कवयित्री नारायणदेवी श्रेष्ठया स्वक्वःगु ज्या–जंक्वया लसताय् वय्कलं च्वयादीगु ‘प्रेम आश दुने बिलिबिलि जायेकाः’ बोलया म्ये म्यूजिक भिडियाेया रूपय् नं पिदन सा थुगु हे म्ये खसभासं नं हिइका पिदन । नितां हे म्यूजिक भिडियाेया उलेज्या अग्रज कवयित्री नारायणदेवीजुया पावन ल्हातं जुल ।
क्षेत्रपाटी पार्टी प्यालेसय् जूग जंक्वया लसता भोजय् वय्कःयातः देछाः कथं वय्कःया सन्ततिपिं गणेराम श्रेष्ठ, मेरी पात्रवंश, दिनेशराम श्रेष्ठ, महेशराम श्रेष्ठ व नरेशराम श्रेष्ठं वय्कलं च्वयादीगु ‘प्रेम आश दुने बिलिबिलि जायेकाः’ बोलया म्येया म्युजिक भिडियो लिसें खस भाषं हिइका निर्माण यानाः थः मांयात देछाःगु खः ।
म्येया नेपाली अनुवाद वरिष्ठ गायक, संगीतकार एवं साहित्यकार योगेश वैद्यजुं यानादीगु खः । कवयित्री नारायणदेवी श्रेष्ठजुया दकले न्हापां पिदंगु ‘मुखु स्वाँ’ नांया कविता सफुतिइ दुथ्याःगु थुगु म्ये संगीतवद्ध यानाः रीता महर्जनं हाःगु खःसा संगीत संयोजन जुगल डंगोलं यानादीगु खः ।
म्युजिक भिडियोया छायांकन, सम्पादन एवं निर्देशन राजेन्द्र डंगोलं याःगु खः । म्युजिक भिडियोस सुमिना महर्जनजुं नृत्य व अभिनय् याःगु खःसा अनु महर्जनं काेरियाेग्राफ यानादीगु खः ।
