नेपालभाषाया संगीत ख्यलय् ‘मैचाया सपलय्’ थें जाःगु लाेकंह्वाःगु म्ये हालाः चर्चाय् वःम्ह मोहन शाक्यं थुगु दँय् थीथी म्येहालामिपिं लिसे जाना छक्वलं न्हूगु खुपू व निपू न्हापा हे सार्वजनिक जुइधुंकुगु म्ये मुंका मुक्कं च्यापू म्यूजिकभिडियाेया एल्बम पिथन । थी च्याम्ह मिसा म्येहालामिपिंलिसे जाना च्यापू हे मनाेरंजनात्मक म्ये कीर्तिपुर सिनेप्लेक्स हलय् पितब्वज्या जूल।
‘असं बजाः मंगः बजाः’ नां छुनाःतःगु म्ये मुना एल्बमया च्यापुं म्ये संगीतकार मनराजा नकःमि संगीत तयातःगु खः । दुथ्याःगु म्ये जनकवि दुर्गालाल श्रेष्ठ, भूषण प्रसाद श्रेष्ठ, नातिबज्र बज्राचार्य,वंशीधर बज्राचार्य, मङ्गल महर्जन व चण्डेस्वर महर्जन पिंसं च्वयातःगु खः ।
म्येहालामि मोहन शाक्ययात थुगु म्येचालय् कविता जाेशी ( ययेके धकाः), गंगादेवी महर्जन (गय् जक), राेजी डंगाेल श्रेष्ठ (याे मैं जिगु), रत्न शाेभा महजर्न ( जि खना न्ह्युगु), श्रृजना श्रेष्ठ (आसे रे आसे), सरीता शाही (नापलायेगु मन जुल), लसता जाेशी (ययेका च्वना) व निशा देशार (यल रे यल) म्येय् सः बियातःगु खः ।
च्यापु म्यूजिक भिडियोस छसि कथं सुरज नापित व राेजीना सुवाल, राजु महर्जन व श्रृजा महर्जन, अनुज शाक्य व हसना महर्जन, सुरज नापित व आराध्या लक्ष्मी खड्गी, अनुज शाक्य व गृष्मा महजर्न, यमन श्रेष्ठ, लुनिभा तुलाधर, कृष्णभक्त महर्जन, मंजु श्रेष्ठ,अनुज शाक्य व हसना महर्जन लसता जाेशी व याेगेन महर्जन, सुरज नापित व आराध्या लक्ष्मी खड्गी अभिनय् यानातःगु दु ।
निर्देशन नं स्वपु भिडियोया सुरज नापित, निपु रामकृष्ण खड्गी व मेगु स्वपु म्येया निर्देशन विश्वास बज्राचार्यं यानादीगु दु ।
उलेज्या ज्याझ्वलय् जनकवि दुर्गालाल श्रेष्ठलिसें यल महानगरपालिकाया प्रमुख चिरिबाबु महर्जन मूपाहाँ कथं उपस्थित जुयादीगु खःसा ज्याझ्वलय् बरिष्ठ समालोचक प्रकाश साय्मिं म्येया समिक्षा यानादीगु खः ।
