कारण खः थ्व म्ये नेपालभाषा संगीत ख्यलय् थौंया इलय् आवद्ध जुयाच्वंपिंसं गननं गनं न्यंगु हे दइ । कारण खः, थुगु म्ये अप्वः धैथे नेवाः ज्याझ्वलय् छपू स्वागत गान कथं गुलिस्यां हाःगु दु अले आपासिनं न्यनातःगु दु । दशकौं न्ह्यः निसें हालावयाच्वंगु थुगु म्येया श्रष्टा जनगायक रामकृष्ण दुवाल खः । अले थौं थुगु हे म्येया भिजुअल तयार जूगु दु ।

नेपालभाषा ख्यलय् अकसर हे न्हूगु म्येया हे जक भिजुअल तयार जुइगु याःसा पुलां पुलांगु म्येया भिजुअल थौंया इलय् मजू । तर नं रामकृष्ण दुवालया जिगु देय् जिगु यः म्ये छम्ह न्हू पुस्ताया म्येहालामि रानीशोभा महर्जनं हाला रेकर्ड याःगु दुसा न्हू पुस्तायाम्ह हे संगीत संयोजक जिवित जल्मिं संगीत संयोजन यानातःगु दु । थुगु भिजुअलय् न्हू पुस्ताया हे कलाकार हिसिला महर्जन व किशोर चिपालुं अभिनय यानातःगु दु अले न्हूम्ह हे निर्देशक दर्शनवीर शाक्यं निर्देशन यानातःगु दु । थुगु जानकारीया तात्पर्य थुलि हे जक खः कि जब छुं नं म्ये छगू पुस्तां मेगु पुस्ताय् हस्ताणतरण जुइ व कालजयी म्ये। न्ह्याबलें ल्यनाच्वनीगु म्ये जुइ ।

पुलांगु पुस्तयात न्हूगु पुस्तां लः ल्हायेमाःगु वाः पुलांगु पुस्ताया सम्पति न्हूगु पुस्तां नालाकायेगु धैगु हे नेवाः संगीतया जीवन्तता खः, नेवाः संगीतया भविष्य खः तर थौंया आपलं हे न्हू पुस्तां थुगु खँ वाः चायेके मफू । झीगु गीत संगीतया विशेषता छु खः धैगु खँ वाः चायेके मफू । छगू दिशाहीन जुयाच्वंगु नेवाः संगीतं आः बल्ल नेवाः लोकम्येया सवाः थुइका हयेफयाच्वंगु दुसा नेवाः लोकम्येया अकुट संकलक छम्ह रामकृष्ण दुवाल नं खः । वय्कः लिसे सहकार्य वा वय्कःपाखें छुं मार्गदर्शन कायेगु नं नेवाः संगीत ख्यःया निंतिं छगू तःधंगु हे लाभ चुलाइगु स्थीति नं दु ।

जिगु देय् जितः यः म्ये थ्व अर्थय् नं थौंया इलय् मूल्यवान जुयाच्वंगु दु कि स्वनिगःया थी थी नगरपालिकां आः स्थानीय भाय् अध्ययापन याकाच्वंगु दु । थ्व हे झ्वलय् मस्तय्गु सकारात्मक मानसिक विकासया नीतिं नं थज्यागु म्येया आवश्यकता दु । ई हे मत्यःनिपिं मस्तय्गु मस्तिस्कय् यौवनं जाःगु म्ये हालेगु वा प्याखँ हुलेगु इलय् उकिं नकारात्मक असर लाकाच्वंगु दइ । मस्तय्गु सकारात्मक मानसिक विकासया निंतिं थुगु म्येया भिजुअलयात नं छ्यले फइ ।

रामकृष्ण दुवालया आपलं हे म्ये कालजयी जु । रामकृष्ण दुवालया म्येयात न्हूगु पुस्तां नालेफूगु हे थौं नेवाः ख्यःया लसता खः सा वय्कया थें जाःगु व्यक्तित्वया मेमेगु कृति सदां ल्यनीगु कथं थप ज्याखँ न्ह्याकेयंकेमाःगु दु । वय्कःया सम्मानय् हे थुगु पेजथ्री बाःछिपौया न्ह्यब्वया जिगु देय् जित यः म्ये तयार जूगु खः । वय्कःया ताः आयु व भिं उसाँय्या कामना यानाच्वना ।