जनगायक रामकृष्ण दुवालया च्वसा व संगीतय् कालजयी म्ये जिगु देय् जित यःया उलेज्या ज्याझ्वः लिसें जनगायकयात नं सम्मान यायेत्यंगु दु । ईलोहं प्रकाशनया ग्वसालय् जनगायक रामकृष्ण दुवालया पेजथ्री विशेषांक, स्केच आर्टिष्ट अर्पिता शाक्यया स्केच पोष्टर लिसें पेजथ्री बाःछिपौया न्ह्यब्वया, दर्शनवीर शाक्यया निर्देशनय् हिसिला महर्जन (राजामति)या अभिनय व रानी शोभा महर्जनया सलय् जिगु देय् जित यः म्यूजिक भिडियो म्ये नं पितब्वज्या जुइत्यंगु दु खः ।
म्यूजिक भिडियोया निर्माता एवं ईलोहं प्रकाशनया प्रवन्ध निर्देशक नरेशवीर शाक्यया कथं जनगायक रामकृष्ण दुवाल लिसें वय्कया म्ये संग्रह नेवाःसमाजय् पित हयेगु छगू कुतः थुगु प्रकाशनं यानागु खँ धयादीगु दु । पेजथ्री बाःछिपौया न्ह्यब्वयाय् न्हापांगु म्यूजिक भिडियो जिगु देय् जित यः या प्रिमियर ज्याझ्वः पौष ९ गते किपूया जोशी ननिइ जुइत्यंगु दु ।
थुगु म्येय् नेपालभाषाया अतिकं लोकंह्वाःम्ह कलाकार हिसिला महर्जन लिसें किशोर चिपालुया केमियो दु । जिगु देय् जितः यः म्येयात किपूया रानीशोभा महर्जनं सः बियाःतःगु दु सा थुगु म्येय् जिवित जल्मिं न्हूगु कथं संगीत संयोजन यानातःगु दु । जबकि थुगु म्येया मू सः व संगीत जनगायक रामकृष्ण दुवालया हे दु ।
म्येया सम्पादन व छायाँकन मनोजरत्न शाहीं याःगु खःसा प्रोडक्शन म्यानेजर उजय शाही व मेकअप सरीता बज्राचार्यं याःगु दु । उकथं हे अफिसियल फोटोग्राफि कथं थुकी विक्रम खड्गी दु । थुगु म्येय् मचा कलाकार कथं कन्यामन्दीर मा वि, शान्ति निकुञ्ज मा वि व वृहस्पति विद्यासदनया ब्वनामि व शिक्षिकापिं नं दुथ्याः ।
