साहित्य, संगीत व विज्ञान प्रविधिया ख्यःया ब्यक्तित्वपिंत लःल्हाना वयाःच्वंगु दान्यहिरा सिरपा थुगुसिइ साहित्यख्यःपाखे आधुनिक कविता डा. योगेन्द्र प्रधानयात लःल्हाःगु दु । अथेहे संगीतख्यःया सिरपाः नांजाःम्ह संगीतकःमि, म्येहालामि जुजुकाजि रन्जितयात व विज्ञान प्रविधि ख्यःया सिरपाः जीवन कुमार श्रेष्ठयात लःल्हाःत । नेपालभाषा एकेदमिया ग्वसालय् जनकवि दुर्गालाल श्रेष्ठ मूपाहाँसुइ सिरपाया दाता यज्ञरत्न धाख्वाःया बाखं मुना सफू “मिसा पासा” नं पितब्वज्या जुल ।
सिरपा ज्याझ्वलय् गायक जुजुकाजि रन्जित व संगीता शाक्यं म्ये नं न्यंकादीगु खः । सिरपा क्वछिनाया निंतिं नीस्वंगू स्वंगू समितिइ छसिकथं प्रा. नर्मदेश्वर प्रधान, मनराजा नकःमि व दिनेशराज भुजुया कजिसुइ च्वनादीगु खः । ज्याझ्वलय् प्रेमहिरा तुलाधर, मनराजा नकःमि व डा त्रिरत्न बज्राचार्यपिंसं सिरपाः कयादीपिनिगु परिचय न्ह्यब्वयादीगु खःसा एकेडेमीया दुजः राजेन्द्र कुमार महर्जन पुतां दसिपौ ब्वनाः न्यंकादीगु खः ।
एकेडेमीया दुजः महेन्द्र गोपाल कर्माचार्यं न्ह्याकादीगु उगु ज्याझ्वलय् सिरपा त्याकादीपिंसं नं नुगःखँ तयादीगु खःसा एकेडेमीया सदस्य सचिव डा. पुष्पराज राजकर्णिकारं सुभाय् देछाःगु खः । ज्याझ्वलय् समितिया कजि मल्ल के सुन्दरं लसकुस याःगु खः ।
