ईलोहं प्रकाशनया ग्वसालय् जनगायक एवं लोकगायक रामकृष्ण दुवालया हना लिसें वय्कयाः कृति जिगु देय् जित यः म्येया म्यूजिक भिडियो पिदन । ईलोहं प्रकाशनया प्रबन्ध निर्देशक नरेशवीर शाक्यया सभापतित्वय् जूगु ज्याझ्वलय् किपू नगरपालिकाया पूर्व मेयर रमेश महर्जन, किपू वडा ८या अध्यक्ष सानुमैंया महर्जन व बागमति प्रदेशया माननीय सांसद शैलेन्द्रमान बज्राचार्य पाहांकथं झायादीगु खः ।
सम्मानया झ्वलय् जनगायक रामकृष्ण दुवालयात वडा अध्यक्ष सानुमैंया महर्जनं खादां, पूर्व मेयर रमेश महर्जनं दोसल्ला, माननीय सांसद शैलेन्दमान बज्राचार्यं सम्मानपत्र लःल्हानादीगु खःसा ईलोहं प्रकाशनया प्रबन्ध निर्देशक नरेशवीर शाक्यं २५००० तका नगद लःल्हानादीगु खः ।
ज्याझ्वलय् जनगायक रामकृष्ण दुवालया पेजथ्री विशेषांक व स्केच पोष्टर, रामकृष्ण दुवालया जीवनी दुथ्याःगु ईलोहं प्रकाशनया लुँ आखः रंजना आखःया लय् पौ व जिगु देय् जित यः बोलया म्यूजिक भिडियो प्रिमियर जूगु खः ।
जिगु देय् जितः यः बोलया म्ये किपूया रानी शोभा महर्जनं सः बियाःतःगु खःसा न्हूगु जीवित् जल्मीं न्हूगु संगीत संयोजन यानातःगु खः । भिडियोस नेपालभाषाया लोकंह्वाःम्ह कलाकार हिसिला महर्जन राजामतिं अभिनय यानातःगु दु । म्येय् किशाेर चिपालुया नं अभिनय दु । म्ये पेजथ्री बाःछिपौया सम्पादक दर्शनवीर शाक्यं निर्देशन यानातःगु खः ।
म्येया सम्पादन व छायाँकन मनोजरत्न शाहीं याःगु खःसा प्रोडक्शन म्यानेजर उजय शाही व मेकअप सरीता बज्राचार्यं याःगु दु । उकथं हे अफिसियल फोटोग्राफि कथं थुकी विक्रम खड्गी दु । थुगु म्येय् मचा कलाकार कथं कन्यामन्दीर मा वि, शान्ति निकुञ्ज मा वि व वृहस्पति विद्यासदनया ब्वनामि व शिक्षिकापिं नं दुथ्याः ।
किपूया जोशी ननि हेरिटेज होम्सय् जूगु ज्याझ्वलय् लोक कवि राजभाइ जकःमिं रामकृष्ण दुवालया चिनाखँ न्यंकूगु खःसा स्केच आर्टिस्ट अर्पिता शाक्यं स्केच पोष्टर नं लःल्हाःगु खः ।
