मनोरंजनया साधन कथं नाटक मंचन झीगु जीवनया छगू अभिन्न अंग कथं थुइकेमा । व्यस्त जीवन शैलिइ मनोरंजनया निंतिं नाटक मंचनं झीगु जीवनयात पलख दिकाः छुं चिन्तन मनन यायेगुनिंतिं प्रेरित यानाच्वंगु दइ । नाटक मंचनया महत्व थुकथं नं वाः चायेकेमाः कि नाटक मंचन झीगु हे समाजया न्हाय्कं कथं खने दयाच्वनिं । झीसं मनोरंजनया थीथी माध्यमय् मध्य नं नाटक थुगु कारण नं प्रभावकारी जुइ की नाटकया अनुभुति झीसं प्रत्यक्ष रुपं हे कायेखनिं । न्हापा न्हापा झीथाय् नाटक लोकंह्वाःगु कारण छता थ्व नं खः हे धायेमाः कि नाटकया बिषय वस्तु झीगु जीवनलिसे प्रत्यक्ष स्वानाच्वंगु अनुभव लिसे जुयाच्वनिं ।
बज्र कला कुञ्जया न्ह्यब्वया व ममा आर्टस्या सहकार्यय् बोधि–सत्व नाटक कौसि थियटर, टेकुइ जुयाच्वंगु दु । बौद्ध बाखंया लिधंसाय् अंगुलिमालया बाखंया लिधंसाय् तयार जूगु थुगु नाटक नेवाः सभ्यता, नेवाः समाज अले नेवाः मुल्य व मान्यतायात हे कःघाना मंचन जुयाःच्वंगु खः । सशक्त अभिनय, सेल्लाःगु टेक्निकल लिधंसा, न्हूगु पहया प्रस्तुतिइ बोधिसत्व नाटकं नेवाः मनोरंजनया ख्यलय् छगू सशक्त उपस्थीति न्ह्यब्वयाच्वंगु दु ।
बुद्ध सन्देशया प्रचार व मर्म, झीके नं बोधिचित्त उत्पन्न जुइफु वा जुइके फइ धैगु सन्देशय् मंचन यानातःगु थुगु नाटकया परिकल्पनाकार, लेखन अले निर्देशन चन्द्रमान मुनिकार खः । थुगु हे बाखंयात नाट्य रुपान्तरण इँगिहोपो काँइच सुनुवारं यानातःगु दु । कलाकार पिनिगु जीवन्त अभिनय् प्रत्यक्ष रुपं स्वये खनाच्वंगु दु । हरेक स्वकुमि हरेक पात्रलिसे म्वानाच्वंगु आभाष जुइ ।
बुद्धया प्यंगू आर्य सत्यया उद्घोषं शुरु जुइगु थुगु नाटकया दकलय् महत्वपूर्ण खँ धैगु हे स्वयंम बुद्ध न्ववानातःगु जुसां वा शास्त्रय् च्वयातःगु जुसां वा सुनां धाल धायेवं गुब्लें नं मिखा तिस्सिना पत्याः यायेमते, थःम्हं हे अनुभव यानां वा थःम्हं हे चायेका जक छुंनं खँया पत्याः याः धैगु हे मूल सन्देश खः । अंगुलिमालया बाखंयात नं छगू न्हूगु कोणं न्ह्यब्वयेत ताः लानाच्वंगु दु ।
कलाकारपिं सुदन मुनिकार, संगीता थापा, युवाहांग, अनिषा श्रेष्ठ, नानुमैंया महर्जन लिसें सकलें हे कलाकार गनं नं सुं सिबें कम मजू । धात्थेंपिं कलाकार स्वयेगु खःसा थियटर हे स्वेमाःगु जुयाःच्वन । थःगु हे न्ह्यःने कलाया नवरसया भाव स्वयेदइगु इलय् कला धैगु गुलि सशक्त माध्यम खः धैगु खँ वाः चायावइ । परम्परागत दबू प्याखनय् प्रकाश व ध्वनीया समिश्रणं, सशक्त अभिनय् अले न्हूगु प्रस्तुतिं न्हूगु हे अनुभव मुंकेत बोधिसत्व नाटक ताःलानाच्वंगु दु ।
