नेपालभाषाया मनोरंजन ख्यःया दिशा छु धैगु खँय् स्पष्ट जुइ आवश्यक जू । नेपाःया छगू जाति नेवाःतय्गु पुचः दुने नेपालभाषाया गतिविधि न्ह्याकेगु, नेवाः संचार माध्यमयात सकृय यायेगु अले नेवाः नेवाः दुने एकताया सुत्रं चिनातयेगु मंकाः आज्जु हे नेवाः मनोरंजन ख्यःया मूल लँपू जुयाः वनेमाः । थुज्योगु खँयात हे वाःचायेका नेपाल संवत् ११४३ दुने गुकथंया गतिविधि जुल वा उगु गतिविधिया लिच्वः गथे जुल धकाः दच्छिइ छक्व मूल्यांङ्कन यायेगु तसकं हे आवश्यक जू । थुकथंया चिन्तनं हे जक नेपालभाषा ख्यःयात सकारात्मक रूपं न्ह्याकाः यंके फइ ।
नेपाल संवत् ११४३य् छुं छुं उल्लेख्य खँ जूगु दु । नेपालभाषा ख्यलय् थुगु दँय् दकलय् उल्लेख्य रूपं उपलब्धी जूगु धैगु हे गुण ग्रुप्स पाखें नेपाः टेभिया संचालन खः । न्हू दँ ११४३ निसें परिक्षण प्रशारण न्ह्याका दँ क्वचायेत्ययेका आधिकारीक रूपं संचालन याःगु नेपाः टिभि नेवाःतय्गु निंतिं सः थ्वयेकेगु दबू जुइमाः धकाः आशा यायेमाः । थौंया इलय् आः मूलधारया संचार माध्यमय् नेवाःतय्गु सः तायेमन्त धायेगु थाय् म्वालिगु जुइ धकाः विश्वास याये छिं ।
थुगु हे वर्षय् मेगु महत्वपूर्ण ज्याझ्वः धैगु निक्वःगु स्टार म्यूजिक भिडियो अवार्ड खः । थुगु अवार्डय् नेपालभाषाया आपलं आपाः हे म्यूजिक भिडियो दुथ्यानाच्वंगु व आपलं हे सर्जकपिंत सम्मान याःगु दु । मात्र थुगु हे मनोरंजन ख्यः खः गन न्हूपिं लिसें पुलांपिं कलाकारपिंत नं उतिकं हे सम्मान बिइगु यानाच्वंगु दु । पेजथ्री पिपल्स च्वइस अवार्ड व स्टार म्यूजिक भिडियो अवार्ड निरन्तर रूपं न्ह्यानाच्वंगु अवार्ड ज्याझ्वः खः ।
मनोरंजनया माध्यमय् कासायात नं दुथ्याकाः पेजथ्री बाःछिपतिं स्वक्वःगु सेलेब्रेटी फुट्सलया ग्वसाः क्वचायेकूगु दु । कलकारपिंसं मनोरंजन लिसें उसाँय् नं ध्यान तयेमाः धैगु ताःतुनां जूगु स्वक्वःगु सेलेब्रेटी फुटसल कासा जूगु खः ।
संकिपाया क्षेत्रय् थुगुसी तसकं हे निराश वर्षकथं नालेमाः । उल्लेख यायेबहगु छुं कथंया प्याखँ थुगुसि पिमदं तर नेवाः म्यूजिक भिडियो ख्यलय् धाःसा उल्लेख यायेबहगु उपलब्धी चूलाःगु वाःचायेके माः । थुगुसी पिदंगु छुंछुं नेवाः म्ये ज्ञः भ्यूज पूवंगु दु । नेपालभाषा ख्यलय् ज्ञः पूवंगु म्येत तसकं हे म्हो । युट्युबय् ज्ञः पूवंकेगु नं तःधंगु खँ खः छाय्की नेवाः जनसंख्याः १३ लाखया हाराहारीइ दु । थन छपू नेवाःम्येया औसत भ्यूज् १५ निसें २५ हजार जुयाच्वं । थुगसी सचिका चिना बोलया म्ये व अय्ला लू वयाः बोलया म्ये म्हो इलय् हे १० लाख भ्यूज् पूवन । अले लुमंकेमाःगु खँ छु धायेबलय् थुपिं नितां हे म्ये छुं नं कथंया लाखौं सब्सक्राइबर दुगु युट्युब च्यानल मखुसे नेवाः ख्यलय् हे संचालन जुयाच्वंगु च्यानल खः । उकिं म्येया भ्यूज अप्वयेकेत कन्टेन्ट थौंकन्हेया ट्रेण्डकथं वनेमाः धकाः सन्देश बियाच्वंगु दु ।
नेवाः ख्यलय् मेगु हिलावनाच्वंगु ट्रेण्ड धैगु चू लाःगु सफलतायात छगू बःचाः धंगु रूपय् माने यायेगु । थुगुसी थुगु टे«ण्डयात निरन्तरता बिइकथं पेजथ्री बाःछिपतिं ईन्द्रायणी शर्ट मूभी आःतक्क स्वंगु अवार्ड त्याकुगुलिं कलाकारपिंलिसे जाना थुगु लसतायात छगू सेलेब्रेशन ज्याझ्वःकथं यात । उकथं हे मेमेगु उपलब्धी नं छुं छुं ज्याझ्वः याना उत्साह प्वंकाः हनाच्वंगु सामाजिक संजालय् खंके फइ । छुं नं कथंया उपलब्धीयात थुगु कथं नालायंकेगु छगु सकारात्मक पलाःकथं नालेमाः ।
उत्सव व उत्साह लिसें थुगु दँय् बामलाःगु बुखँ नं दु । नेवाः मनोरंजन ख्यःयात अतिकं हे माया याइपिं ब्यक्तित्वपिं विनोद हृदय, राजकृष्ण श्रेष्ठ, जगमोहन वाःमि, सानु ताम्राकार थुगु दँय् मन्त । वय्कःपिनिगु गुणानुस्मरण याना नेपालभाषा ख्यलं छुं कथंया ज्याझ्वः हयेमाःगु दु । हरेक वर्ष मदयावंपिं कलाकारया लुमन्तिइ छुं ज्याझ्वः यानाः वनेमाःगु नं खने दु ।
नेपालभाषाया मनोरंजन ख्यलय् थुगु दँय् निशा देशार हे जक तायेदत । निशा देशारया हरेक म्ये सुपर हित जुयाच्वंगु दु । उकथं हे मनोज महर्जन थुगु दँय् तसकं हे लोकंह्वाःम्ह मोडल कलाकारकथं न्ह्योने दं वःगु दु । मनोजया नं हरेक धैथे म्येया उल्लेख्य रूपं य्ुट्युबय् भ्यूज् दु ।
नेपालभाषा मनोरंजन ख्यःया अवार्डय् जक मखुसे नेवाः म्ये एवं कलाकारपिंसं राष्ट्रिय व अन्तराष्ट्रिय अवार्डय् नं ब्वति काःगुलि अवार्ड त्याकेत नं ताःलाःगु नेपालभाषा ख्यःया निंतिं छगू सुखद क्षण खः । थुगु दँय् आपलं हे नेवाः कलाकार एवं नेपालभाषाया कृतित नेवाः ख्यःया अवार्डय् जक मखुसे गैर नेवाःभाय्या अवार्ड एवं अन्तराष्ट्रिय अवार्डय् नं थःगु उपस्थीति न्ह्यब्वयेत ताःलाःगु दु । ईन्द्रायणी, उच्च शिक्षा थें जाःगु शर्ट प्याखनं थुगु दँय् अवार्ड त्याकुगु दु सा, विश्वास बज्राचार्य, लक्ष्मीकुमार महर्जनपिंसं मलेसियाय् जूगु सिल्भर अन्र्तराष्ट्रिय संगीत सम्मान अवार्ड त्याकुगु खः ।
थुगु दँय् हे नेवाः ख्यलय् योगदान यानाच्वंपिनिगु निंतिं मेगु छगू सम्मान ज्याझ्वः थप जूगु दु । गणेशदेवी मानन्धर फाउण्डेशनं नेपालाषा ख्यलय् हरेक दँय् स्वम्हेसित हनेगु कथं समिति निस्वनाः ज्या न्ह्याकूगु दु । थुगु दँय् झी कलाकार भृगुराम श्रेष्ठ, वरिष्ठ पत्रकार विजयरत्न असंबरे व सिद्धार्थ बज्राचार्ययात हंगु खःसा थुगु सम्मान निरन्तर जुयाः वनीगु खँ फाउण्डेशन पाखें धाःगु दु ।
समग्रय् धायेगु खःसा नेपालभाषा मनोरंजन ख्यःया थुगु दँ उत्साहजनक रूपं क्वचाःगु दु । ख्यःया उत्थानया निंतिं सकलें हे न्ह्यचिलाच्वंगु वाः चायेके फइ ।
न्हूगु दँ ११४४या भिंतुना ।
